طريق ال NA ...

 طلعت على طريق مصر السويس ومنه على الدائرى للوصول لطريق الNA  ثم المقابر الحمراء الى المقطم على البيت يعنى وعلى طريق الNA  لاقيت سيارة تيوتا لاند كروزر زرقاء بسقف ابيض واقفة وفيها بنت قاعده وشنطة العربية مفتوحة وفيه بنت تانية بتجيب كوريك او حاجة منها بس كانت موزه لدرجة انى خوفت اقف ..... ليه؟ لان من فترة طويلة كان فيه حركات كدة مشهورة بنات بتعلق شباب و تاخدهم على البيت و بعد التسخين تختفى البنت و يظهر رجل و معه كلاب شرسة ويطلب من الشاب ان ... يعنى انتم فاهمين بدون الدخول فى تفاصيل .

والايام دى شوفت على الface book تحزيرات من ان فيه ناس عامله انها قناة فضائية و معاهم 200$ على انهم جائزة ويسالوا سؤالين عبط وطبعا انت تجاوب وتاخد ال200$ و يدخلوك سيارة القناة تحت بأى حجة تسلم على المخرج مثلا.

 وتخدر ويسرقوا القرنية والكلى ووو .. بيفضوا الجسم و يحولوك بعد الشر عليك و علينا الى قطع غيار انفلات امنى بقى.

 بس انا غامرت لانى بحب المغامرة بطبيعتى وقلت اقف اشوف إيه الحكاية؟

ركنت ونزلت متوجه للموزة الواقفة فى الخارج لاقيتها موزه مووووز فعلا بس اد بنتى عندها بتاع عشرين سنه مثلا قلت وانا بسبل عينيه لها طبعا : فى حاجة؟ محتاجين مساعده؟ : لا احنا كان معانا ناس بس تهنا من بعض فقلنا نستناهم هنا .

: اصل انا لاقيتكم واقفين وانت جنب شنطة العربية فافتكرتك بتطلعى الاستبن فقلت اساعد يعنى! : لا خالص مرسى كلك زوق .

عينى راحت للشنطة و انا بكلمها فشفت لوحة مرسومة بالزيت ومتغطي نصها : حلوة اللوحة دى! دى رسمك؟ : لا دى لوحة لسة مشترياها : ممكن اشوفها؟ اصل انا ......... وعينك ما تشوف النور يا عم الحاج  ترررررررر !!!  ترررررررررر؟ طب ليه كدة؟

حسيت ان الدنيا بتفرقع فى عنيا وحرقان فى جسمى كله . تحس انك لبست فى السد العالى فجاة ..

إيه ده بقى؟  Electric Shock !!؟

 قمت من على الارض مش عارف انا اترميت الرميه السوده دى اد إيه؟ لاقيت عربيات كتير واقفة وناس بتقلبنى على ظهرى وبيحاولوا يوقفونى اول حاجة عملتها انى اطمانيت على ولادى فى العربية وبررت للناس انى كنت نازل اشوف العجل اللى ورا وجالى هبوط.

اصلى ما اكلتش حاجه من الصبح لاقيت  شاب معه واحدة معرفش هى خطيبته ولا اخته ولا إيه ادتنى واحدة MARS  اكلتها وشكرتهم جميعا وركبت العربية بعد ما اكدت لهم انى بقيت تمام وروحت على البيت وانا دماغى مش فى مكنها.

مش عارف اركز فى اى حاجة غير البنت اللى شوفتها ومش عارف انا ليه نفسى اشوفها تانى؟ عجبانى؟ ولا عايز اعرف حكايتها؟بس ازاى؟

باليل نزلت اجيب شويه طلبات للبيت علشان سندوتشات العيال بكرة وشويه جبن و طبعا اتفكت المائةجنيه وودعتها عند الكاشير.  واللى فضل منها اديته للى وصل لى الشنط من السوبر ماركت للعربية والسايس اللى واقف امام السوبر ماركت.

روحت مساكن الزلزال اجيب عيش من الفرن (منطقة شعبية فى المقطم).

مساكن الزلزال دى كانت الحكومة عاملاها لمحدودى الدخل والعرسان بس لما حصل الزلزال فى التسعينات اخدوا اللى بيوتهم انهارت فى الزلزال ونقلوهم على المقطم والدويقة وما الى ذالك من مناطق وبقى اسمها مساكن الزلزال من يومها وهى تعتبر منطقة سوق الاسعار المعقولة فى المقطم.

وعند عم ثابت بتاع الكبدة وقفت كالعادة اخطف لى سندوتشين كبدة لانى ما اقدرش اقاوم الكبدة بتاعته حتى لو شبعان.

وانا واقف المح إيه؟ العربية التيوتا اللاند كروزر اياها سايقها شاب وبيعدى بسرعة من قدامى.

قمت واخد النمرة اللى بقت سهلة بعد ما خلوا نمر  العربيات ارقام و حروف.

نمر مصر ...

على فكرة نصباية النمر بتاعت العربيات دى النصباية اللى بيتحاكم فيها مسؤلين كبار فى الحكومة السابقة من ضمن النصبايات ولو عايزين تعرفوا اسماء ممكن اقول حروف لانهم لسة بيتحاكموا ولم يصدر حكم عليهم لسه وانا مراهن على زكاء المصريين المعتاد  نقول (ا.ن) و (ح.ع) هه !!  تمام هم دول .

 كان فيه شركة فى مصر بتعمل نمر العربيات بس الناس الياهه راحوا جابوا شركة المانى وادوها احلال و تجديد نمر عربيات مصر  مع ان الشركة المصرية اللى كانت بتعمل النمر كانت حتعملها بربع تمن الشركة الالمانية  بس تقول إيه فى المصالح يا عم الحاج. بس والله تغيير النمر الاديمة بالجديدة ام حروف و ارقام خلت الناس تتسلى برضه. و انت ماشى او واقف فى اشارة من الاشارات ام كاميرات و عدهدهت مضيئة عارفنها ولا اشرح طيب. حشرح .. من حوالى سنة  سنة و نص فجاة حطولنا فى الاشارات كاميرات و عدهدهت مضيئة . كاميرات تصور كل من تسول له نفسه انه يكسر الاشارة او يلمس الخط الابيض ويتفضح بالصورة فى المرور لما ييجى يجدد فضحت المتصور فى اشارة المرور اما العدادات بالنور الاخضرعلشان تقولك امامك اد إيه والاشارة تتقفل وبالاحمر فاضل اد إيه والاشارة تتفتح والحقيقة ان طبعا دى حاجة حلوة جدا وحضارية وتعلم البشر اللى هما الشعب تعلمهم الادب والانضباط والالتزام وفرحنا كلنا و قلنا اهلا بالالفية التالتا و مصر بقت على خريطة الدول المتادمة مروريا.

شهرين يا كبير و غنينا يا فرحا ما تمت كل اشارة يا اما العداد معلق و ثابت على رقم يا اما مطفى خالص و الكاميرات بقى وشها عكس الاشارة او ما بتصورش اصلا وبكدة نادر نفهم ان الحكومة كانت بتدوقنا المدنية المرورية والتحضر فى السير و بعدين اللى عجبهم النظام ده يبقوا يشتروا هم العدادات والكاميرات ويركبوهم فى شارعهم او يعيشوا فى بلد فيها النظام دة  بلا قلبة دماغ .

نرجع للنمر المسلية تلاقى نفسك طول الوقت ماسك التلت حروف وعمال تركب منهم كليمات يعنى مثلا ر خ ى تبقى رخى يعنى اسدل او لامؤخذة دلدل او تبقى ريخ اللى هو الريخ التالت فى الجيش النازى او خرىَ و هو ابلغ وصف للى بيحص لك فى الاشارة والطريق وهى تسالى برضه لك فى السكة وانت ماشى.

بعد ما كتبت النمرة كلمت واحد صحبى فى النيابة واديته النمرة والمفاجأة انه كلمنى بعد ساعة و قال لى خد البيانات بتاعت العربية : هو دلوقتى فيه مروريا شريف؟: يا حبيبى انا بجيب من المديرية على طول  : طيب يا عم الشبيح هات البيانات وكانت المفاجئة التانية ان العربية دى كانت باسم حمدى السيد ابو طالية . مين ابو طالية بقى؟ ده تاجر اكسسوار موبايلات فى شارع عبد العزيز انا كنت اعرفه عن طريق هانى بليه واحد كان بيشتغل معى فى المصنع ايام ما كام عندى مصنع  إيهىء . إيهىء .

ابو طالية ده كان عنده بترينة فيها شوية اكسيسوار موبايلات مرمى بيها على الرصيف من سنتين بس .

 وبكدة يبقى الموضوع وضح ... فيها بيعة اثار مشوار وكمل يلا... ربنا يباركله . بس انا عايز اعرف كان ليه الصاعق الكهربائى ؟؟

قولت لنفسى: ( بس هو ده كل اللى انت عايز تعرفه؟ يا ولا يا ..) لا يا سيدى والموزه كمان كانت جامدة وعايز اديها صاعقتين فى ..... راسها. 

مش عارف ليه انا حاسس انى داخل على موضوع كبير وانا مش اده بس داخل برضه؟ زى الحلم اللى كنت دايما وانا صغير بحلمه . كنت بحلم دايما انى داخل فى جحر زى جحر الارنب ضيق و طويل وداخل فيه مش عارف ليه ولكنى داخل برضه وحامل هم انى حرجع من نفس السكه برضه . طب داخل ليه ؟؟ انا عارف بقى ما انا بقولك حلم يا عم الحاج.

يعنى ميكروباص وعبيط ...

خدت بعضى ونزلت على شارع عبد العزيز وانا كلى احساس بالمغامرة والفضول عايز اشوف ابو طاليه عمل إيه بالثروة مع انى مش فضولى خالص . يعنى لو شفت حادثة بتحصل على الطريق لا يمكن اقف اتفرج و اشوف فيه إيه؟ فيه إيه؟؟؟ حادثة . حادثة . حاسب يا عم الاعمى . الله يخرب بيتك و بيت اللى رخصها لك . حتموت و حتموتنا معاك يا ابن العبيطه.

ميكروباص بيجرى بجنون زى العبيط على الدائرى يدوب انا مسكت الفرامل و ده عدى من يمينى زى التور الهايج . و لسه حشتم و اجيب سيرة الحاجة امه لاقيت ميكروباص تانى طاير وراه بس ده فيه ناس كتير و بندقية الى طالعة من الشباك اللى جنب السواق و فجاة . دفعة من الرشاش و فقعت كاوتشات الميكروباص الاولانى و عاديك يا عم الحاج طار الميكروباص الاولانى بالعرض و زحف ناحية الرصيف الفاصل بين الطريقين اللى رايح واللى جاى .

انكسرت العجلة الاماميه يمين بالطنبورة و المساعد و المشتملات كلها و مالت العربية من الناحية اليمين و بعيد عن السامعين اول ما اتخبطط فى الرصيف اليمين اتقلبت و طارت من على الكوبرى و نزلت زرع بصل على بيت تحت كوبرى على الدهئرى  . مش حقولكم بقى عدد العربيات اللى لبست فى بعض و اصوات الفرامل و الصويت كان اعلى من صويت ام نبيل . ام نبيل مين ؟؟  عرفت من الناس انها صاحبة البيت اللى الميكروباص رشق فى لامؤاخذة الزريبة بتاعتها و قتلها العجل الرضيع اللى عامله بتاع ست سبع تلاف جنيه و حمارة ابو نبيل الحامل و مكنة نبيل الصينى اللى كان راكنها :امام البيت و ما كمان ما خلصش لسه اقساطها . يعنى الخراب كان مستعجل على العيلة دى اظاهر ابو نبيل كان سايب الصلا ولا إيه ؟!.

ركنت اخد نفسى لان ركبى كانت بتخبط فى بعضها نزلت واخدت طفإيه الحريق اللى فى البيت ونزلت اجرى اشوف ممكن اساعد فى إيه . اتجمعت الناس طبعا كالعاده وماتعرفش طلعوا منين . اللى بيصور الحادثة بالموبايل واللى بيتفرج واللى بيسال اللى جنبه هو فيه إيه؟  واللى بيجرى زيى علشان يحاول يساعد .

الغريب بقى ان الميكروباص التانى اللى كان بيجرى ورا المنحوس اللى لبس فى الزريبة ولا مؤاخذة كمل على طول . اتفادى الكل و كمل طوالى و محدش عارف مين دول ولا حد خد باله . عشر دقائق و لاقيت بوكسين وعربية اتارى – عربية دورية شرطة – و بيتش باجى شرطة من الطريق المعاكس و تلت عربيات اسعاف من الجدهد الصفر دول و الدنيا اتقلبت .

لما لاقيت ان الناس ملمومة تحت و الكل عمال يقول: طلعوا الناس من العربية: يا ناس العربية حتولع: فيه واحد تانى فى العربية.

: حد رفيع يعدى و يطلعه: حاسب يا جدع العربية حتولع : يلا يلا يلا يا جدعان خدوا التلاتة على الاسعاف فيهم واحد لسه فيه النفس و زى الافلام الامريكانى اول ما خرج المصاب التالت ولع الميكروباص بس ما انفجرش.

وقفوا الناس يتفرجوا عليه و النار بتاكل فيه . ماهو ما فيش حد تحت معاه طفاية حريق كلنا وقفنا نتفرج على مشهد ماسوى كوميدى. العربية والعه و نبيل و امه واقفين مزهولين و الناس عاملين دهيرة بيتفرجوا و تلاقى صوت ابعدوا يا رجالة لحسن تنفجر فيكوا . و صوت تانى ربنا يعوض عليك يا نبيل . و اخر انت يا بت يا وردة ابعد يا بت الصرمة رايحه فين ؟؟ ومع ذالك دهئرة الناس كل شويه تضيق حول الميكروباص المولع . و بعدين انفجار .. هه هه هه .الناس تجرى فى كل اتجاه لتنفد بجلالها و يكتشفوا انها فردت كاوتش فيرجعوا تانى وتنفجر كاوتشه تانية يجروا تانى ومايحرموش يرجعوا تانى وفى تالت مرة طارت حته مولعة من الكاوتش المنفجر و نزلت على شجرة جزوارين جنب البيت من الناحية التانية وبقى البيت محاصر بالنار بس المطافى كانت وصلت وساعة وسيطرت على الحكإيه .

حلابسه على الكوبرى ...

 انا الحقيقة كنت تعبت من الوقفة و معادش ليها لزوم انى اقف فرحت راكب عربيتى و قررت اهدى اعصابى بشويه حلبسه (حمص الشام) من العربيات اللى بتبقى واقفة على الدائرى فوق الكوبرى فوق فرده من النيل اللى بين نزلة دار السلام ونزلة شارع البحر الاعظم . ما هو ده المتنفس بتاع محدودى الدخل وفقراء مصر والبقيه الباقية من الطبقة المتوسطة المتاكلة .

مشروع ميه ميه مُكون من عربية الحلبسة على كام كرسى بلاستيك واقعد يا باشا على النيل ( اقصد على الكوبرى ) اضرب حلبسة و ارغى و دردش و طبعا فيه بطاطا و ترمس و دوره مشوى فى الشتا و شاى و الحكإيه تمام  التمام .

 لاقيت مكان ركنت و نزلت اضرب واحد حمص ... اقوم اتكعبل عند بتاع الحمص فى مين ؟؟

الواد سالم بتاع تالتا رابع زميل الدراسة بمدرسة  مصر الجديدة الثانوية العسكرية بنين . : جلال الكبير؟ : سالم؟ يا ابن ال ..... ولاقيت معه واحد فبلعت باقى الكلام  .. كلنا عارفين انه فى فكر انه كُلما كانوا الاشخاص قريبين من بعض كُلما كانت الشتيمة اقوى.

: ايييه من كام سنة ؟؟ : من 30 سنة؟ : لا اقل شويه . اخبارك إيه يا معلم ؟ : تمام جاى تشرب حمص؟

: اه والواد السواق راح ينفخ العجل ومستنينه انا وحمدى بيه اه نسيت اعرفكم حمدى بيه من الادارة العامه لمباحث العاصمه.

سلمت على حمدى بيه . سلم و هو عاصر على نفسه لمونه فدلقته و بصيت لسالم .: انت اخبارك إيه ؟ : انت؟  الله ينتقم منك يا بعيد انت السبب فى اللى انا فيه ده دلوقتى . فابتسمت ابتسامه اقرب للبلاهة لانى مش فاهم ؟!!

فكمل كلامه : من اللى كنت بتعمله فينا انا والدُفعة فى المدرسة خالتنى دخلت شرطة! فقلت ضاحكا ..: طيب لما انت فى الشرطة ما خدتش العجلة تنفخها فى اى قسم ليه؟وضحكنا بس حمدى بيه بص الناحية التانية فعرفت النوعية بتاعنه.

ده من نوعية اللى كانوا بيضربوا المتظهرين تحت بند ان دى الاوامر و انا بأدى واجبى تجاه الوطن.

:  انا اتجوزت و عندى محمود و نهى واهى الدنيا سيقانه قدامها وانت إيه؟ عامل إيه؟

: انا كنت عاطل تقريبا من قبل الثورة بشويه و بعد الثورة اخدت لقب عاطل رسمى و معايا شهادة بكده كمان.

فضحك و قال : شهادة إيه؟ : شهادة الشهود يا باشا ضحكت وقال لى: انت رايح فين؟ : كنت رايح شارع عبد العزيز اشوف حاجة كده وحصلت الحادثه خلتنى عدلت الخطة وقلت اشرب حلبسة وارجع على البيت احسن : حادثت إيه ؟

حكيت له اللى حصل فقال لى : والميكروباص اللى كان بيجرى وراه ما وقفش ؟؟: لا و كان لونه إيه ؟؟ :ابيض! : كان فيه كام واحد فى الميكروباص؟؟ : مش عارف بالظبط !! : حواللى يعنى ؟؟ : فيه إيه يا عم سالم ؟؟ هو تحقيق ولا إيه ؟ : يعنى اه اصل الحادث ده فى دايرتى و انا مستنى العربية علشان اروح : حتروح ملكى كدة ؟؟ اه. اه. انت مباحث : رئيس مباحث يا باشا وضحك : الحقيقة انا كان نفسى اعرف إيه الحكاية : خلاص انا عازمك يا سيدى وهو اعرف منك انت شوفت إيه؟ ماشى؟ : ماشى لان الحقيقة كنت مخنوق من حبست البيت حاسب على الحلابسه.  : انا شرطة ما بدفعش  : لا يا حلو  الكلام ده قبل الثورة : انا عمرى ما عملتها قبل الثورة ولا بعدها بس علشان تبقى عارف الثورة لسه ما قامتش . كل الحرس القديم هو اللى بيدورها وكل الحكاية ان الراجل الكبير رجع لورا خطوتين بس و طلع شويه عيال ميس .. خيال ماته .. صورة .. برفان  شوف إيه من الاوصاف دى يركب مع دماغك و اختاره . يلا بينا العربية جت .

 دفع للراجل بتاع الحلابسه وركب البوكس هو و حمدى باشا الاتم  : ما تيجى معانا : ورا ولا قدام؟

ضحك وقال لى: قدام يا باشا طبعا العسكرى حيقعد ورا .. سيب عربيتك هنا و يبقى الواد عوض يجبهالك؟ وشاور على العسكرى.

: لا يا عم علشان وقت ما احب امشى  امشى : براحتك يا باشا . اطلع ورانا علشان احنا حنختصر الطريق يلا لف ورايا.

لفيت وراه لانه هو اللى كان سايق البوكس و حمدى بيه جنبه و العسكرى بتاعه  فى البوكس من ورا ورحنا واخدينها عكس الاتجاه هو مشغل النور والسرينة و انا طافى النور و وراه زى ضله  وعند مطلع للدائرى نزلنا احنا منه ومشينا من تحت و بعد شويه لاقيتنى جنب المطافى والاسعاف كانت مشيت والشرطة كتير و فيه كام رتبه واقفه .. وقفنى ظابط لانى داخل بعشم من غير لا احم ولا دستورفشاور له سالم قاله : مع سعادتك يا باشا طيب اتفضل اتفضل .

دخلت ركنت ورا البوكس  قفلت العربية و نزلت ورا سالم .. وقفنا نسمع من ظباط الدورية وعرفت ان اللى كانوا فى الميكروباص تلاته  اتنين بطريتهم فضيت و التالت حالته خطيرة و فى المستشفى محطوط على التونجر بيحاولوا يشحنوه . ده على فكرة مش كلامى ده كلام الدوريه الراكبه : الاتارى: و ان فيه شبهه جنائية .

دخلنا البيت لاقيناه عباره عن دورين بالاسمنت المسلح ماهو اصل ابو نبيل ونبيل كانوا فى ليبيا (اسطوات نقاشه )  الدور الاول ابو نبيل و ام نبيل والتانى نبيل وسميرة مراته وعيالهم سامح و سامى و سناء ... الليله كلها ليلت حرف السين ... قبيله سين .

الكوميدى بقى ان ابو نبيل الدغ فى حرف السين هو و ابنه بيقولوها شين مع التفتفه ولامؤاخذة .

جنب البيت فيه زريبه  من الطوب النى ودى كانت سكن ابو نبيل و عائلته قبل ما يسافروا هم الاتنين ليبيا . من داخل البيت فيه باب بيدخل على الزريبة و الجدار اللى فيه الباب منهار هو والباب ونص سقف الزريبة .. وستات كتيرة بتواسى ام نبيل وراجلين مع ابو نبيل ونبيل عرفت انهم خلان نبيل  سامح وسيدهم وولاد عم ابو نبيل مهو اصل ام نبيل تبقى بنت عم ابو نبيل برضك.

خرجنا على الزريبة لاقينا الجدران مسودة من الحريقه و ميه مغرقا الدنيا من المطافى طبعا وفيه حاجه متفحمة كده هى حيوان بس لا هى جثة حمار ولا جحش ولا حتى معزة ؟؟ حاجة كدة فى النص لاهى محصلة خروف ولا هى محصلة جحش ولا عجل صغير بس ثانيه واحدة انا لمحت حاجة كدة و انا داخل همم اه كدة انا فهمت ... دى صورة مارى جرجس على النتيجة اللى فى الصاله  يبقى ابو نبيل قبطى و تبقى دى جثة خنزير وكدة انا ممكن اشتغل مباحث او وكيل نيابة .. تمام!

قعدوا سالم بيه و حمدى بيه يلفوا فى المكان يكلموا ده ويقفوا مع ده وانا وقفت جنب امين شرطة كتيان شويه كان فى المكان لما وصلنا و سحب معايا كلام علشان يعرف انا مين : سعدتك مع سالم باشا فى الادارة ؟ اصل انا جديد فى الادارة  ..

جلال: لا مش فى الادارة مع سالم بيه. فذاد احترام الامين لى لان ده معناه انى اما من امن الدوله او من الامن العام . وسحبته انا من افكاره و سالته : حالته إيه الراجل اللى فى المستشفى ؟ : بايظ يا باشا بايظ خالص مش حيعيش لبكرة . عنده كسر فى الحوض و ضلوعه .. قاطعته بطريقة الظباط سائلا :عرفتوا عنه اى حاجة ؟اسمه ؟ ساكن فين ؟ بيشتغل إيه ؟ كان معاه بطاقة ؟ : لا يا باشا ممعهوش غير خمسين دولار و تلتمية و عشرين جنيه و الاتنين اللى ماتوا معهمش ولا مليم ولا بطاقات بس كل واحد فيهم كان معاة قرن . مطوه قرن غزال يعنى : اه . اه مفهوم .

جه سالم : يلا بينا . الولاد حيكملوا . (الولاد دول اللى هم الظباط اللى تحت ادارته ) : عرفتوا مين الناس دى و كانوا بيجروا من مين ؟؟ ضحك سالم : انت بتشتغل صحفى ولا إيه ؟

فضحكت : اصل الحادث كان امامى و عندى فضول اعرف إيه الحكاية؟ : بص هى شكلها عصابة واختلفت مع بعض لان اللى ماتوا و المصاب معهمش بطايق و اللى كانوا بيجروا وراهم ما وقفوش يبقوا خافوا يتلطوا فى الحكإيه فهربوا صح ولا إيه ؟ : وارد برضه بس ده حيتعرف من رقم العربية ممكن يديكم خيط برضه ولا إيه ؟؟ : ما الولاد بيعملوا كدة . ما تخفش احنا فى مصر مصنفين من احسن وزارات الدخلية فى العالم و الاولى فى العالم التالت و رجالة امن الدوله زمنهم عرفوا بس هم بييسيبونا نوصل لوحدنا ما بيقولولناش حاجة.

 : حتى مع الوزير الجديد؟ فرد : الجديد لسه ما شفناش نظامه و عموما فيه قواعد بتمشى عليها الداخلية حتى لو كان الوزير صينى.

: برضه!  صينى!  ضحكنا  ومشى كل واحد لعربيته على وعد اللقاء بكره فى مصر الجديدة . عشان اروح معه القسم اقول شهادتى .

روحت على البيت . حكيت لزوجتى كل اللى حصل .وبقول زوجتى لان مراتى بمعنى المراة بتاعتى تعنى ان زواجنا غير مكتمل . طالما خلفت منها يبقى اقول زوجتى (والله اعلم) واسالوا  فيها يا جدعان قبل ما تقولوا بطل فتى . اصلنا متعودين احنا الاتنين نقول كل حاجة لبعض.حلوة.وحشة. لازم نعرف بعض علشان ما يبقاش فيه نقطة ضعف فى العلاقة من الناحية دى . اصل انا حبيتها لدرجت انى اتجوزتها بعد ما اتعرفت عليها بشهرين . مجانين صح ؟

لا الحكاية انى كنت عارف انا عايز إيه وهى كمان فماخدناش وقت وقامت مخلفا لى خمس شمعات نوروا علي حياتى صحيح انى بصرخ و بزعق و احيانا بضرب بس خلى واحد يروح يبات عند جدته يومين  . من اول يوم  يجيلى عبط وابقى حاسس ان فيه حاجة نقصانى ده انا بحب ادخل اغطيهم بالليل و ابص عليهم و اتفرج على انجازاتى فى الحياة . دول اهم انجازاتى . اما زوجتى التنينة الام فدى المصدر الرئيسى للراحة و الانسجام و الحب فى البيت .

 تخيل لو مصادر نهر النيل تعكرت (لا سمح الله ) اكيد مياه النيل اللى حتوص لنا حتبقى متعكرة و حتعكر كل اللى حيشرب منها اسان و لا حيوان ولا نبات و لو صافية يبقى احنا حنشرب مياه صافية و الحياه حتبقى صافية .. الست او الزوجة فى البيت كدة لو رايقة و هادية و حنونه البيت يغمره السعادة و الراحة علشان كدة لازم الزوجة تكون مرتاحة علشان تريح البيت و الا .. انت حر يا عم الحاج . ادينى قلتلك اللى فيها و انت حر بقى . دور على المصدر و شوفه رايق ولا متعكر . المشكله ساعات كتير بيكون مصدر زوجتك عند حماتك و اصل كلمة حماتى : لا كفإيه بقى لاضرب . يعنى لو ما كنتش مصلح مع حماتك روح يبنى هتلها كيلو و نص بسبوسة بالبندق و نص بلح الشام لحماك علشان المصدر يروق كدة ويبقى فله شمعة منورة و عوضك على الله فى الخمسيناية اللى حترح فالبسبوسه و البلح – بلح الشام يعنى – غير كدة حتبقى حياتك بلح بس مش من الشام . ولا  من اليمن حيبقى من الدويقه يا حلو و اوحش ضرب الضرب العشوائى و ربنا يكفينا شر العشوائيات و تصبح على خير يا كبير .  

نزلت لما زوجتى (اقولكم .. مشوها مراتى . عامية اكتر . يا عم بلاش فزلكة) نزلت لما مراتى وصلت العيال و رجعت قلت اروح لسالم . سالم بيه . كلمته على انى اروح له الادارة . قالى انه حيكون هناك كمان ساعة قلت : يعنى ما عبال ما اوصله . ركبت عربيتى و قعد اللعب لعبة نمر السيارات .

الانتظــــــــــــــار ...

 وصلت الادارة سالت عليه وعرفت انه لسة ما جاش فكلمته فقالى انه فى الطريق و كلم احد الظباط و دخلنى مكتبه انتظره . المكتب شيك ومرتب . اصل سالم طول جلاله مرتب و نضيف ..جاء لى اليمون .. انا فى السكه والله .. قهوة . خلاصوالله انا فى الطرق بس معلش الطريق واقف . شاى بلبن . يا عم خلاص والله بركن العربية . كل شويه اكلمه و هو يسبتنى و يقعدنى و يبعت لى بتاع البوفيه ..

طول عمرى وانا بكره الانتظار  انتظار اى حاجة واى حد الدكتور فى العيادة .. مراتى عند الكوافير .. طابور العيش .. اى انظار من اى نوع وبالذات لو معاد ..  ابويا علمنى ان مواعيدى زى القطار احنا بنروح ننتظر القطار مش هو اللى بينتظرنا بس فين الكلام ده؟ الكلام ده عند ام لالو  طبعاً.

تحس وانت بتنتظر الحدث انه يحصل وكأن عمرك بيخلص ... تلاقى الساعة الرمليه طلعتلك فعنيك و كل ذرة رمل بتنزل من فوق لتحت تحس انها يوم من عمرك وقع تحت فى العمر الخلصن.

الانتظار بيفتح عليك هويس الافكار منها المفيد ومنها الى مش مفيد  ويدى لك سكك كتيرة تمشى فيها  منها الحلو ومنها الوحش او الخير والشر كله على حسب مدة الانتظار ومودك وانت منتظر والعوامل اللى حوليك .. يعنى مثلا لو قاعد فى تكييف والدنية برة حر موت وحواليك الجو رحته حلوة وقدامك مزة اكيد حالتك فى الانتظار حتبقى حلوة غير حالتى وانا قاعد ى مكتب من مكاتب الداخلية تحت المروحة والمجرمين والصولات والتحقيقات والحركات والضربات واللطمات.

 يعنى ممكن تسمعلك حتت مزيكة حلوة . تقرا لك كتاب يوسعلك نفوخك شويه . تضرب لك اتنين كبدة من على اى عربية .. وسكه تانية تقلبلك الدنيا نكد . على سبيل المثال مراتك عند الكوافير واتصلت بيك تقولك :انت فين؟ : انا مع واحد صحبى : طيب انا امامى عشر دقائق واخلص :OK حامشى دلوقت اجيلك..

وتروح مبرطع على الكوافير و تحاول تشغل نفسك باى حاجة. تنضف العربية. ترتب شنطة العربية. تتفرج على الناس. وتمر العشر دقائق و تعمل فيها جنتل وتسيب عشرة فوقهم  وبعد عشرين دقيقة تتصل بيها: انا برة بقالى 20 دقيقه فوق العشر دقائق بتاعة الطريق؟؟ خلاص يا حبيبى انا خلصت تقريبا. عشرة كمان. خلاص خلصت و حاحسب.. وبعد عشرة كمان.انا على الباب اهه وبعد عشرة تانى تكلمها ما تردش صمت وانت مش مصدق . تانى ..... مافيش حد صاحى!! وتيجى وتركب عاااادى خالص مما يوادى لظهور بوز واضح جده بس هى حتستهبل و تقولك. إيه رايك فى شعرى بص عملت مانيكيير و باديكيير هايلين مش كدة ؟ بوزك يزيد و يبقى زلومت فيل فتقولك خلاص بقى و يعنى كنت اعمل إيه ؟ هو انا اللى بعمل شعرى لنفسى ؟؟ انا رحت لاقيته زحمه و عنده عروسة باهلها و و و .. فاضل تقولى انه اتشل و كان بيسحف على ايديه و رجليه و هو بيعملها شعرها.

الموضوع كان ممكن يخلص فى sorry يا حبيبى انى اتاخر او.  ابن الجزمه الكوافير دة مش ريحاله تانى . يا ساتر ده صدهع .. صدعلى دماغى برغيه . معلش هو بطئى بس شاطر عشان كدة ديما زحمة. اى حاجة من السكة دى كان الموضوع خلص . اى حاجة تبرد نار الكلب اللى مستنى بقاله ساعة و تحلل علبة السجاير اللى اتحرقت و هو منتظر الشهبانو مراته. و يتقلب الموضوع عليه !! هى دلوقتى اللى زعلانة علشان ما سالتش على التسريحة بتاعتها . وقتلت فرحتها و شربت شوربتها و حرقت فرختها.

لك الله يا إيها الزوج المحنط فى الانتظار.

لك الله .

دخل عم سالم و وراه عشرة كل واحد عايزه فى حاجه : السلام عليكوا : وعليكم السلام يا سيدى ..: معلش معلش انا فعلا اتاخرت عليك بس غصب عنى . البوفيه جالك . : ايوه .: طب تشرب إيه . يابنى يدخل عسكرى المراسلة ولا البوفيه بتاع الباشا : تاخد قهوة معى : ماشى : اهوتك مظبوطة ؟ : لا زيادة مغليه : طب اعملنا اتنين زيادة واحدة بوش و التانيا مغلية : حاضر يا فندم : من البن بتاعى يا ابنى بسرعه : حاضر يا فندم .

خلص الناس اللى امامه و اقفل الباب و جلس على الكرسى التانى امام مكتبه : إيه باشا كل ده فين؟ سالم ضاحكا: حد يسال ظابط مباحث كنت فين ؟؟ ده لو مراتى قالتهالى ده انا ابهدل الدنيا و تبات .. مقاطعا: و تبات انت على الكنبة . فضحك جامد: جلال هو جلال مابيتغيرش ولو بعد خمسيب سنة : يا عم قاعد اشرب فى حاجات بقى لى ساعة ومش عايزنى اسالك؟ ده انت غريب يا عم سالم صحيح!

: يا سيدى العيل اللى كان فى حادث امبارح اللى كان فى المستشفى : ماله ؟ بطاريتو خلصت هو كمان ؟ : لا اختفى : اختفى؟ ازاى؟

: مش عارفين لسه هو اتخطف ولا هرب بس هو صعب يهرب لانه عندة كسر مضاعف فى دراعه اليمين و تجلطات دموية و سحجات فى حتت متفرقة فى جسمه المحضر بيقول كده : خربان يعنى : عموما ادينا حنعرف انت وراك إيه؟ : يا بنى انا جايلك مخصوص علشان انت قلت لى انك عايز منى الكلمتين اللى قلتهم اقولهم فى محضر  : طيب سيبك من المحضر دلوقتى و تعالى معايا انا رايح ابص بصة على مكان الحدثة تانى و اتكلم مع الناس شوية : تمام يا باشا  يلا بينا .

ركبنا عربيته الالفا روميو حقيقى موديل2009 بس شديدة .. اصل سالم ابن ناس قوى .. قعد يكلمنى على حياته و الظروف اللى بتمر بيها الداخلية دلوقتى و ان الاوامر بتيجى كتير شفوى للظباط و ان الرتب الكبيرة بتحمى نفسها كده علشان لو حاجة حصلت يلبسوا الظباط الصغيرين فقلت له : ايوه يا سالم بس الداخلية فيها عجن كتير و العشرة خمستاشر سنة اللى فاتوا على الاقل الظباط توحشوا و فلت العيار جامد وخلوا الشعب يكرهم زى ما بيكرهوا امريكا.

يا راجل ده انا اعرف بلاوى كتير: ايوه ايوه ماهو فى كل حته فيه الوحش و فيه الكويس.

: لا يا برنس انتم عندكم فيه الوحش و الوحش اوى : ليه ما عندك انا مثلا عمرى ما كنت كدة!

: يا برنس مش ممكن تكون ما ستغلتش منصبك فى اى حاجة! مراتك بتعمل بطاقة ولا رخصة حماتك عايزة تحجز عربية تبع الداخلية .. اخوك سمير مقدم على شقة تبع المحافظة او حتت ارض فى التجمع الخامس مايضرش يعنى الامر ما يسلمش : طب والله ما عملت حاجة من الكلام ده خالص.

: ماشى يا سان سالم : إيه سان سالم دى ؟؟؟ : خلاص يا عم القديس .

 ضحك و قال لى: انا يابنى بصرف على الشغل مش بكسب منه . انت عارف انا ابويا سايبلى اللى يكفينى و زيادة . ليه اعمل كدة ؟ :ايوه فيه كام واحد زيك يا معلم ؟؟ : والله فيه كتير و كتير اوى كمان : انت عارف يا عم سالم ان الحسنة تخص و السيئة تعم . يا سالم ظباط الدخلية او كتير منهم فرموا الشعب بشكل او باخر و انا عارف ان فيهم كتير زى ما بتقول كويسين بس مش باينين وسط الوحشين : لا هم مش قادرين يبانوا . الدخلية دلوقتى هى و رجالها ملطوطين جامد و الظباط المحترمين فيها هم اللى لازم ينضفوها من الفاسدين . العلاقة بين الشعب و الداخلية بقت عامله زى الست المطلقة اللى خايفة ترجع لجوزها ليرجع يضربها و يهنها تانى : علشان كدة لازم الداخلية تستحمل لان الست دى اقصد مصر اتبهدلت من الداخلية كتير . مع انى عارف فيها ناس كتير محترمين . : ماشى يا عم المحترم . حنكمل وحنا راجعين علشان وصلنا  ماشى ؟؟ .

دخلنا على البيت و لاقيت الميكروباص اتشال والسقف متطربق نصه تقريبا وباين من السقف الطريق الدائرى .

الضوء شاحب داخل الزريبة وابو نبيل وخال نبيل عم شيحه واقفين على جنب ونبيل قاعد مع امه على مدخل باب الزريبة اللى بيدخل على البيت جوه.

سالم بيلف فى المكان وابو نبيل بيساله اذا كانت الحكومة حتعوضه على اللى حصل لبيته ؟:ولا إيه يا باشا ؟؟ حيعوضونا بكام ؟؟

: ان شاء الله اكيد : مسكوا اللى كانوا السبب ولا لسه ؟ : هه . اه . ادينا بنعمل تحرياتنا وان شاء الله حنوصل للجانى.

 سالم بيرد عليه وهو بيدعبس فى المكان مش عارف على إيه؟؟ ومش مركز مع ابو نبيل خالص.

الراجل عمال يرغى وسالم مش بيرد.

دخل نعيم ابن خال نبيل  ما سلمش على حد دخل قال سلاموا عليكم جماعيه ردينا عليه و قعد على قرافيصه مجعمز جنب عمته وابن عمته بيتفرج شويه ولاحظ ان سالم مش مدى اهتمام لكلام ابو نبيل فقام مقرب من سالم وقال له: هو فيه إيه يا باشا؟

بصله سالم باستغراب!! فكمل: يعنى الراجل بيكلم حضرتك و حضرتك مديله ضهرك و مش سائل؟؟

هو حضرتك مستأل بينا يعنى ولا إيه؟ سالم مش مديله ودن ومطنش.

: يا باشا ... مهما كان ده برضك راجل كبير ومنضار فى ماله و عايز يطمن!

 بص له سالم ووشه اتقلب ....

: انت مين ؟ : انا نعيم ابن اخو ام نبيل : معاك بطاقة بقى يا سى نعيم ؟ : طبعا يا باشا اهى.

 ناوله الرقم القومى و هو مهزوز شويه .. بص فيها سالم و قاله : مالك بقى يا سى نعيم؟ انت إيه اللى جايبك هنا دلوقتى؟

جيت ادخل اهدى الموضوع  شاور لى سالم ... :  ثوانى يا باشا ثوانى ... سكت.

: إيه اللى جايبك هنا بقى قلت لى ؟ : انا جى ازور عمتى و اواسيه فى مصابهم (فيما اصابهم) واشوف جوز عمتى يلزمه اى خدمه.

: جوز عمتك يا سى نعيم  عمال يسالا عن التعويض بقاله ساعة ورديت عليه وهو بيلح وانا ما عنديش غير اللى قلته  عايزنى اعمل إيه؟

: معلش لينا رب : وانا كمان لي رب كلنا لينا رب كل المصريين ليهم رب فتدخلت ام نبيل  : اصل يا باشا من قرب السنة كده بقرت الحاج حامد ابو محمود اتسمت وكمل نعيم : ااه بس يومها البلد اتقلبت ونزل الامن المركزى عمل كردون والمدرعات والرُتب والحكومة كانت فى كل مكان فى البلد.

قلت فى سرى : كل ده علشان بقرة ؟؟ ليه هى بقرة سيدنا موسى؟

: وحضراتكم ما تأخذوناش جايين لوحدكم !! : مين قال كده يا عم نعيم؟ انا سايب رتل دبابات على الدائرى وفرقة النووى جإيه الصبح هم اتاخروا بس معلش علشان النووى بياخد وقت شويه .. خرجت منى ضحكة غصب عنى . فاتغاظ نعيم وبرطم بكلمتين سالم ما سمعهمش بس انا سمعتهم.

فقلت لنعيم : تعالى نشرب سيجارة بره .

 جزع نخله ميت ...

خرجت مع نعيم و قعدنا على جزع نخلة ميت جنب البيت و قلت له . : نعيم الكلام اللى انت قلته ده منين جايبه : قال بص يا باشا انا ليسانس ادآب قسم تاريخ يعنى مش جاهل ولا بقول كلام خطرفه.

بس الحال مبقاش يتسكت عليه و بعد الثورة يبقى حمار اللى يخاف او يسكت عن اللى واجعه والكل لازم يقول اللى جو جوفه : قول يا نعيم إيه اللى فى جوفك و تعبك ؟بحزن قال: انا عندى 27سنة و عيشت الزول و الهوان بس لانى نصرانى  مسيحى يعنى.

قلت: لا اله الا الله .. كمل يا نعيم :  وانا فى المدرسة كنت تلاقى المدرس بتاع العربى يقول فى حصة  الاسلامى يلا النصارة يروحوا مثلا للاستاذ جورج بتاع الموسيقى علشان دلوقتى حصة  الاسلامى وفى البيت .

خمس مرات الادان يدن فى المكروفون اللى فى الجامع اللى ورانا ويقيم الصلا والصلا نفسها يصليها فى المكروفون وكانه بيصلى عندنا فى الصاله. وفى الشغل اشغال معينة اللى ممكن المسيحيين يشتغلوها و فى الحكومة .

الوزارات صاحبة القرار او السيادية زى ما بيقولوا يمسكها المسلمين بس . وفى اعيادنا اخيرا بقت اجازة رسميه و مش كلها واتفجرنا اهه فى كنيسة القديسين فى اسكندرية يعنى هو لازم يكون اسمى محمد علشان ابقى مصرى و ليه حقوق المصريين؟ ولا إيه؟؟

بصيت له وحسيت انى عايز اطبطب عليه وأواسيه على اللى مر بيه وقلت :  يا نعيم لو بصيت لبلد زى ايطاليا او انجلترا حتلاقى برضه ده حال المسلمين هناك من ناحية ان كل الدوله متجه للمسيحيين.

مهرجانات و احتفالات واعياد و كنايس و قداس.

طريقة المعيشة مسيحية بالكامل يعنى هى ايطاليا ما فيهاش طليان مسلمين؟؟ فيها طبعا بس الدوله ما بتديش المسلمين الاجازات بتاعتهم فى الاعياد مثلا والطلبة المسلمين فى حصة الدين ما بيلاقوش حتى فى المدرسه استاذ احمد ولا محمد يروحوا له علشان يديهم حصة الدين الاسلامى .

واكتر من كده كمان انه بتتعرض الجاليات الاسلامية لحملات تبشيرية مسيحيه ومطاردات علشان يسمعوا إيه الحكإيه غصب عنهم!  المسلمين فى اوروبا برضه عندهم حكاياتهم ومشاكلهم وفى الوزارات عندهم لو فيه مواطن ايطالى بس مسلم ما بيدخلش المناصب العليا.

 ومش لازم ننسى برضه ان التعصب والتطرف موجود فى الناحيتين .. مسلم ومسيحى .. وبعدين يا عم ده المسلمين بيحسدكوا على اللى انتم فيه ... ضحك نعيم وقال: بيحسدونا على إيه بس يا باشا؟ : اه بيحسدوكوا لو اى واحد مسلم كلم اى واحد مسيحى على طول امن الدوله يتدخل ويقولك مش عايزين فتنة طائفية والكنايس كلها عليها حراسة ولو ادموا على هجرة وبالذات لامريكا تلاقى من كل عشرة مصريين اتاخدوا 9 مسيحيين وكل شويه كنايس المهجر تقولك اقباط مصر مضطهدين وامن الدوله بينفخهم ... يا عم نعيم امن الدوله كان بينفخ الشعب المصرى مسلم و مسيحى بكل طوايفه لانهم مصريين مش علشان  : باشا هو مش حضرتك ظابط برضك؟

بحزم: انا العقيد سليمان خاطر مدير ادارة الارهاب الدينى وتتبع النشاط السياسى المسيحى فى امن الدوله العليا ومجلس الدوله.

لاقيت الواد عنيه رغرغه بالدموع وعجز عن الكلام وقام من جنبى بشويش وقال لى : يا باشا كل بلد فيها الكويس وفيها الوحش وانا يا باشا كل اللى قلته ده بس لانى زعلان على عمتى وجوزها وصعبان علي الخراب اللى حصلهم .. يا باشا انا اقصد اقول ان كل كلامى اللى فات .....قاطعته بحزم : اتسجل ... فجحظت عنين نعيم لبره و قال لى : اتسجل علي أأأأ يعنى .... : لالا طبعا انت كنت على الهوا يا استاذ نعيم صوت وصورة .. ستاليت.

هو انت فاكر الداخلية لسه زى ايام العسس و البصاصين يا استاذ التاريخ ولا إيه؟

رجع نعيم خطوتين لورا فصعب علي وماادرتش احبس الضحك وقلت : يا ابنى انا بهزر معاك . مافيش تسجيل ولا حاجه ... امال فين الكلام الكبير عن الثورة وبعد الثورة   ما تخليش حاجة فى جوفك والكلام الجامد ده.

 فبتسم و هو خايف برضه اكون بضحك عليه وقال لى.: يا باشا احنا ناس غلابه و مش حمل بهدلة .

: يا نعيم خلينى اقولك الكلام اللى بجد ..

 مصر بلد كبير وعلشان كدة دايما محطوطه فى دماغ العالم من ايام الفراعنة . وكل ما يحسوا انهم حيفلسوا ييجوا على مصر يملوا جيوبهم وكل فترة تيجى امبراطورية او دوله عظمى تقول لنفسها طب ما ادخل و اسيطر عليها انا لوحدى . و ماحدش بيادر عليها . عارف ليه؟

: علشان دى مصر المحروسه : انت قلتها مصر المحروسه .. المحروسه باهلها . المحروسه من ربنا و شعبها  خير اجناد الارض  وعلى فكرة لما اتقال كده ما اتقالش مسلمين مصر . فاهم ؟؟ : يا باشا انا عارف كل ده بس اللى بيحصلنا هو اللى بيخلى الواحد منا يتكلم . بس اى واحد بره مصر بيلسن علينا هنا .نقطعله لسانه . احنا مصريين فبعض . ماحدش غريب يدخل بينا مهما حصل بينا .

: هو ده الكلام يا نعيم . مصر مليانة خير و بقالهم الاف السنين بيحولوا يخلصوا الخير اللى فيها مش عارفين . عارف ليه يا نعيم ؟علشان احنا يا نعيم الثروة الحقيقية بتاعت مصر . احنا المصريين .

:ايوه . طبعا . بس احنا محتاجين ان البلد تهتم بينا شويه.

: تانى . تهتم بالمصريين كلهم يا ابنى . انت مصرى و انا مصرى ملهوش دعوه  بالوطن.

ايوه يا باشا ما انا اقصد بينا يعنى الشعب . المصريين .

: ما انت لو جيت تبص على مصر حتلاقيها مجموعات مختلفة اهل المدن والسواحلية والفلاحين والصعيدة والاعراب والبدو والنوبيين ده غير اقليات اصلا يونانيين وفرنسيين وطاليان وارمن وغاجر واتراك واكراد وشراكسة والبان اللى كان منهم محمد على باشا الكبير وعيلته . ومع ذالك ماحناش زى تركيا مثلا . عندهم مشاكل لان فيها ناس مختلفة اتراك و شراكسه و اكراد ودهيما فيه مشاكل بنهم .انا مش بديك درس فى التاريخ انت مدرس تاريخ .بس بنبهك او بفكرك.

 رن الموبايل بتاعى اخدته وبعدت شويه لاقتها مراتى بتشوفنى فين وبعمل إيه  بتشيك عليا يعنى . وده كويس بالنسبه لى . و برضه انا اعرف اخبارها و اخبار البيت إيه خمس ولاد فى عين العدوا مش سهله تربيتهم برضه وبعد ما كان فيه بيبى سيتر دلواقتى ما فيش غير ماما سيتر وبابا سيتر و خلصت المكالمه و رجعت لنعيم .

: تعرف يا نعيم . انا ابويا الله يرحمه مرة قالى زمان ان الصهاينة هم اللى طلعوا موضوع النكت على الصعايدة  علشان يحصل انقسام بين طوايف الشعب . او على الاقل كانوا بيشعللوها اكتر . طب معلش يا نعيم انا اكبر منك شويه و عايز اديك درس جغرافيا . المادة دى فى التعليم ماحدش بيهتم بيها خالص مع ان الدول المتادمة بتهتم بيها جده لانها السبب دهيما فى قيام الحروب بين الدول .

: يا باشا انا بقرا جرايد و عارف ان فيه مخطط امريكانى علشان يقسموا الشرق الاوسط ومن ضمنه مصر عايزين يقسموها ارع حتت .

: يبقى لازم ناخد بلنا من اهمائةنا بالنسبه للعالم . احنا بلد على راى اللى قال بلد واخدة نصيه و على بحرين وفيها   قناة السويس و بترول ومعادن و سياحة و و و . يعنى من الاخر موزه جامده .

: واى موزا يا باشا ده كفإيه خفة دمنا بس . انا عارف اننا اخف دم فى الكوره كلها .اقصد الكره الارضيه .

: علشان كدة الكل طمعان فينا . و احنا لازم ناخد بالنا من ده .و ناخد بالنا من اللى فى ادينا ومش دهريين بقيمته  يعنى ممكن تقولى امتى كان عندنا فيه حاجه اسمها مسلم و مسيحى ؟ اسال ابوك او جدك . جلال ما كان فى مصر فروق بين المصريين . ايام الملك مثلا كان المصريين المسلمين و المصريين المسيحيين و المصريين اليهود كلهم عايشين عادى جده  . طب فاكر افلام زمان. كان فيه فاطمه و ماريكا و راشيل : وعملو ا كمان حسن و مرقص و كوهين ..

: يبقى يا ريت ما نسبش الموضوع كله ونمسك ان فى اسم الفيلم حسن مكتوب قبل مرقص .انما المهم هو اننا نشوف العلاقة ما بين التلاته و بعض كانت عامله ازاى .

عم ابليــــس ...

صوت سالم من خلفنا: يا جلال بيه ... إيه يا جلال بيه انت قاعد هنا و انا بدور عليك ؟؟

: لا يا باشا انا كنت عايز اشرب سجارة وقعدت فى التراوه مع نعيم نرغى شويه عن الثورة انت خلصت يا باشا.

: اه . بس عايز اسال نعيم كان موجود ساعة ما حصلت الحدثه ؟ : لا يا باشا انا كنت فى القهوة و عندى شهود .

: بالراحه علينا يا عم نعيم انت مالك مشدود كدة ؟ شهود إيه؟ هى جريمة سرقة ولا قتل؟ انا بسالك بشكل عادى لو كلمتك رسمى كنت اكيد زعلت . فك كدة واتكلم كويس : يا باشا انا ما غلطش انا بقول انى كنت فى القهوة و الناس شافونى موجود : طيب طيب . يلا بينا يا جلال بيه :على فين ؟ : حنروح الادارة وبعدين نروح ناكولنا لقمة بقى فاى حته.

: يلا .. سلام يا عم نعيم :سلام يا نعيم حشوفك تانى اكيد .

: ان شاء الله يا باشا .. مع السلامه يا باشاوات .

رحنا الادارة و بعدين رحنا ناكل عند البرنس فى امبابه . ضربنا طاجن اللحمه بالخضار الجبار  وحبسنا ب السفن وقلنا نشيش بقى فى قهوة من قهاوى الحسين .. ماهوا سالم اللى شايل الليله بقى.

قعدنى سالم فى قهوة متداريه شويه بس حلوه  وواضح انه زبون هناك او تقريبا صاحبها حبيبه.

قعدنا وجت القهوة و انا اخدت شيشه كريز و هو معسل سالوم و بدأ الحكإيه اللى كان مأجلها لغايت ما ناعد .

: يا سيدى ملا انت الحدثة دى اصلها إيه ؟ : هاه إيه ؟ نفس شيشة ... : خلص يا عم سالم إيه الحكإيه ؟

: الميكروباص اللى خيش ده مسروق من التبين من تلت ايام .من عرب ابو صنارة . واللى سارقه معروف و صاحب الميكروباص معروف و ما بلغش عنه . نفس شيشه  انا باصص له باهتمام  وبزهق : ليه ؟ ليه يا كلومبو ؟؟

: لانهم قبيله واحدة  صاحب العربية والحرامى والواد سرقه و طفش  فكانوا بيحلوها مع نفسهم  بعيد عن الداخلية يعنى علشان القلق  لان القبيله دى مشهورة  بالتهريب .. نفس شيشه  وقلت والاهتمام راح : طيب لما الحكإيه معروفة كده انت رحت للناس دى ليه تانى ومش بشكل رسمى .

نفس شيشه طويل وبصلى بخباثه :  تعجبنى .. انا رحت لسببين الولانى انى اشوف اى دليل يدل على الواد اللى سرق علشان ابقى ليه نفوز على القبيلة دى و يبقى معى الدليل وما اظهروش الا فى الوقت المناسب :  تكسر عنيهم يعنى : اسم الله عليك .. والسبب التانى انى شوفت فى الزريبه مكان ردم جديد  وده شككنى فى انهم كانوا .. فقاطعته ورجعتلى الاحيويه : بيحفروا . بينقبوا على الاثار : هو ده جلال بتاع زمان  الله عليك

يا صديقى كدة انت صاحى معى : و انت عايز تظبطهم ولا تظبطهم ؟

: حقول لك ...  اللى بيقولك ان من سنة جاموسه الحاج حامد اتسمت و الدنيا اتقلبت .. الجاموسه ما تسمتش ولا حاجة ده الجاموسه كانت فى الزريبه و كان عم حامد بيحفر فيها هو و ولاده و ولاد اخوه ولاقوا باب فعملوا خرم صغير وجريوا خرجوا  صحيت الولية ونسوان ولادها لاقوا الجموسه ميته .

ول ولت الوليه مرات حامد هى ومراتات عيالها وفضحوا الدنيا علشان كدة الدنيا ولعت والرتب نزلت ... فى نفس اليوم والموضوع اتكتم على الموضوع وعرفت بعد كده ان اسم من الاسماء اللى بتتحاكم دلوقتى اتفقت مع حامد واتسوت الحكإيه و حامد بعياله وعيال اخوه اختفوا .

قبل الثورة عرفت انهم بنوا فى عين شمس وقاعدين هناك .

: برضه ما ردتش على سؤالى انت بقى يا عم سالم عايز تبقى الرتبه اللى حتظبط مع ابو نبيل؟ ولا حتسلمهم ؟ : لا طبعا ؟ حسلمهم.

: لا ليه يا كبير ؟؟  ما تخلينا نقب على وش الدنيا !!: نقب ؟؟؟ : طبعا. ما انا فيها يا اولع فيها .

 ضحكنا . سكتنا شويه وبعدين قلت : اذا الموضوع ده ماشى وانت اتاكدت انا عارفك صح؟ اقول لك استقيل من الداخلية علشان شرفك العسكرى يا عم سالم ..  وربنا امر بالستر يا معلم  وعيش وخلينى اعيش .

: لا  لا يا راجل انت ... انت بتقول إيه؟ :  بقول يابنى اسمع منى ما فيش احسن من القرش فى الحياة الفلوس بتعملك كل حاجة كان نفسك تعملها .

: انت طلعتلى منين ؟ : انت اللى طلعتلى عند بتاع الحلبسة . انت و الحلو اللى كان معاك  : مين ؟؟ حمدى ؟

: اه .. زفت . عم حمدى الاتم.

: اهو حمدى ده انا متاكد انه مخلص مصلحه بس عرف يغطى نفسه  : مش بقولك انا عيب عليك : اصله كان فى موضوع الحاج حامد برضه .

: يبقى يا كبير هو نطلك فى الموضوع لانه عارف ان المنطقة دى عايمه على اثار .سالم: اقولك .انا حانكش معاه الموضوع . هو برضه عنه خبرة . صح ؟

: لا لا يا معلم انا عارف كل حاجة عن الموضوع و حظبطك . و على فكرة كل اللى بيجروا فى المشاوير بتاعت الاثار قالولى ان البيع بيتم بالاتفاق مع الدهخليه و الجيش . بس الكلام ده كان قبل الثورة و معرفش بعد الثورة الحكإيه ماشية ازاى ؟؟ بس اادر اعرف برضه .

سرح سالم مع الشيشه . و جلال حب يدغدغ الحديد وهو مولع ...

: على فكرة لو ضورت حتلاقى ان الاثار كانت بتتباع عادى جده فى مصر حتى بعد ثورة يوليو . يعنى احنا ما بنسرقش . ماهوا لو الحكومة كانت بتعوض صاحب المكان تعويض صح كانت الناس جابت الحكومة على طول . يعنى لو الخواجات حيدفعوا خمسين مليون دولار . الحكومة تدفع خمسة . انما ياخدوا المكان و يقولوا لصاحبه شكرا ؟؟ إيه النصب ده؟ : خلللللاص ... عنيه برقت ودماغه ظنهرت والابتسامه على وشه عبيطه .

: بقى ربنا بعت للراجل ولا الست صحاب المكان هديه . عطيه . هبه.. ايما يكون المسمى . تقوم الحكومة واخدة الحاجة و تقوله احمد ربنا اننا مش حنحبسك ؟ هو فيه كده ؟ طب اهو دلوقتى كل مصر بتفحت و الخواجات عماله تشيل و انا متاكد ان كل ده بعلم الحكومه . مين المستفيد ؟؟

: الكبار طبعا .. : اديك انت اللى قلت . يا عم الحكومه عافه بس بتعمل زى ابوك كان عارف انك بتدخن بس بيلعبها عبيطه : الله يرحمه.

: وبعدين يا عم الحاج احنا عندنا مخازن اثار بالهبل . لما يبقوا يعملوا لها متاحف و يحتاجوا نبقى ساعتها نديهم اللى بنلاقيه . ده انا سمعت ان تلتين اللى فى المتحف مضروب و بعلم الحكومة؟  : انا سمعت كده برضه .

: طيب يا راجل بقى .. كفايانا مرمطه .. ده انت ابوك سيبلك ومانتاش عارف تعيش . امال اللى ما عندوش يعمل إيه؟

: انا ممكن اطلع من الفلوس دى للخير برضه . مش كده ؟

: طبعا ياعم سالم . العرف فى الحكاية دة انك بتطلع 20% من فلوسك لله . لليتامى و المساكين و معهد القلب و السرطان و المستشفيات و تعمل صدقة جاريه . يعنى الخير بيعم برضه : ممكن اعمل جمعيه خيريه لمصابى الثورة مثلا .

: طبعا ممكن مش تقولى اصل و فصل  يا عم بلاش الكلام البلح ده و خلينا نشوف لنا يومين سالم فاق من الغيبوبه و قال بصوت عالى.

:خلاص . خلاص يا عم ابليس : لا ولا . انت امتى طلعلك طبق النور اللى فوق راسك ده . انا جلال يلا . ولا اقولك سان سالم؟

: طبق إيه ؟ : صحصح يا عم الاديس . احنا مع بعض من زمان . انت اللى يدور عليك يلاقيك مدورها جامد .

: والله انا اغلب من الغلب : ماشى يلا بينا نتكل بقى : يلا بينا .

نزلنى سالم عند عربيتى على اساس اننا حنتكلم فى الموضوع ده تانى بس لما يقلبه فى دماغه . و انا متاكد انه متخمر تمام فى دماغه .

اخدت عربيتى و طلعت على الطريق للبيت رن الموبايل و لاقيت نمرة غريبة وانا ما بردش على النمر الغريبة مؤخرا بسبب الديون.

بس بحركه لا اراديه رديت لاقيت صوت موزه جامد بس معرفوش  لا والله ما عرفوش  انتوا ليه فاكرنى خايف ان فريدة مراتى تقرا الكلام ده ؟؟ اولا فريده قالتلى صاحب بس ما تتجوزش  وبعد الثورة بقت اتجوز واحده غنيه تصرف علينا  يعنى انا لو معإيه فلوس انام على السرير مافيش الفلوس تبقى الكنبه اقرب لك من صدر امك ..  لا  لا طبعا هى لسه بتحبنى انا بس بحب اهرج  عليها .