سهرة موكن ...

طلعت البيرة والمزات ووزعت على الكل بس المساعدين بصوا لعم نمر فشاور بالرفض فلم اضغط يمكن عايزهم يبقوا صاحيين للمركب وبدأ ناجح بموال سمعته من اكتر من حد اشهرهم محمد العزبى وقال ...

: انا بجول يا زارع الورد عندى الورد وردااانى .. وردك على الناس خلى الورد وردااانى .. انا بمدح اللى خلجنى عبد ونشااانى ..

خلج الخلايج ما فيش بعده ولا تااانى .. وجلت يا جلبى سيبك من اللى بجالك فيه شريك تااانى .. واترك سبيله ولا تندم عليه تااانى ..

احباب جلبى طالبين منى عتب تانى .. وانا عفوف النفس مبحبش عتب تانى .. وحلفت يمينين ما خشلهم عتاب تانى ..

وان كان اللبن الرايب يرجع حليب تااانى .. يبقى انتظار العجوز يرجع صبى تاااااانى.

كلنا فى نفس واحد : الااااااااااااااه  الله الله الله يا عم ناجح ...

:طب مدام ليلتنا حلوة كدة رح اجول كلام حلو من تانى .. مع احترامى لكل الناس اللى جاعدين جدامى..

عينى .. عينى رأت غزالة واقفة مع الزيات .. لا بتشترى زيت ولا بتفارق الزيات .. انما لها جوز عيون سود وخدود حمر بغمزات .. جلتلها يا حلوة تتجوزينى؟ .. جالت هات فلوسك هات .. ناولتها المية فوق الاف .. جالتلى اشرب بيهم شربات .. ده غيرك عمل لى سبع ملايين جنهات دهب وسبع فدادين جصب خالى من السوسة على بس بوسه ولسه بجوله هاااااااات ...

الااااااه يا ابنى زى الفل والله ... إيه يا عم ناجح ده : بصراحة صوتك جميل فعلاً.

قمت جبت زجاجة الفودكا وصبيت لى لاقيت ندا بتاخد منى الكاس فصبيت التانى اخدته زينة قمت شارب من القزازة بضحك سالم وشاور لى نولتها له.

: قول يا عم ناجح قول : دى سهرة موكن والله : مبسوطة يا حبيبتى : انا طايرة يا حياتى ومش مصدقة : لا صدقى ولسه الاحلى جى ان شاء الله.

وقف ناجح وخدته الجلالة وفتح صوته وقال :

الأولى أه على الجلب اللي متهناش .. والتانية اه على اللي صابر بس بخته مجاش .. والتالتة اه على اللي في الدنيا لا مات ولا عاش 
حبينا يا جلبي لكن شوفنا حبايبنا .. سابوا اللي يسوى وراحوا للي ما يسواش .. يااااااااااااااا ليل

: يا عم بالراحة علينا بقى! إيه الجمال ده؟
وقال : لقيت طيرة بتتألم ونار حامية بتكويها .. على عود الحطب واجفة وشوك الدنيا حواليها .. وصياد الجدر واجف وبرصاصه هيرميها 
سألت عليها بدي أعرف لمين هي ومين ليها .. قالوا لي الأم سيباها وأبوها كمان ناسيها .. يا عيني .. ضحية في الدنيا يا خوفي الوحدة تضنيها
ده لو هب الهوا ليلة مسير العود يميل بيها .. وجولت يا رب ساعدني عشان اجدر انجيها .. شاورت بإيدي أناديلها وجاتلي وخدت بإديها
وبنيت العش في العالي وكان قصدي أعليها .. ولما عششت جنبي وشوفت الفرح في عنيها .. فتحت لحبها قلبي وقلت يا رب هنيها 
وخدت من الشجر ورقه عجنته الحنة أحنيها .. وخدت من العنب خمره عشان أشرب وأسقيها  .. وخدت من العسل شهده عشان تاكل وأغذيها وخدت من الهوا غنوة بصوت الناي أغنيها  .. وجبت الورد من البلدي عملته تاج يحليها .. وجبت بخور من الجاوي أبخرها وأرقيها 
وجبت حرير من الهندي عملته ستار يداريها .. وليلة في العشا جالها واحد تاني يناديها  .. سابتني للي كان وحدي , ونزلتله برجليييييييها.

الرحمة يا عم الحاج إيه ده الله يفتح عليك على النعمة لازم تاخد لك كاس .. والنبى يا عم نمر وافق! فوافق.

وبعد الكاس قلت : اقعد بقى ريح شويه :الله يباركلك والله.

شوية ولاقيت سالم وزينة سقطوا منى فطلبت من عم نمر البطاطين وزعتها علينا واخدت ندا فى حضنى وريحنا فى القعدة شويه وسرحنا مع النيل والفجر بيشقشق على صفحة المياه .. ورحنا فى حالة من الصمت والسرحان حتى هجم السلطان .. النوم.

طشششش ...

: سالم .. صباح الخير : صباح الفل يا حبيبتى : هم الجماعة حيفضلوا نايمين ولا إيه؟ :هم الظاهر كملوا بعد ما نمنا احنا سيبيهم يناموا احنا فى اجازة.

: صباح الخير .. إيه اللى مصحيكم بدرى كده؟ : بدرى من عمرك يا حبيبتى دى الساعة عشرة دلوقتى : ياه .. جلال .. بابى .. حبيبى انت لسه عايز تنام؟ قوم بقى كلنا صحينا : اااااه صباح الخير عليكم جميعا .. انا سامعكم بتتكلموا بس كنت فاكر أنى بحلم.

 : صباح الفل يا حبيبى : صباح شريف صباح جميل  صباح سعيد صباح اللى بتغنى.

 : اه انت قايم بتلزق على غيار الريق بقى؟ : مين ده .. اه اه سالم فاكره .. مالك يا عسل على الصبح انت مش عارف انى بصحى قافش ولا ارميك من المركب دى ولا إيه؟ : صلوا على النبى يا جماعة! : استنى انت يا زينة لما اشوف الحلو ده على الصبح؟

: ماللى ياض يا وش على الصبح : مالى انا سيبه عندك فى البيت : طب مش تلم نفسك يا حبيبى ولا إيه؟ : اه عندك حق يا معلمى.

: اهو كدة اظبط ياد : انا فعلا حظبط وطلع الطبنجة من جنبه وسحب الاجزاء عبى طلقة فى الماسورة وصوبه على!

نطت ندا حطت نفسها قدامى بتفدينى وصرخت فى سالم :انت مجنون انت؟ .. انت بتعمل إيه؟ .. سالم ده جلال يا سالم! حبيبك وصديق عمرك : لا صحبى ولا خرة ده مطلع عين امى وجى يتنطط على قدام مراتى وقدامك لا وحياة امك ما حاسيبك الا لما تقول انا مرة ويتنططش تانى : سالم بلاش جنان : اخرسى يا زينة لاطلقك دلوقتى : تطلقنى؟ تطلقنى يا سالم؟ : ايوه كلمة تانية انت حرة قلت اخرسى خالص : ولو ما خرستش؟ : انا مش قلتلك ما تنطقيش طب روحى .. هاتى سجايرى.: إيه؟ : خلاص يا زينة انا معى سجاير  اتفضل يا صحبى : شكرا يا صديقى .. ولع : ولعت يا باشا.

وانفجرنا فى الضحك انا وسالم .. نزلت فى ندا ضرب وهى بتعيط وقامت زقانى من المركب على النيل وقالت : طب انزل بقى طفى نفسك. فمسكت فيها وانا اتقل منها طبعا فاخدتها معى و ......... طشششش فى النيل .. قام شايل سالم زينة وطششششش تانى فى النيل ورانا وهاتك يا ضحك وعم نمر على المركب بيضحط وبيصحى نجاح وسمير اللى كانوا مقتولين نوم علشان يطلعونا من النيل.

طلعنا من النيل مع ان المية كانت جميلة جدا لدرجة اننا ما كناش عايزين نطلع .. الجو سخن والميه ساقعة بس طلعنا علشان ما حدش يمرض .. اتلفينا فى البطاطين بس علشان ننشف المياه الزيادة اللى على الهدوم ولاقيت الموبايل فصل طبعا والحمد لله الفلوس والمحفظة كانت فى شنطة ندا.

حضر لنا المساعدين الفطار واكلنا كلنا مع بعض بعد ما اصرينا على عم نمر ونجاح وسمير المساعد التانى انهم يفطروا معانا علشان يبقى عيش وملح.

ومن الواضح اننا ضمنياً وبدون اتفاق كلنا عملنا بيبى فى النيل لان ما حدش قال انه عايز الحمام لحد ما وصلنا الاقصر.

ووصلنا الاقصر وكنا نشفنا وبقينا تمام.

 تركت لعم نمر الاكل المتبقى والبطاطين اخدنا الخمرة والبيرة وصلهم لنا الناجح لفوق ووقف لنا تكسيين على فندق وندسور لانى كنت نزلت فيه زمان وعجبنى لانه old stayle ونفحت ناجح قرشين واخدت تليفونه على موبايل ندا لان موبايلى باظ ووعدته انى حكلمه وحعمله شريط ففرح جدا وقال لى يا رب يكون كلامى بجد فأكدت له انه بجد ان شاء الله بس هو يدعى لى ان شغلى يمشى كويس بس.

نزلنا على الفندق حجزنا غرفتين وطلعنا غيرنا ملابسنا ونزلنا على اللوبى سألت على شركة سياحه تاخدنا البر الغربى وادى الملوك والملكات فقلوا ان الوقت متأخر اننا نلحق نشوفها كلها لكن ممكن نشوف بعض من وادى الملوك.

خرجت من الفندق انا وندا لاقينا ميكروباص واقف اتفقت معه ولاقيت سالم خرج ورانا هو وزينة ركبنا الميكروباص وانطلقنا على وادى الملوك اخدنا المعدية واحنا فى الطريق عدينا على التمثالين بتوع ممنون فسألت : مين يعرف التمثالين دول اسمهم إيه؟

ردت زينة: ممنون والاغريق هم اللى سموهم كدة علشان واحد من التمثالين يصدع وكان بيصدر صفير من الريح شبهوه بالبطل الاسطورى ممنون وهو بيناجى امه ايوس الهة الفجر.

: الله الله انت tour leder ولا إيه؟ : لا انا اداب تاريخ : طب طل الواحد كام؟ : تقريبا 19متر : تمام : امال يا ابنى انت فاكر إيه مراتى جامدة فى التاريخ : فى التاريخ بس؟ : اتلمى يا زوزو : طيب دول هنا ليه؟ : دول اللى بقيوا من معبد امنحتب الثالث : لا ده انت مذاكرة.

: لا والله انا كنت بحب التاريخ الفرعونى بالذات : يعنى ممكن تقوليلنا اهم المقابر اللى نشوفها دلوقتى.

: اه طبعا .. بص هم 62 مقبرة منهم 26 مقبرة للملوك والباقى لامراء وكبار رجال الدولة والكهنة بس هو اجمل المقابر امنحوتب التالت وستى الاول ومن اهمها توت عنخ امون و رمسيس الثالث والسادس وامنحوتب التانى وحور محب.

: طيب ممكن نشوف الترتيب الجغرافى ليهم إيه علشان نشوف حنبدأ بإيه؟ هو اسم الكريم إيه؟

: اسمى صابر يا باشا : طيب يا صابر نشوف إيه الاول؟ نروح على امنحتب يا باشا : انت تعرفهم من بعض؟ طبعا يا باشا انا ترجمان.

: بينا على امنحتب.

اتفضلوا من هنا .. دى المقبرة رقم 22 والترقيم فى وادى الملوك تم فى القرن ال19 على اساس من الشمال للجنوب بالترتيب الجغرافى من المقبرة 1 الى 21 وبعد كده الترقيم من 22 حتى 62 اللى هم عدد المقابر فى وادى الملوك  اترقمت بحسب ترتيب اكتشافها ومقبرة امنحتب التالت او امنوفيس التالت تبقى رقم 22 فى الترتيب.

امنحوتب التالت هو احد ملوك الاسرة ال 18 تولى الحكم فى سن ال12 ومات بسبب مرض غامض فى سن الخمسين يعنى حكم 38 سنة.

: المرض الغامض ده ممكن يكون فيرس c مثلا : ممكن والله يا دكتور سالم : شكرا! : كمل يا عم صابر كمل.

: امنحوتب التالت اتجوز من تْيى اللى انجبت له امنحوتب الرابع او اخناتون ابو الملك توت عنخ امون .. اتفضلوا من هنا ..

المقبرة دى من اكبر مقابر الوادى الغربى بوادى الملوك بالبر الغربى وفيها معه حجرتين لزوجاته الملكة تيْى والاميرة ست امون وهى ابنته اللى اتجوزها برضه : يعنى اتجوز بنته؟ : ايوه يا فندم  : الفراعنة يا عم سالم كانوا فى الحكاية دى اخر مليطة : انا اول مرة اعرف! : طب ما الملكة حتشبسوت اتجوزت اخوها تحتمس التانى لتحافظ على الحكم! : يا راجل؟ : ايوه يا فندم ده صحيح الملكة ما عت رع ومعناه العدل روح رع .

: ده اسمها الملكى! : صح يا فندم واسمها الاصلى غنمت آمون : حتشيبسوت ومعناه اميرة النساء النبيلات بفضل آمون وهى فعلا اتجوزت اخوها تحتمس الثانى فهى بنت تحتمس الاول وزوجة تحتمس التانى و زوجة ابو تحتمس التالت لان تحتمس التانى خلفه من محظية من المحظيات  ويقال ان حتشبسوت قتلت تحتمس التانى ولكن لا يوجد ادلة على ذالك ونرجع لامنحوتب اللى اكتشفت المقبرة بتاعته دى على يد اتنين من مهندسين الحملة الفرنسية على مصر اللى اكتشفوها سنة 1799 ميلادية والنقوش اللى شايفنها دى حضراتكم بتمثل رحلة الملك فى العام الآخر والمقبرة دى من اكثر المقابر وضوحا فى النقش على الجدران زى ما احنا شيفين وفاضل بس انى اقول لسعادتكم على انجازاته لانه من اهم واعظم فراعنة الدولة الفرعونية الحديثة : يا سيدى اتفضل .. همست : بس يا سالم.

 : بنى امنحوتب معبد في طيبة ولكنه دمر بالكامل بعد كده .. وفى الكرنك بنى معبد للإله منتو إله الحرب رب مدينة طيبة ومعبد تانى للآلهه موت زوجة الإله آمون رع ولأمنحتب الثالث تمثالان جالسان يعرفان باسم تمثالى ممنون كانو بيزينوا معبده الجنائزى اللى اتدمر كله و التماثيل كل واحد منهم منحوت من قطعة واحدة من الحجر الرملي الأحمر ويبلغ ارتفاعه 15 مترا : 15 متر ولا 19 متر؟

: 15 متر بدون القاعدة والتماثيل دى لها قصة .. تعرفوها حضراتكم؟ : مش الاسطورة الاغريقية؟ : نحب مسمعها منك انت يا صابر.

: يعنى همه اتشهروا بسبب زلزال حصل سنة 27 قبل الميلاد هز المطقة وادى الى انشطار فى التمثال الشمالى عن وسطه فالحجر كان بيصدر عنه ذبذبات صوتية ناتج عن التغيرات الفجائية للرطوبة ودرجة الحرارة عند الفجر فظهرت أسطورة ان الاصوات اللى التمثال بيصدرها هى صوت إلهة الفجر أورورا  أم البطل الرومانى ممنون تبكى عليه لسقطوطه في ميدان طروادة  على يد البطل اليونانى اخيل .. ومنه أخذ اسم التمثالين ممنون.

احنا حنلحق نشوف اى مكان تانى يا صابر؟ ممكن نشوف ستى الاول لانها فعلا حلوة زى الاستاذة ما قالت : خلاص يلا بينا يا عم صابر على مقبرة سيتى الاول : بس ادينا كده يا عم صابر فكرة عنها واحنا فى الطرق علشان ما نطولش هناك لانى جعت بصراحة وماليش انا فى الاثار.

: حاضر يا فندم .. فهمست له : وحياة امك؟ فضحك وقال هامسا : بيع اه انما اتفرج وألف فى الحر ده لا طبعا .. خلص بقى يا عم عايزين ناكل.

وصلنا المقبرة رقم 17 مقبرة سيتى الاول وكان مش فاضل غير اننا نشوفها لان صابر قال لنا كل المعلومات فى العربية.

قال ان اسمه الملكى هو من ماعت رع يعنى خال هو عدل رع واسمه الاصلى رجل يت محبوب بتاح وانه من الاسرة التاسعة .. ابن رمسيس الاول وابو رمسيس التانى عثر على مقبرته جوفانى باتستا سنة 1817 ميلادية ويعتقد انه لم يتم الاربعين وقد اسس معبد الممنوميوم فى ابيدوس وخصصه لعبادة العديد من الالهه ويوجد به قاعة الاجداد اللى فيها كل اسماء ملوك الاسرات الى سيتى الاول وبنى معبد القرنة الجنائزى فى طيبة وبهو الاعمدة المسقوف فى الكرنك وهو صاحب المعركة الشهيرة معركة قادش .

دخلنا المقبرة بعد نزولنا مسافة عرفنا انها 30متر تحت الارض وطولها 136 متر منحوتة فى الصخر شوفنا على الجدران نقوش ورسوم للملك سيتى الاول وهو يتعبد للالهه ونقوش لكتب جدارية عن الحياة الاخرى.

خرجنا على الميكروباص والجوع يفترسنا واقترح علينا صابر مطعم نوبى فوافقنا فورا.

قعدنا فى المطعم والححنا على صابر يقعد معانا بس هو اصر يقعد على تربيزة تانية علشان نبقى على راحتنا وهو يبقى على راحته.

اكلت انا فلتو مع رز ابيض وبطاطس مقلية وندا زيى اما سالم فضرب فته بالموزة البتلو وتورلى بالحمة وزينة اخدت بلطى بالرده ورز بالجمبرى.

وطبعا واضح من الاكل اننا لازم بعديه نشرب سفن وننام فورا.

وده اللى حصل فعلا يدوبك شربنا حجرين انا كريز وسالم معسل وكنا بنسلم نمر على النوم يا كبير.

ركبنا الميكروباص وعلى الفندق عدل حاسبته وظبطه وطلعنا الفندق على الغرف ما حدش نطق بكلمة للتانى غير سلام.

طلعت انا وندا شربت مياه لان الفلتو بيعطش ورحت مرمى على السرير واخدت ندا فى حضنى نمت نوم عميق لم يتخلله الا صحيان مرتين للشرب.

صحيت لاقيت الدنية ضلمة تماما فسحبت ذراعى من تحت ندا وقمت اتحسس وكحيت وهوب ... بموت! اه بموت!

نفس السيناريو عمرى كله بيجرى قدام عينى وكل اللى عايزة هو انى اشوف فريدة والعيال وزاد على ندا كمان يمكن انقطع نفسى دقيقة مجرد 60 ثانية بس انا حاستهم 60 سنة.

 اللى حصل انى كحيت فحصل زفير بس الرئة ما رضيتش يحصل شهيق فمافيش هواء دخل فبقيت اشب لفوق وكان الهواء فوق.  واخبط على صدرى بايديه الاتنين زى الغوريلا ولا فائدة الا برحمة ربنا وحصل ..... اااااااااه اتفتح صدرى للهواء ثانيا فوقعت على الارض من فرط الانهاك ودموعى تنهمر صامته فرحا انى لم امت ام من الالم اللى فى صدرى مش عارف.

طبعا سقوط برج على الارض لابد ان يحدث دوى عالى فصحيت ندا تصرخ : جلال انت فين؟ جلال انت فين؟ : فاضحك من المى.

: انا هنا يا حبيبتى ولعى الاباجورة وفعلا ولعت الابجورة اللى جنبها لاقت برجها العالى ممدد على السجادة جنب السرير فقامت جرى وهى فى حالت هلع وخوف شديد.

: جلال إيه اللى حصل؟ : وقعت فى الضلمة : لا انت وشك اصفر و.. انت كنت بتعيط؟ : لا يا سيتى انا دلقت قزازة المياه على وشى وانا بشرب فى الضلمه.

بس تقول لمين؟ قعدت تقررنى لحد ما حكيت لها الحكاية وهى تبكى وتضغطت على وانا فى حضنها وكأنها تريد ان تدخلنى بين ضلوعها.

قمت بعد قليل وفتحت الشنطة وطلعت جهازين iphon من اللى اشترتهم من مطار القاهرة مع سالم وزينة واعطيتها واحد فقالت : ليه؟ اقصد مرسى بس انت عملت حساب ... : جبت واحد كمان لفريدة ومامتها كمان ما تخفيش على .. على ان تعدلوا :اول نمرة ححطها نمرة حبيبى : انا حاجيب لك خط جديد بنمرة تانية ما حدش حيكلمك عليها غيرى وما تديهاش لحد نهائيا : حاضر .. يا حبيبى و حبيب عمرى وقبلتنى فعملت انى اغمى على.

اول ما شغلت الموبايل لاقيت رسائل من عم على وركابى ونسيم وحسيت ان الدنيا مقلوبة على فكلمت عم على الاول وعرفت ان المقبرة بتاعت عبادة بيه على وشك انهم يوصلوا الباب واستغربوا الجماعة اختفائى انا وسالم فقلت له بكرة الصبح حكون عندك بالبدل وسالم .

قفلت معه كلمت الحاج ركابى وعرفت منه ان هواوى عايزنى بسرعة علشان الخواجات قلقوا احنا ليه لسة ما فتحناش فعرفته ان البدل انا جبتها والفتح حيبقى بكرة انا شاء الله ويطمن هواوى وايرين وانهم يجهزوا هم بس فلوسهم وضحكنا وقفلت.

كلمت نسيم علشان ما يزعلش هو كمان وكررت كل الكلام ولاقيت عند نسيم موضوع تانى انه محتاج سالم ضرورى علشان ابن اخو مراته اتاخد فى مصر مع بتوع الثورة وما يعرفوش عنه حاجة وانه كلم سالم لاقى تليفونه مقفول فقلت له حأخليه يكلمك حالا وقفلت معه اتصلت بسالم فرد على وعرفت انه حاطط الخاصية على رقم تليفون نسيم علشان ما يخوتوش وحكيت له فقال انه حيكلمه حالا وقفلت.

لما الاقى المصريين ...

الفجر بعد الشاى اخدنا القطار على سوهاج .. وصلنا قابلنا نسيم بالعربيات فى المحطة اخدنا على القصر طلعنا الغرف اخدنا الدوش المتين ونزلت انا وسالم على الصالون وسبنا ندا وزينة يرتبوا الحياة فى الغرفة ويفضوا الشنط واخدت معى بدل الحرب الكيماوية والاقنعة.

قابلنا نسيم وركابى فى الصالون بيشربوا شاى مع عم على قاموا سلموا بحرارة وعم على اخدنى فى حضنه وهمس فى اذنى : مبروك يا ولدى فهمست انا الاخر: الله يبارك فيك.

قعدنا ندردش على الاحوال فى مصر والثورة وتأثر الناس بالاحداث وانتخابات الرئاسة وثبوت كدب البعض وخروج البعض ومين الخمسة ستة اللى متفوقين وبينهم الصراع الحقيقى وانتمائتهم وبرامجهم ومين فلول ومين اخوان ومين لايبرارى ومين بيلعب على الحبال .. ودور المجلس العسكرى فى الانتخابات وهل فعلا حيسلم السلطة ولا إيه؟ ... رغى كتير فا عنديش ليه دماغ بصراحة لانى كل اللى اعرفة انى اقتنعت بحمدين صباحى وحنتخبة واتمنى انه يفوز بس لو ما فازش مش حقطع شرايينى لانى مش من المشتغلين بالسياسة او الفاهمين ويمكن دى رحمة من ربنا .. اه والله رحمة فعلا!

ماهو اللى فاهم بيبقى تعبان اكتر بكتير من اللى مش فاهم .. اللى فاهم عايز يحصل الصح ولو ما حصلش بيدخل فى دوائر اكتئاب او يجيله الضغط اللى بيصل لازمة قلبية او ربنا بيسترها معاه وبترسى على جلطة بس .. وبعدين عايزين إيه من واحد بيبيع اثار بلده؟ على فكرة انا مقتنع ان بيع الاثار لا حرام ولا عيب .. عارفين ليه؟ لانى شايف ان كبار البلد بيبيعوها لصالح نفسهم ولو بعد الثورة والرئيس الجديد وحل مجلس الاخوان ده وبقى فيه مجلس شعب بجد منتخب من شعب عارف يعنى إيه سياسة وعارف حقوقه وواجباته ممكن ساعتها ابلغ عن اى حد بيبيع اثار مصر.

بس تتحقق الشروط الاولى وقبل منها الاهم هو الاقى المصرى بقى محترم جوة بلده وبراها وعايش على انه انسان من حقه انه ياكل ويشرب ويتجوز ويلاقى شقة وشغل لما الاقى من الشعب واحد ساكن فى منشأة ناصر واخد عيلته وطالع يتفسح فى اوروبا واوروبا فاتحة زراعيها لانه عربى مصرى بترحب بيه لانه فضلها على امريكا وقرر يصرف فلوسه فيها بدل استراليا ولا امريكا.

لما الاقى المصريين بيشربوا شاى مع زوجاتهم فى الفورسيزوز وبيضربوا اتنين باتيه بالجبنة فى روقان.

لما الاقى المصريين بيخناقوا فى السبتية مثلا بسبب اختلافهم على الفن التجريدى احسن ولا الفن التكعيبى.

لما الاقى المصريين بينزلوا الشغل كل واحد فيهم يركب عربيته وهو مبتسم وبيصبح على كل اللى بيقابله.

لما الاقى المصريين بيحسوا بانهم مواطنين من الدرجة الاولى فى وطنهم.

لما الاقى المصريين يقدروا يعملوا الاقرار الضريبى على النت والحكومة تصدقهم.

لما الاقى المصريين اللى فى اسكان الايواء والزلزال الحكومة بتستبدلهم شققهم بشقق فى حى الاشجار مع الاعتزار على المعانة اللى مروا بيها.

لما الاقى المصريين بيعملوا مظاهرات لان الاجازات كتيرة وما بيلحقوش يدوروا عجلة الانتاج بالشكل المطلوب.

لما الاقى المصريين بيدخلوا عيالهم المدرسة الحكومية الراقية ببلاش وبيفاضلوا بين اليابانى احسن ولا مستقبل الكورى افضل كلغة تانية.

لما الاقى المصريين بيصلهم سنويا كارت التأمين الصحى اللى بيغطى الاسنان وعمليات التجميل لان الشعب اتشلفط خالص اخر 60 سنة.

لما الاقى المصريين بيجلهم سنويا حقهم فى قناة السويس وبيع البترول والدهب والقطاع العام والسياحة.

لما الاقى المصريين بينتجوا افلام بتتكلم على البطولات الاسلامية والقبطية والفرعونية افلام فى قوة فيلم كليوباترا اللى انتجته هوليوود.

لما الاقى المصريين بيحبوا التنس و الجولف اكتر من كورة القدم.

لما الاقى المصريين عارفين قيمة الاثار وبيحافظوا عليها وبيرمموها وكانها حاجتهم.

  زهقتوا من جملة لما الاقى المصريين؟؟

طيب لما اللاقى مصريين فى مصر اصلا لانى زى كل المصريين بمشى فى الشارع بقابل جنسيات كتيرة جدا بس ما بلاقيش مصريين.

ساعتها بس حبقى احس ان الاثار دى ثروة قومية وما يصحش افرط فيها ولا بمليارات الدولارات حتى .. ماشى؟

هو فيه إيه؟؟؟

نزلت ندا وزينة يسلموا على الجماعة ويتعرفوا وخرجوا مع سعيد راحوا السوق علشان زينة كانت عايزة تشترى حاجة من الصيدلية ما رضيتش تبعت حد يجيبها وطبعا كلنا فهمنا بس هى ما فهمتش اننا فهمنا.

: ها يا عم جلال مش نخلص بجى الموضوع بتاع هواوى علشان نلتفت لواد عمنا عبادة؟ : إيه اللى تم عند عبادة بيه؟ : عم على يجول لك بجى!

: المكان فاضله يومين ويبقوا قدام الباب بس المية اللى مرشحة عنده عايزة طرمبة ساعتين كل يوم لان الترشيح مش كتير : يعنى مش مية رصد؟

: لو رصد كنت شلتها ما انت عارف! : لامؤخذة انا مكنتش مركز .. طيب الليلة دى نفتح عند هواوى ونخلص ونصور وبكرة بالليل عند عبادة بيه ان شاء الله : تمام ناكل لجمة بجى؟ : يلا بس يجوا الهوانم يا حاج .. سعيد لسه مكلمنى وجال انهم راجعين : تمام.

قعدنا اكلنا وطلعنا فوق نريح شوية .. لان الحر بيفرهد الواحد فقلنا نطلع نريح فى التكييف مع ان الصالون مكيف بس قلنا ننام شوية علشان بالليل.

نمنا كتير وقمنا نزلنا كانوا مستنينا للغداء لاقيت سالم نازل لوحده علشان زينة تعبانة فبعتوا لها الاكل فى الغرفة واتغدينا وطلعت لها ندا.

قعدنا نتكلم على مشاريع واراضى نشتريها وكان بيقنعنا عم ركابى اننا نشتر بيت فى سوهاج على النيل وكام حتت ارض يكون عم على عارف ان فيها ونشتغل بقى براحتنا ونعمل فندق سياحى ونتشارك ووو ... وانا عندى احساس غريب جدا!

ماكنتش حاسس بالسعادة ومستغرب نفسى ليه مش مبسوط؟ دى فلوس كتير جدا .. دى فلوس اعيش بيها انا والولاد واحفادى واحفاد احفادى.

امال إيه طيب؟ مش عارف .. مش عارف قرفت ليه او زى ما كون ذهدت فى كل حاجة فا فيش حاجة ليها طعم.

: يلا بينا يا جلال؟ : يلا ياعم على .. حتيجى يا سالم؟ : لا يا عم حفضل قاعد برة وانتم تحت؟ انا حاقعد مع نسيم فى التراس نضرب لنا حجرين.

: تنورنا يا باشا : يلا احنا يا عم على .. يلا يا سعيد؟ : اتفضلوا يا باشا با الحاج هواوى مستنظرنا هناك مع الست الخوجاية.

: ثوانى اجيب الموبايل من فوق وححصلكم على العربية.

انا فى جيبى الموبايل بس كنت عايز احضن ندا يمكن تشيل عنى شوية من الهم اللى حاسس بيه ده.

:ندا انت فين؟ : انا هنا يا حبيبى .. إيه ده مالك؟ : مش عارف ليه عامل كده؟ حاسس بضيق فقلت اطلع تدلعينى شوية يمكن افك شوية!

: يا حبيبى وجرت على حتضنتنى او بمعنى اصح انا اللى حضنتها وفضلت فى حضنى دقائق وبعدين كان لازم انزل للناس فقبلتها وقلت لها يمكن اكون متوتر لان دى اول مرة البس فيها بدلة الحرب الكيماوية دى : طب بلاش يا حبيبى : لا يا شيخة انا اللى حصور وبعدين دى تجربة جامدة جدا يمكن ما تتكررش تانى .. يلا يلا انا نازل اتمنى لى التوفيق : ترجع لى بالف سلامة يا حبيبى انا مش حنام : لا نامى : لا مش حنام الا لما ترجع بالسلامة ان شاء الله : طيب سلام : لا اله الا الله : محمد رسول الله.

نزلت ركبت مع الرجالة ولما وصلنا المكان لاقيت فريدة بتتصل : الو إيه يا بابا؟ : ازيك يا حبيبى عامل إيه؟ انا تمام : انت فين؟ : انا نازل المكان دلوقتى حنفتح : بجد!؟ : ايوه : طب انت نازل ليه؟ : ما انا اللى حصور يا بنتى : طب ... : فريدة ! انا نازل دلوقتى و الناس مستنينى حكلمك لما اطلع ان شاء الله لو كان الوقت بدرى : كلمنى مش حنام لغايت ما تكلمنى : ok يلا باى : لا اله الا الله : محمد رسول الله.

اول مرة احس انى متجوز اتنين .. : يلا بينا : يلا .

لبسنا البدل والاقنعة ونزلت انا وعم على فى الحفرة واول ما السماء فوقنا اختفت حسيت باحساس مختلف.

يا نهار ابيض !!! : مالك يا جلال؟ : صدرى طابق على يا عم على شوية .. يمكن لانى اول مرة البس البدلة فحاسس بدوخة!

: جلال! جلال؟ انت رحت فين؟        

دخلت حجرة مظلمة تماما ونورت البطارية لاقيت  موميه ممدده قدامى على الارض على الارض قمت خالع القناع وقربت منها لاقيتها انا فاتسمرت فى مكانى ولاقيت عم على دخل الحجرة ووطى على المومية اللى هى انا وبيحاول يدعك لى صدرى وعمال يهزنى و ... مش فاهم!

هو ده معناه إيه؟ يعنى إيه اشوف نفسى؟ ازاى ممكن اشوف نفسى كده؟ هو المكان روحانى للدرجة دى؟ ولا ده يعنى ان انا روحى طلعت تتفرج على؟ طب هو انا اللى نايم ده ولا انا اللى واقف شايفنى من بعيد؟ لا لا لا لا مش معقول اموت دلوقتى بعد ما خلاص الدنيا ارتاحت وحنبسط انا وفريدة والولاد .... اااااااه الولاد ..... ولادى!!! ولادى حيعملوا إيه بالفلوس من غير ابوهم؟  لا انا مغمى على بس.  

هوعم على بيعيط ليه؟ يا عم على! يا عم على انت مش سامعنى؟ انت رايح فين؟ ده طلع على فوق!! يا عم  على انت سايبنى انا واللى مدد ده ورايح فين؟ انا لسه هنا يا عم على!

:فيه إيه يا عم على؟ طلعت بسرعة كده ليه؟ عم على انت بتعيط ليه؟ : انزل يا سعيد يا ولدى معى نطلع جلال : فيه إيه يا عم على حصل حاجة؟ يا عم على؟ : قلعنى البدلة دى يا سعيد : حلضر  يا عم على!

الله هم الجماعة دول ليه مش شايفنى ولا بيسمعونى؟  .... يا نهار اسود! يا نهاااااااااااااااااااااااااااار اسود .. انا مت؟؟؟ انا ميت !!! اه كده يبقى انا ميت دلوقتى.

يعنى انا دلوقتى روح؟ طب ما طلعتش عند ربنا ليه؟ هو انا حبقى من الارواح المعلقة ولا إيه؟ انا لازم انزل اشوف فيه إيه؟ إيه دة؟؟؟؟ انا واقف بينهم فى ثانية.

 دول مش عارفين يشيلونى ... تقيل عليهم جدا انا عارف وكمان لما انا طلعت منى ... أأأقصد لما روحى طلعت منى اكيد انى تقلت ...

بس فى الاخر طلعت اهه ومرمى على الارض الساقعة دى .. الحقيقة انا مش حاسس انها ساقعة بس يعنى متوقع انها ساقعة.

طيب اعمل إيه دلوقتى؟ فريدة حتعمل إيه مع العيال؟ انا نفسى اشوفهم دلوقتى الله الله الله دى فريدة نايمة اهه وواخدة فادى فى حضنها.

الله يعنى هو انا اللى افكر فيه اروح له بقى!!

دى تبقى حاجة حلوة والله .. انا ممكن اشتغل دلفرى ... دلفرى الارواح المعلقة ... بس انا مش عارف ليه روحى متعلقة وما طلعتش؟

طيب اروح لندا اشوفها ....

 اهه قاعدة بتتكلم فى التليفون : هو ما بيردش ليه؟ يا جلال رد سايبنى اضرب اخماس فى اسداس ولا تليفون حتى تطمنى عليك؟ طب بس لما اشوفك!

للاسف يا حبيبتى لما حتشوفينى مش حتعرفى تقولى لى اى حاجة خالص .. انت صعبانة على جدا مش عارف حتستقبلى الخبر ده ازاى؟

طب اروح لعم على اشوفه اتصرف ازاى ....

انا لسه نايم على الارض وشكلى اتغير خالص .. للدرجة دى الروح بتفرق؟ دة شكلى بقى زى ما يكون حد تانى!

:  إيه يا عم على كلمت الحاج ركابى؟ : اه يا سعيد كلمته وهم جيين كلهم دلوقتى : امسك نفسك يا عم على البقاء لله.

عم على منهار تماما ومش عارف يمسك دموعه.

لا يا عم على مش انت السبب ليه بتحمل نفسك كل ده؟ انا البطارية بتاعتى خلصت وخلاص لو كنت نايم وسط عيالى والبطارية خلصت كنت برضه حموت .. الغريبة انى مش حاسس بخطورة الموقف!!

يعنى انا خلاص حدخل المكان الضلمة اللى حأبقى فيه ليوم القيامة ومع ذالك لسه واثق فى حظى! لا هنا انا واثق من رحمة ربنا لان انا عمرى ما اذيت حد ولا مشيت فى اذية حد حتى .. انا يمكن عصبى جدا بس مش مؤذى وكل اللى اعرفهم او اغلبهم بيحبونى .. يمكن ربنا عايز يورينى الناس بيتكلموا ازاى على موتاهم؟ او يورينى مين فعلا زعل على موتى ومش قادر ينسى جلال؟

بس انا قلت لفريدة ان لو انا مت تتجوز تانى بس تختار حد صح علشان العيال.

انا مش حاسس بحاجة خالص! هى الروح بتفقد الاحساس بأى حاجة خالص كده ولا إيه؟ يعنى انا لا حاسس ببرد ولا حر  ولا طعم ولا حاسس بغضب او خوف او سعادة مش حاسس باى حاجة! حتى مش حاسس بانى لامس الارض.

احساس غريب جدا بس انا مش مستغربه برضه .. انا اصلى دلوقتى بحاول احس الاحساس اللى المفروض احسه .. بستنتج يعنى!

طب فين البرزخ اللى سمعت عنه مرة فى صلاة الجمعة؟ انا الظاهر خايف بس مش مصدق انى مت ولا انا ..... لا انا متلخبط خالص.

عم على عمال يعيط وسعيد مش عارف يعمل إيه وانا ممدد على الارض الرملية جثة ساكنة فوق جثث ساكنة بس من الاف السنين. بس الفرق انهم ملوك وانا مجرد نباش قبور الملوك العظام دول.

يعنى بخروج الروح من الجسد بيتحول الموضوع الى جثة لان الروح اللى بتدى القيمة للجسم  ... الجسم صنعه ربنا من الارض من طين ونفخ فىه من روحه  فلما ربنا يسحب الروح يرجع البنى ادم طين تانى ويدوب فى الارض علشان كده ربنا قال اننا نتدفن فى بطن الارض علشان دوب فيها.

كنت بقول ديماً ان الانسان هو اللى بيعمل للارض قيمة هو اللى بيعمر ويسيب اثاره عليها والانسان هو الروح والجسد بس الروح من غير الجسد ليها قيمة انما الجسد من غير الروح لا قيمة له.يعنى ما ينفعش نقول ان مصر عظيمة بس الشعب المصرى ده ابن وسخة ... لان الشعب المصرى هو روح مصر هو اللى عمل لمصر اسم وسمعة وهو اللى عمل عظمتها انما مصر دى مجرد ارض وبس والدنيا من غير ناس ما تنداس.

الميت بيرتاح بس الاهل ...

إيه ده؟  انا فين؟ اقصد جسمى فين؟ فين الجثة؟ اه الظاهر وانا كنت بفكر سرحت شوية والجماعة جم شالونى.

طيب عايز عم على .. الله دى حاجة حلوة قوى تطلب تروح فى مكان فى لمح البصر تكون هناك.

عم ركابى ونسيم ماسكين دموعهم .. الظاهر انهم فعلا بيحبونى بس سعيد مش عارف لسة! سايق العربية وهو ساكت خالص.

على الكنبة الاخيرة فى العربية عم على واخد راسى على حجره ودموعه نازلة على وجهى زى المطر  ... اقصد على وجه الجثمان.

جثمان! جثة! خلاص حصلت على لقب مرحوم؟

ااااه وصلنا القصر !

دلوقتى الرجالة شايلنى و... انتم رايحين فين؟ دول دخلونى على الصالون! إيه ده؟ دول جايبين لى دكتور؟ هوانتم مش مصدقين ولا إيه؟ يا رجالة انا ميت خلاص! ولا يمكن علشان يكتب شهادة الوفاة.

سالم واقف مش مصدق وعنيه فيها الدموع متحجرة اكيد كلموه وهم جايين على هنا.

هييه معلش يا جماعة الدكتور اهه قال الجملة المشهورة فى الافلام وفى الحياة : البجية فى حياتكم يا جماعة المرحوم عطاكم باجى عمره.

مين قال لامك انى عطيتهم باقى عمرى؟ بوزع عمرى انا؟ كنت اديته لولادى ااااه يا ولادى.

اختاروا بعد ما احتاروا مين يقول لندا.

قرروا سالم يقول لزينة وزينة تقول لندا .. اهه الموقف العصيب جه اروح اشوف ولا بلاش؟ بلاش لحسن ندا ممكن تنهار و.. الله !

انا بحس اهه! يعنى حاسس اهه انى خايف على مشاعر ندا!

:خاااااااااااااااالد .... خاااااااااااااالد يا حبيبى .... جلال يا عمرى انت فين؟

دخلت ندا تولول وتندب .....

: اااااااااااه يا جلال ....

وتمسكها زينة وهى تصرخ فيها : ارحميه يا ندا دموعك دى بعزبه بلاش كده!

خرج الرجال كلهم بما فيهم سالم ووقفت انا ساكت تماما مخضوض ودموعى مابتنزلش بس بتحرقنى ومش عارف اعملها إيه؟

: يا خاااااااالد انت رحت فين؟ سايبنى لمين؟ سايبنى للعزاب من بعدك؟ انت خرجت من جسمك رحت فين؟ ارجع .. ارجع ... ارجع لى .. طب ارجع لفريدة والعيال! طب انا مش عايزة حاجة غير انك ترجع وانا اموت بدالك يا حبيبى .. ما انا كده مدبوحة ومش عارفة اموت حتى .. هو فيه حد بيعيش من غير روحه انا روحى طلعت معاك يا حبيبى ..انا روحى معاك وفيك ولو مشيت روحك يبقى انا روحى راحت خلاص .. يبقى انا روحى ... انا حتجنن يا زينة .. هزيه يا زينة معإيه علشان يصحى .. قوميه معى قوميه .. قوم اقف يا جلال قوم.

يا رااااااب .. يا راااااب  ... انا ما لحقتش افرح بيه .. انا ما لحقتش اسعدك وافرح معاك .. ليه يا رب اخدته وسبتنى بس؟

ليه سبتنى لوحدى فى دنيا العزاب دى؟ كنت اخدتنى معاه اونسه .. زمانك يا حبيبى وحيد وبتدور على علشان اطبطب عليك واخدك فى حضنى  علشان امسح الهموم عن روحك .. روحك الصافية .. روحك السمحة .. رد على كلمنى ... جلال! جلال؟ انت يعنى رحت خلاص؟ رحت منى خلاص؟ رحت منى ومن الكُل؟

 ااااااااه  .. ااااه لو تعرف انت عملت فى إيه؟

انت ارتحت وسبتنى انا لظلم الدنيا .. لو موت نفسى مش حروح عندك ولا حشوفك .. طب اعمل إيه؟ اعمل إيه؟ اعمل إيه يا زينة؟ اعمل إيه يا ناس؟ اعمل إيه انا بس؟

: كفاية يا ندا كفاية! انت حيحصلك حاجة : حيحصل لى حاجة؟ إيه اكتر من كده؟ اكتر من انى اتبترت من الدنيا؟ انا اتبترت من الدنيا يا زينة انا روحى راحت يا زينة روحى خرجت معاك يا حبيبى خرجت معاك .. اروح فين؟ اروح لمين؟ اعمل إيه انا دلوقتى؟

: طب قومى قومى بس نطلع برة شويه : اطلع فين؟ انا تدفنونى معاه آه صدقينى هو حيبقى عايزنى معاه هو ما بيحبش الوحدة خالص.

دخل سالم وقال لندا : يا ندا مش حينفع كده مش حينفع! احنا فى بيت ناس واكرام ال... الميت دفنه وانت مؤمنة بالله.

وانت عارفة اننا لازم ننزله مصر دلوقتى علشان فريدة تشوفه والعيال وامه واخواته!

: كمان .. كمان يا سالم مش حقدر اودعه؟ ليه بس يا ربى؟ ليه؟ ده انا كنت ابتديت اصلى؟ انا كنت ابتديت يا رب وانت عارف .. كنت بس ادينى فرصة ! ادتهونى وبسرعة اخدته منى .. بسرعه اااااه .

 : ندا .. ندا بصي لى  ندا؟ شيل  يا سالم شيل معى دى اغمى عليها المسكينة.

خرج سالم جاب الدكتور من برة وكشف الدكتور عليها وحقنها بمهدىء علشان تقدر تنام وشلها سالم الله يبارك له طلعها غرفتنا وزينة معها وانا كمان ..... وهى ممدده على السرير قبلتها فى جبهتها ومسحت على راسها وهمست فى اذنها ...

: يا حبيبتى انا جنبك وحوالك دايماً ... نامى وماتخافيش الموت اخذ منك جسمى اللى هو فانى بس روحى معك وحولك.

زى ما انت مفتقدانى انا كمان مفتقدك واكتر يا حبيبتى ... يمكن انت حولك ناس انما انا طال الوقت او قصر روحى لازم حتروح لمكانها اللى منتظرها .. امتى؟ مش عارف بس اكيد مش حتفضل سايحة كده.

الغريبة انى لاقيت شبح ابتسامه على وشها الشاحب.

نزلت لاقيت سالم والرجالة اخدوا قرار بانهم لازم ينزلونى دلوقتى على مصر... جثمانى يعنى و حضروا العربية واخدوا شهادة الدكتور علشان الطريق وركبونىى فى الكنبة الاخيرة وكأنى نائم جنب عم على وركب نسيم وركابى فى الوسط وسالم جنب سعيد علشان الكماين فى الطرق.

وفى الطريق كلم سالم فريدة وقلها تجيب العيال وترجع على القاهرة فى طائرة الفجر لانى عملت حادث ونقلونى على المستشفى وهو حيقابلها فى المطار الفجر يجيبها على المستشفى .. بس ما عرفتش غير انها بقت تعيط وبصراحة ما حبتش اشوفها وهى فى الحالة دى فمرحتلهاش.

نايم على السرير وركابى ونسيم وعم على فى الرسبشن وانا فى وسطهم شايفهم وهم مش شايفنى بس حسيت ان عم على حاسس بوجودى بس مش شايفنى.

 اتفتح باب الشقة ودخلت فريدة وسالم وراها! الله طب والعيال؟ العيال فين؟

دخلت فريدة وقال لها سالم : الحاج ركابى والحاج نسيم اصحاب جلال وعم على انت عرفاه : اهلاً وسهلاً وميلت على سالم تهمس : هم دخلوا البيت ازاى؟ : اقعدى يا فريدة دقيقة بس.

فقعدت وقالت : انت قلت حنجيب غيارات لجلال وننزل وطلعت لاقيت عم على ومعاه الجماعة دول مشرفين ومنورين ... ممكن بقى تقول لى إيه الحكاية؟ : طبعا حقول لك طبعا بس عم على انت عارفه مش كده؟ : ايوه! قلت انا عرفاه : عم على هو اللى كان معاه ساعة الحادثة .. قلها يا عم على الحكاية : خير يا عم على؟ هو اتكسر وانتم مش عيزين تقولوا لى؟ ولا حيعمل عملية ولا إيه؟ حد يقولى انا اعصابى بايظة من ساعت تليفونك يا سالم : يا فريدة يا بنتى انت مؤمنة بالله وبقدره : ايوه يا عم على فى إيه بقى؟

: جلال عطاكى عمره !

: يعنى إيه؟ : عطاكى عمره وسابلك خمس وردات يتربوا فى عزك.

 : سابهم فين؟ انتم عايزين تقولوا إيه يا راجل يا مجنون انت؟  : فريدة اهدى بس علشان الاولاد حتى .. : بس بس بس  .... يعنى انتم بتقولوا انى ... يعنى هو فين؟ : هو فى اوضيتنا صح؟

قامت فريدة تتسند على الكرسى والحيطان ودخلت الغرفة .... صمت ... سكون .... دقيقتين.

 انا قلقت فرحت اشوفها لاقيتها بتهزنى وبتنادى على بصوت واطى ........

: جلال .. جلال .. انت نايم يا حبيبى؟ انت نايم صح؟ انت نايم وحتقوم؟ قوم بلاش الجو ده بقى! قوم انت عارف انى ما بحبش الحركات دى  ..  ودى مش مفاجأة .. جلال .... لا انت ما متش انت بتستعبط .. لانك لو مت يبقى لازم جسمك يبقى بارد وانت مش ....

حطت يدها وصرخت ..... باااااااااااارد ... يعنى الناس اللى بره دول مش ضيوف دول جايين يعزونى فيك؟

جلال انت مت يا حبيبى؟ مت وسبتنى ليه بقى؟  ممكن تقولى سبتنى ليه؟

مت .. قوم قوم يا حبيبى انا مش حزعلك تانى عمرى .. قوم اقعد اتفرج معى على التلفزيون .. يا جلال رد على!

يا جلال انا فريده حبيبتك .. ام عيالك .. انا روح قلب عيونك انت مش كنت بتجرى كل ده علشان تجيب الفوس اللى حنحقق بيها كل اللى عايزينه؟ انا مش عايزاها الفلوس دى وحارجعها بس فتح عنيك انت يا حبيبى فتح بقى .. يعنى انت مش عايز تشوفنى؟

ده انا حتى واخدة تان واسمريت عن ما شوفتنى اخر مرة!

طب انا اسفة .. طب خلاص والله انا اسفة وما عدتش اتخانق معاك خالص لا علشان الفلوس ولا علشان اى حاجة خالص بس فتح يا حبيبى عنيك ... فتح عايزة اشوف عنيك وغمض تانى ..... يا خااااالد رد على ...

قعدت ترجرجنى وتهزنى وشالتنى من على السرير واخدتنى فى حضنها.

اااااااااااه قصمت لى ضهرى يا ضهرى يا سندى يا راجلى ... انا بقيت مشلوله .. انا مشلولة يا جلال حتسبنى كده؟

يعنى يرضيك فريدة حببتك تبقى كده؟ يرضيك؟ انت عمرك ما استحملت على الهوا الطاير حتسبنى كده؟ حتسيب الدنيا تلطمنى؟

يا راااااااااب ... يا رب رجعهولى انا ما عنديش غيره .. انا مش عارفة اتنفس.

 طب ولادك يا جلال حيتربوا ازاى من غيرك؟ طب انادى الولاد تشوفهم؟ مش عايز تشوف الولاد؟ ده انت روحك فيهم .. يعنى لو انا جبتهم مش حتفتح تشوفهم حتى؟ يا جلال قوم بقى قوم!

طب لو ما قمتش انا حتجوز وانت عارف بقى جوز الام .. حيتبهدلوا من غيرك .. انت حر بقى ......

يا جلال فتح عنيك يا حبيبى الموت ده مش ليك ... الموت ده جالك غلط وربنا حيرجعك يا حبيبى ليه ولعيالك.

 ده العيال مخضوضين عليك حتى فادى ... طب ده يوسف قاعد بيعيط فى الطيارة من ساعة ما ركبها لغايت دلوقتى .. انت بتحب يوسف ابنك البكرى يرضيك يقعد يعيط كده؟

دخل سالم الغرفة وقال ان حسن اخويه اتكلم على موبايلى وانه قاله على حكاية الحادث وهو فى الطريق لهنا دلوقتى .. فنظرت فريدة له وقالت : جلال كويس بس هو بيرتاح من السفر وحيخرج يقعد معانا .. سالم هو تعب ازاى؟ :  فريدة جلال الله يرحمه  وانت بس ...  

: اخرس اوعى تقول مات وما تكلمنيش على انى مجنونة انا حاسة بيه جوإيه دلوقتى وهو جوإيه .. انت ما تعرفش اللى بينى وبين جلال .. ولا حد فى الدنيا كلها يعرف اللى بينى وبين جوزى ابو عيالى ابويه واخويه وامى وكل سلسالى .. انتم ما تعرفوش حاجة كلكم .. انا .. انا .. انا حروح اعملكم الشاى وهو حتلاقيه قايم يقف معى فى المطبخ  لانه ما يقدرش يستغنى عنى ولا عن الولاد علشان يسبنا كده بكل سهولة ويمشى اقولك حاجة دلوقتى حيقوم وحتلاقيه هو اللى بيعمل الشاى دلوقتى كمان.

باى باى ...

فريدة قاعدة على الكنبة قدام شاشة LCD بتتفرج على المسلسل التركى فى بهو الفيلا اللى بنتها زى ما كان عايز جلال.

كان حلمه يبنى فيلا او بيت فى مساحة ارض كبيرة .. ممر الى البيت ومن حول البيت يمر طريق يتفرع الى خمس طرق فى نهاية كل طريق بيت بحديقة لولد من الولاد .. لانه كان نفسه يبقى اولاده ديماً حوليه.

كان عامل التصميم ده علشان كل ما ييجوا يدخلوا بيوتهم يمروا على الفيلا الكبيرة الاول يتطمنوا عليه وعلى امهم.

فلما جت الفلوس الكتيرة اشترت فريدة ارض فى طريق مصر الاسكندرية الصحراوى و عملت كل شىء كما خطط له جلال.

البيت مزين من الخارج والداخل لان فادى راجع من شهر العسل هو نادين عروسته كانوا فى ايطاليا فى بيت صديقة فريدة وجارتها ندا اللى سكنت فى الكومباوند نفسه فى نفس وقت ما سكنت فريدة وبقوا اصحاب من يومها الروح بالروح.

يدخل يوسف باولاده جلال على اسم ابوه وكريم ودينا وجميلة وفريدة حبيبة قلب جدتها طبعاً  ومراته هالة  شيلاها.

 تقفلت الجدة فريدة التلفزيون لتحتضن الاحفاد وتطلع البونبون لتوزع عليهم.

ويصل نور من النادى هو ومراته سميرة واولاده مروان وسليم وهدى وفراس وسلمى كانوا فى النادى لان مروان كان عنده بطولة سباحة وطلع الاول زى السنة اللى فاتت لان جدهم جلال كان بيقول ان المسلمين لازم يعلموا اولادهم الالرماية والسباحة وركوب الخيل.

جرت الخادمة تفتح باب التراس للاستاذ تاج ومراته لينا الروسية واولاده الملونين نهى وتيمور وفهد وعمر ونرمين وسلموا على الجدة فريدة اللى عمالة توزع فى البنبون والتشوكليت.

ينزل فادى على الهيصة هو وعروسه لمفاجأة الجميع ويتبادل مع اخوته واولادهم وزوجاتهم السلامات والتحيات والاحضان والقبولات على دخول علاء ومراته نرين مع اولادهم تيم وحسن وسها وإيه وشاجى.

يخبط الباب فالكل يسكت مستغربين مين اللى جى ده؟ ويقف يوسف ليسأل فريدة امه : انت مخلفة غيرنا ولا إيه؟ يضحك الجميع على دخول سالم وزينة  واولادهم جلال وندا.

وقبل انت تغلق الخادمة باب الفيلا تدخل الحاجة ندا صديقة عمر الجدة فريدة وجارتها التى لم تتزوج عمرها ويدخل خلفها ثلاث رجال يحملون معدات يبدأوا فى فردها سريعا لنكتشف انها معدات اضاءة وان الحاجة ندا احضرت المصور لعمل صورة عائلية لقبيلة جلال كما كان يتمنى هدية منها لذكرى ميلاد جلال.

يقف يوسف ليقول كليمة فى ذكرى ميلاد ابيه فقال :

بالنيابة عن اخوتى اتكلم اليوم .. امى الحبيبة فريدة .. اخواتى الاربعة وزوجاتهم ومراتى واولادنا كلنا .. عمو سالم وطنط زينة .. طنط ندا اللى صحيح عمرها ما شافت بابا بس يمكن حبته من كتر كلام ماما عنه طول العشرين سنة الماضية .. احبائى جميعا شكرا لحضوركم ولو انكم ساكنين هنا اصلاً.. وكل سنة وبابا طيب كان زمانه دلوقتى عنده 66 سنة والكليمة الان لماما حبيبتى.

 قامت فريدة بملامحها الحلاوة الحزينة وقالت :

اولادى واحفادى واصحابى واحبائى انا مبسوطة انكم كنتم حوليه طول السنين دى وبشكركم على ده وكل اللى ناقص دلوقتى علشان ابقى كملت حلم حبيبى وزوجى الغالى جلال ان ينجب لنا فادى 5 اولاد لان ده كان حلم ابوه الله يرحمه.. كان ديماً يقول لى ولادك الخمسة دول لما يتجوزوا حيجيبولنا كل واحد فيهم خمس عيال ويبقى عندنا خمسة وعشرين حفيد.

ولما كنت احزن انى ما خلفتش بنت كان يقولى بكرة الخمسة دول يجيبوا لك خمس بنات.

وفعلا اكرمنى ربنا بخمس زوجات انا بعتبرهم بناتى ربنا يبارك لى فيهم ويحافظ عليهم.

اما انت يا زوجى وابى وامى وشريك حياتى فانا مش محتاجة اقول لك حاجة لانى بتكلم معاك وبشورك فى كل حاجة كل ليلة.

 انت يمكن مش وسطنا دلوقتى بس انت جوإيه وجوه كل راجل من ولادك دول واحفادك.

ثم بكت وتوقفت عن الكلام.

 اخد الميك سالم ليقول كليمة فقال :

: صديقى و اخى وحبيبى جلال .. انت فعلا جوانا وعلى طول معانا واللى قال ان اللى خلف ما ماتش ده صادق لانك سايب لنا خمسة جلال غير الخلاليد الفكة اللى خوالدك خلفوها والسلام عليكم و رحمة الله وبركاته.

سقف الجميع واعطى الكليمة الى زينة فقالت:

انا زينة يا جلال .. اولاً عايزة اشكرك لانى عرفت النهارده بس انك انت اللى اقنعت سالم اننا نتجوز  فانا بشكرك وثانياً انا عايزة اقول لك ان رغم اننا ما عرفناش بعض مدة طويلة الا ان وجودك فى حياتى كان مؤثر جدا ولحد النهاردة انا وسالم كل يوم بنفتكرك وبندعيلك ربنا يرحمك وتكون فى الجنة شايفنا دلوقت.

اخد المايك يوسف وفاجىء الحاجة ندا بأن اعطاها المايك وقال : والكليمة الان للحاجة ندا صديقة العائلة من عشرين سنة.

فتلجلجت ندا وهى تقف ممسكة بالميك ثم قالت :

على الرغم من انى عمرى ما تشرفت بمقابلتك يا استاذ جلال الا انى من كتر ما الحاجة فريدة كلمتنى عنك بقيت بحبك ... اقصد بحبك زيها اقصد بحبك من حبها لك وديماً بنقعد نعيط احنا الاتنين كل ما تيجى سيرة حضرتك يا رب تكون الحجات اللى حجتهم لك الحاجة فريدة وصلوا لك وربنا يتقبلهم ويسكنك فسيح جناته.

المصور استعد فاجتمع كل الاولاد والاحفاد حول فريدة فى عدة صور ثم انضم لهم سالم وزينة و جلال وندا ولادهم وقعدت الحاجة ندا جنب الحاجة فريدة واخدوا صور ولما تشوفوا الصور دى كلها حتلاقوا انى موجود معاهم مرة جنب الحاجة فريدة ومرة جنب الحاجة ندا ولما قعدوا جنب بعض قعدت فى النص وحتلاقى لن كلنا بنضحك الا فريدة وندا الدموع فى عنيهم.

 بعد ما اطمنت على الكل واتصورنا كلنا يلا بقى باى باى لازم روحى العجوزة دى تروح ترتاح بقى.

تمت

بحمد الله تعالى

فى 6/7/2012