الترنج اتـقـطع
...
رن الموبايل
لاقيته الواد الهامى ...
تخيلوا انا اعرف
واحد اسمه الهامى؟!
الحقيقة هو اسم
جدة .. هو اسمه محمد فكرى الهامى و لان المحمدات كتيرة بنقولوه الهامى على طول.
الو : ايوه
يا ابنى ... إيه الاخبار ... انا الحمد لله ... تانى ؟! انا عند امى ... طيب جي لك .. سلام .
الهامى متجوز
و عنده ولدين وبنت ومختلف مع مراته كالعادة ... قلت اروح اشوف فيه إيه؟ رحت الكوربة
.
انا اصلا من
سكان مصر الجديدة وكل سكان مصر الجديدة بيحبوا الكوربة ... مع ان اسمها وحش .. . كوربه!! يعنى محنه ... بس الكوربه ليها ستايل و محلاتها لها خصوصية وليها
مكان فى قلب شعب مصر الجديدة.
انتظرت الهامى
على قهوة السويس واسمها كده علشان بنركب البيجو بتاع السويس من عليها.
طلبت القهوة
الزيادة المغلية وشيشة كريز وانجعصت على الكرسى مستنى عم الهامى .. انا ما بشربش
شيشة بقالى فترة علشان مضرة اكتر من السجائر بس يعنى حجر كدة كل فترة ماشى الحال.
تصدقوا ان القهوة
دى كانت من ضمن المشروعات اللى كان نفسى اعملها انا واصحابى ايام ثانوى!
كنت شايف انها
شوية شاى وبن وسكر وسلام كبير لتجار الميه السخنة بس الحقيقة اكتشفت بعد كدة انه لا
الموضوع اكبر من شوية شاى و كبإيه مياه يعنى ازاى تقدم المشروبات و تنوعها والوصنعية
والصنيعيه لانها ممكن تبقى قهوة وممكن تبقى قهوة بلدى او كافيه او صالون ثقافى حتى
.. ولو ان الدنيا بقت هيصة دلوقتى وكل
واحد خد محل وفرشه كراسى وتربيظات وكتب عليه كافيه .. ليه بقى؟
لانه كتب
اليفطة بالانجليزى وبقى بيعمل كابتشينوا ونسكافيه من البواكى الجاهزة واخد تلاجة
ولا اتنين من شركات الحاجات الساقعة وبقت القهوة اسمها كافيه زى البقال بقى سوبر
ماركت و لو كبير شوية يبقى هايبر ماركت.
كان فيه
عندنا فى روكسى قهوة كانت زى منتدى ثقافى وكانت الوحيده فى مصر الجديدة اللى فيها
شيشة تمباك .
(التمباك ده نوع من انواع الدخان وحجر بياخد ساعات
علشان يخلص) افتكر كان اسمها النادى الثقافى بس لان موقعها كان مميز باعها صاحبها وبقت
محل ملابس جاهزة دلوقتى.
تخيلوا فيه كام قهوة و كافيه فى مصر الجديدة؟ يمكن
الف قهوة مثلا .. اه والله مصرالجديدة مليانة
قهاوى وكافيهات وانا اكتر واحد ممكن احكى لكم عن القهاوى لانى قضيت اعدادى وثانوى
فى القهاوى ومحترف طاوله وكوتشينة ودومينو وشطرانج.
يااااه اما كانت
ايام.
كنت بلعب طاوله
على قهوة اسمها قهوة عبده الصعيدى جنب بيت ابوية وفى يوم كان حظى عالى جداً لدرجة انى
غلبت كل اللى فى القهوة .. كل اللى فى القهوة مش صيغة مبالغة لا والله كل اللى فى القهوة
بما فيهم الباشمهندس اللى هو الكبير بتاع القهوة فى الطاوله ..
تصوروا إيه اللى
حصل؟
بعتوا جابوا
لى الكبير بتاع قهوة ابو شنب الحاج هارون .. عم هارون ده راجل عجوز بشنب ابيض يقف عليه
الصقر ومحترف طاولة من النوعية اللى بيقولك حجيب مثلا (شيش بيش) يعنى خمسة ستة و
يجيبه فعلا.
بس يومها
برضه يومها اتغلب .. يا ناس بيقولوا ادينى حظ وارمينى البحر وقيراط حظ ولا فدان شطارة
... بس مين يفهم بقى.
حتى اصحابى اتغاظوا
من حظى يومها بس اعمل إيه؟
فجاة خبط حد
على كتفى بشدة وانا قاعد شارد مع الشيشة الكريز فأتخضيت ولفيت بسرعة وانا بقف
وبقول : إيه يا ابن ال ....
ووقفت باقى الكلمة
فى حلقى لانى لاقيت مين ابن ال.... ده؟
ده الفنان مدحت
الفرماوى صاحبى من 15 سنة .. مدحت صديق دراسة بس مش فى المدرسة .. كنت باخد كورس
انجليزى فى البرتش كاونسل ايام ما كنت بقوى الغة وبقينا اصحاب .. هو رسام كاريكاتير
فى مجلة صباح الخير .. رسام هايل بس حظه قليل او مش عارف مش سلكة معاه الدنيا .. يختفى ويظهر كل فترة بس دائماً الدنيا مخبطة
معاه .
سلمت عليه واخدنا
بعض بالحضن وقعدنا ... سالته عن مراته؟ هى
رسامة برضه بس هى ربنا كرمها فى مجلة خليجى بتعمل لهم الart work بتاع المجلة وكل فترة تعملها
معرض رسم .. يعنى للتواجد و بس وغالباً بيروحوا الاصدقاء يجاملوا ويشتروا اللوحات
اللى ما فيش عليها اقبال .. من باب
المساعدة .. ولانها ما بتبعش لوحات كتير يدوبك
ما بتجبش غير تكاليف المعرض ويفضل قرشين
تتعشى بيها هى وجوزها فى مطعم تيك اواى احتفالاً بالمعرض.
بادرنى الفرماوى
: نبيلة عندها معرض الاربع الجاى ان شاء
الله فى مركز المعارض فى الزمالك والوزير حيفتتحه .. ما تيجى والله حتنبسط نبيلة جدا
لو جيت خصوصاً انكم مش حتشتروا المرة دى اى لوحات
: يا راجل ايه الكلام ده؟
: لا اصل
اللوحات كلها حتتباع لرجل اعمال عامل شركة جديدة وعاجبه رسم نبيلة وحيحطهم فى
الفروع.
فضحكت وقلت : الف الف مبروك يا فرماوى .. ححاول اجى والله حظبط مع
فريدة وان شاء الله حنيجى نبارك ونحتفل بس انت بارك لبلبل .
: يوصل ان
شاء الله .. الا قول لى هم بقوا كام دلوقتى؟ : هم مين؟ : ولادك! : اه بقوا خمسة فى عين العدو : بسم الله ما شاء الله : و انت؟
: هو احمد واستكفيت
: يا راجل ؟ يا ابنى انت دخلت الاربعين
حتخلف امتى؟ : يا عم انت
ربنا يديك الصحة انا بصرف على احمد ابنى بالعافية
اكل وشرب ولبس ومدرسه ويونيفورم ودروس احنا ربنا يعينا عليه بس ..احنا عايشين
بمرتب نبيلة يا عم جلال وانا بشتغل بالقطعة مترجم اسبانى ... و كل فين وفين ما بييجى
شغل : ايوه بس العيال عزوة وسند برضه : ما فيش وقت يا ابنى نبيلة بتشتغل بعد الضهر
فى المجلة و الصبح معيدة فى الكلية و اهى ماشية .. انت اخبار شغلك إيه؟
اقول الحق ما
بقتش عارف اقول له إيه؟ اقول له ان حالى كويس طيب و لو كان محتاج سلفة؟ فى الحالة
دى شكلى حيبقى وحش قوى.
ولو قلت انى
مفلس وما فيش شغل حيبقى شكلى وحش برضه وحيقعد يقولى ما انت رحت خلفت لى خمس عيال واشتغلت
حر وانا طول عمرى بقولك ان لازم يكون فيه دخل حد فيكوا ثابت و.... مش حاخلص بقى.
الحقيقة
وانا بكلمه على الخلفة والعيال مش عارف انا كنت بنصحه ولا عايزه يتورط زى ما انا
متورط ؟ ولو انى انا بطبيعة شخصيتى مش حاسس انها ورطة او مش مصدق انها ورطة بس
احساسى انى بعمل بطولة فى حياتى انى اعدى بخمس اولاد بر الامان ان شاء الله
بيخلينى فخور بنفسى وبفريدة مراتى.
قطع على افكارى وصول الهامى و نجدنى من الرد على
سؤال الفرماوى ده.
دخل الهامى سلم
وسحب كرسى وقعد .. طلبوا الاتنين قهوة
مانو (فوق المظبوط يعنى) عرفتهم ببعض وقمت دخلت الحمام علشان يتغير الحديث لانى
حسيت ان فرماوى حيعيد السؤال تانى .. غبت لى بتاع عشر دقائق ورجعت لاقيتهم بيتكلموا
عن البرصة واللى حصلها والانهيار والاسعار فحمدت ربنا انة نسى.
مرت ساعة والفرماوى
قاعد يتكلم على سلبيات الثورة والعيشة واللى عايشنها واللى عايزين يعيشوها وعم الهامى
بيجاريه بس عايز يتكلم فى موضوعه اللى جى يفضفض بيه والتانى قاعد بيرغى وطالبه معاه
رغى.
اخيراً قام
بعد ما عزم الهامى على المعرض بتاع نبيلة مراته وطلع خمسة جنيه حطها لى فى يدى وقال:
ابقى حاسب لى بقى اخدت قهوة ومياه .. لازم تيجوا .. يلا سلام وفرصة سعيده يا
استاذ الهامى .. حطيت الفلوس فى
جيبه وقلت له :
اتلم يا واد
انت .. انجر امشى.. سلم على نبيلة : يوصل
ان شاء الله يا عم الشاهبندر ....ومشى .
اصحابى
مسمينى شاهبندر التجار لانى مسرف طول عمرى وبحب اعزم وبقلب .. هممممم ايام ما كان
فيه فلوس!!!
التفت لالهامى
وقلت: ها يا عم الهامى إيه بقى؟ هى زينب
دى مش برضه حبك الكبير يا عم الحاج و لا بقت حد تانى؟
قام ساحب
نفس عميق من الشيشة و طلعه مع تنهيدة مع كح كح كح وبص لى وفى عينه حسرة : بقت همى الكبير ...الثورة بينتها لى يا عم جلال وظهرتها
لى على حقيقتها .. دى عايشة معايا علشان ما عندهاش حتة تانية تروحها. : يا عم بقى! : هى قالتلى كدة تخيل؟
بنت ال... ولا بلاش اديها حسنات على قفايه : طب قولى إيه الحكاية المرة دى؟
سرح تانى وشد
نفس تانى من التفاحة وقال: الفلوس يا سيدى ... الفلوس .. الله يخرب بيت الفلوس والجيران
فى يوم واحد!
: يا عم ما
تخلص وتقول؟ : شوف يا سيدى .. نزلت الست
زينب تودى الواد حسن ابنى للمدرسة وتتكل تروح شغلها فى المستشفى زى كل يوم يقوم الواد حمدى ابن الجيران اللى مع حسن فى المدرسة
اللى ينشك فمعاميعه يغيظ حسن ابنى بالترنج الجديد اللى رايح بيه المدرسة هو والشوز
الاديدس اللى باعتهم له ابوه من قطر يا سيدى : ها وبعدين؟
: ولا
قابلين .. حسن ابنى اتغاظ وزقه كفاه على التاكسى بتاع عم شلبى وقعه على الارض بعد ما كسر مراية الراجل وبنطلون الترنج اتقطع
ضبة و مفتاح : يا خبر!!
: لسه .. تقوم
الست ام الواد حمدى تردح للست زينب ام حسن وبنت عم زفت شلبى تردح هى راخرة علشان المراية
اللى اتكسرت.
انا الصراحة
تخيلت المنظر ولانى عارف الحته بتاعته والاشخاص اللى بيتكلم عنهم وقعت من الضحك.
: بتضحك يا
جلال؟ : اصلى بصراحة متخيل المنظر .. وبعدين؟
: سمعت
الاصوات وانا فى الدور الاول زى ما انت عارف .. اقوم اخرج على صوت الزعيق والخناق والاقى ام
حمدى بتردح لام حسن وحسن راكب على حمدى فى الارض وماسكين فى هدوم بعض وبيتمرمغوا
فى الارض والناس بتحاول تخلص ده غير مقصوفة الرقبة بنت شلبى اللى واقفة بتوزع
الردح على ام حسن وعلى فى البلكونة.
: طيب المهم
حسن حصله حاجة؟ : يا عم جلال حس بيه شوية! : يا بنى المهم حسن : حسن تمام يا سيدى : طيب الحمد لله .. يعنى خلصت؟
:خلصت بخناقة
فى الشارع بينى وبين حسن وام حسن وحمدى وام حمدى وشلبى وبنته المقروصة وبعد تدخل
اهل الحته تقرر اللزامى بترنج جديد بنفس اللون والماركة للواد حمدى بدل اللى ابنى
قطعه وعم شلبى اخد خمسين جنيه على المراية اللى اتكسرت وطبعا ام حسن فتحت حلقها عليه
.. خدتنى الجلالة وقمت رامى عليها يمين طلاق : يا نهار ابوك اسود !!!
: يا جلال
دى شرشحتنى قدام اللى يسوى واللى ما يسواش وقالت لى : يا صدمان يا عرة يا شحات انت
بتطلقنى فى الشارع ؟ ده انا عايشة معاك بس علشان ماليش حتة تانية اروحها .. تخيل
بعد 9 سنين جواز تقولى كده ؟ و فى الشارع بنت الواطيه .. : حد يعمل كده برضه يا
الهامى؟ : اااه ... هى الواطيه امها لو كانت ربتها ماكانتش عملت كده فى جوزها وفى
الشارع بنت السافلة.
: طيب و الثورة
دخلها إيه بقى فى الخناقة دى؟ كشفتها لك ازاى
بقى؟ : ازاى؟؟ ماهو لولا انى خالى شغل دلوقتى
علشان السياحة مضروبه ما كنتش عرفت هى عايشه معايا ليه و انا اللى فاكرها صابرة ومستحمله
علشان بنت حلال وواقفه جنب جوزها .
: طيب اهدى
بس الناس بتتفرج علينا : ايام ما كنت بروح معايا فلوس كتيرة و جيبى مليان ايشى دينار
وايشى دولار و حتى الين كنت ايامها فلة وشمعة
منورة انما دلوقتى لمبة جاز مكسورة ... مش
هى اللى بتصرف على البيت دلوقتى من ماهية المستشفى و دروس الحساب.
الاستاذ الهامى
بكلوريوس حاسب الى و بيشتغل فى السياحة فى المطار . بس بيشتغل حاجة اسمها monkey business .المونكي بيزنس ده بقى عبارة اي ؟ كل شركة من
شركات السياحة بالمطار بيبقى عندها موظفين شباب بيدخلوا صالة الوصول يستلقطوا الزباين
اللى مش معا جروبات و يحاولوا يقنعوهم بان الشركة بتاعتهم هى افضل شركة فى مصر و
مهمته تنتهى لما يسلم الزبون لموظف تانى فى المكتب اللى بيعرض عليه الفسح و الرحلات
اللى بتقدمها الشركة و على قد ما بيشترى الزبون يعنى السائح بتتوزع العمولة بين اللى
جاب السائح و اللى باع له البرنامج .. بس الفرق ان اللى جاب السائح بيبقى عمولة بس
انما اللى باع البرنامج بيبقى مرتب صغير وعمولة وطبعا عم الهامى كان من ماركة العمولة
بس .. الشهادة لله الواد الهامى دة كان ساحر بيعرف يجيب السائح بطريقة لبقة ومحترمة
... شاطر فى شغله علشان كدة كان بيكسب كويس جدا .. ايام ما كانت مصر فيها سياحة ..
إيهىئ إيهىئ إيهىئ.
دلوقتى الباشا بيدير املاكه فى البيت هو بيته
ملك .. جد الهامى بناه ايام فحت البحر.
هو عامل اشتراك
فى النت 8 جيجا و عامل وصلات لكل المنطقة
وبعدين وسع النشاط بال dream box بقى بيفتح كل القنوات
المشفرة و اللى مش مشفرة بقى الموضوع جايب همه وبما انه فى البيت فيربى اية و سلمى
بنتينه التوام و يغير و يغسل و ياكل ووو.
اما الواد حسن فبيروح المدرسة.
الست زينب بقى
بكلوريوس خدمة اجتماعية وابوها الله يرحمه جبلها شغل وعينها فى معهد القلب فى
الادارة من 8 الصبح لاربعة وبعد الضهر لانها كانت شاطرة فى الرياضة جارتها مس
سميحة مدرسة علوم فى مدرسة حسن بتبعتلها العيال اللى عايزين دروس فى الحساب من
مدرستها مقابل انها تسيب عندها ولادها لما
يكون عندها دروس برة البيت .
والشهادة
لله مس سميحة كل يوم برة البيت وعيالها قاعدين يا مع زينب يا مع الهامى وخربين
الدنيا طبعا.
قمت حاسبت
على كل المشاريب وقلت له: يا الهامى انت اخدت زينب بعد كفاح و حب كبير ماتخليش الازمات
بتاعت الفلوس تخرب حياتكم هى بس كانت مشحونة من الحياة شويتين.
الهامى يسمع
الكلام بودن من طين والتانية من عجين .
كملت: المواصلات والشغل العيشة واللى عايشنها
واللى عايزين يعيشوها.
يعنى كانت
بتفضى كوبيتها وبالصدفة جات فى وشك مافيهاش
حاجه يعنى مراتك برضه والناس لبعضيها واحمد ربنا انت قاعد فى ملكك ما بتدفعش ايجار
وعلى الاقل عندك دخل ولو بسيط! غيرك ما فيش خالص وعايش على السلف يلا سلاااف . اقصد
سلاااام يا حلو .
تحب تيجى ارميك
فى طريقى؟ : لا يا عم الحكيم انا حتمشى شويه . اتكل
انت الله معك : سلام يا ابو
مخ تخين.
ذكريات مصر الجديده
...
ركبت العربية
وانا بفكر فى كلمة كنت ديما اقولها لاى حد يقولى انت محسود و الناس بتقر عليك او انت
واخد عين لو منشوش عين كنت ديما اقول : بيحسدونى على إيه دول بس؟ هو انا
عندى إيه يحسدونى عليه؟ لا ده انا عندى وعندى كتير كمان.
لو على نفسى
فانا الحمد لله عندى صحة وشكلى مش وحش طول بعرض وعندى من الخبرة الحياتية الكثير كمان
من عيلة كويسة .
سافرت و اتفسحت
كتير ومراتى ست محترمة من عيلة كويسة بتحبنى حته بعد عشر سنين جواز (قل اعوذ برب الفلق
من عنيكم) .
حلوة و مخلفه
لى خمس عيال حلوين و مؤدبين وووو .. كفاية النعم الله ربنا مديها لى انا شخصيا النظر
و السمع و الكلام وووو ..
(ان تعدوا نعمة
الله لا تحصوها) الحمد لله على نعمته.
انا عمرى ما
حقول تانى الناس بتحسدنى على إيه ان شاء الله .
احنا لسه الضهر
و انا شارد فى عربيتى راجع على البيت عند امى جيت اولع سيجارة لاقيت العلبة فاضية فوقفت عند كشك اشترى علبة سجائر لاقيت عنده سجاير
كتير معرفهاش فسالته: إيه العلبة الزرقا دى؟ : دى سجاير صينى جديده بخمسه جنيه : ودى حلوة ولا إيه ؟ : ماشية معإيه كويس : طب هات علبة اجربها .. دفعت الخمسه جنيه
وانا سعيد لان سجائرى كانت ميرت اصفر ولما وصلت سبعتاشرجنيه العلبة والحاله اتدهورت
بقيت اشرب ليلى مراد(L&M) ولما طلعت العلبة من سته جنيه
ونص لعشرة جنيه و نص واحدعشر ساعات كانت بالنسبة
لى العلبة ام خمسه جنيه لقيه خصوصا لانى انا والست حرمنا المصون بندخن ..
ولعت السيجارة
و سحبت اول نفس وكحيت مرتين لان السدر قفش طبعا بس شغاله ربنا يتوب علينا منها بقى.
وانا ماشى لاقيت عربية ما انسهاش فولكس نوع نادر
وكرسيين بس ولونها اصفر فاقع يعنى ما فيش غير انها بتاعت الواد شرف اسماعيل صديق الطفولة
و رفيق الكفاح لاقيتها راكنة جنب الرصيف عند واحد بيبيع اعلام مصر فعلا هو اشرف واقف
بيطلع لبتاع الاعلام حاجة من العربية .. قمت راكن وراه و نازل.
: يا واد يا
شوشو يا ابن الإيه : انت فين يا ولاد؟ خدنى بالحضن و سلامات : انت فين يا خلوود يا فنان؟ : فى الدنيا .. انا لو اعرف ان لفى فى
شوارع مصر الجديدة حيخلينى اقابل اصحابى كده كنت نزلت كل يوم : ليه شوفت مين تانى غيرى من العيال؟ : الهامى والفرماوى .. فرماوى ده واحد
من شلة صلاح الدين (ميدان فى مصر الجديدة) : اخبارك؟ : تمام و انت؟ : زى كل الناس فى ميدان التحريركل يوم.
: يا واد يا
ثورجى : اهو من ده على ده : يعنى إيه؟ : منها تواجد فى الميدان ومنها بزنس : بزنس؟ بزنس إيه؟ عامل عربية كبدة ولا نصبة شاى؟ : لا بوزع اعلام مصر وحظاظات عليها
علم مصر : قول كدة بقى مش عاملى وطنى يا صايع : لا والله .. انت عارف انا بحب البلد دى اد إيه بس انا لما المحل بتاع ابويه فى وسط البلد فى
الميدان فلما اتقفل فى الثورة نزلت مع شوية صحاب متحمسين وعملنا علم 30 متر وبعدين
لاقيت ان ما فيش شغل و الاعلام مطلوبة وما بتخسرش يا اما فى الثورة : يا اما فى ماتشات مصر وكمان لا بتاكل ولا بتشرب ممكن
تقعد يعنى : بالظبط جبت انا وأصحابى رسالة اعلام
وحظاظات من الصين و بنوزعهم على التجار : الله يخرب بيت الصين و سنين الصين انا
فاضل الاقى عندى فى البيت عيل من عيالى صينى انا لسه مشترى سجاير صينى دلوقتى ب بخمسة
جنيه : يبقى اشتغلوك يا كبير: ازاى؟ اشتغلونى أزاى؟: لانها فى كل حتة بتاته ونص بس : إيه ؟ : دى مغرق الدنيا يا معلم انت بس اللى
ابن ناس و بتروح تشترى من On the run : لا والله بطلت خالص : ده يبنى نازل خمسمائة نوع انا اصلى اعرف
اللى جايب الشغل ده ولو عايز خراطيش العلبة على تلاتة جنيه كمان اجيبلك. فضحكت وقلت: اااه يا بلد المصريين دول فعلا نسل فراعنة : بقول لك إيه سلام بقى يا فرعون لحسن عرفت ان الضرب اشتغل
تانى فى شارع محمد محمود ولازم انزل على الميدان
: سلام يا بطل معلش انا بقى من حزب الكنبة اللى راكن امام
التلفزيون وكل واحد اخد عربيته و افترقنا.
سندوتشات
على القهوة ...
حسيت انى
جعت و خطر فى بالى الاكل الصينى فضحكت.
عديت على
مطعم جنب بيت امى بتاع فول و طعمية بس إيه؟ بتاع اولاد الزوات اسمه ابو
نزار(فلسطينى الاصل) بيعمل الفول والطعمية بتاع الشام اللى هو عليه حمص من الاخر
طعمه حلو و مختلف (ليه بتاع اولاد الزوات؟) لان الاسعار عنده فيها 50% زيادة عن
العادى على الاقل دخلت . :ازيك يا نزار : الحمد لله : عايز 4 فول و 4 طعمية وما سألتش اذا الطعمية سخنة ولا
لا لانه بيعملها و انت واقف .
أخدت
السندوتشات و خرجت على انى اكلهم مع امى.
جنب المحل فيه
قهوة عبده الصعيدى كنت مقطع القهوة دى فى اعدادى و ثانوى .
وانا معدى لاقيت
واحد بينادى.
: إيه يا عم جلال
. عاش من شافك. بصيت لاقيت واحد قاعد على القهوة لوحده و شكلى اعرفه كويس ولما طالت
نظرتى قال:
ابراهيم يا
عم جلال .. ابراهيم العايق نسيتنا يا عم انت خلاص : ياااااه ابراهيم العايق (والعايق دى صفة مش اسم لانه كان
دايما عايق فى نفسه) ...
هو ابن ناس بس هو اللى فرع مايل عايز قطعه.
: ازيك يا ابراهيم مالك كده كبرت و عجزت؟ (قلتها كدة بدل ما اقوله مال
شكلك متبهدل كدة و متمرمط؟
ضحك كعادته
بشكل شبه هيستيرى و قال : النسوان يا معلم .. النسوان اربنا يخليهم ليه.
ابراهيم العايق
دة كان اكبر منى بحوالى تلات او اربع سنين وهو اول واحد استلاقانى على قهوة عبده الصعيدى
ومن المؤكد ان اللهجة اللى بتكلم بيها دى نتيجة ست سنين يوميا على القهوة مع الموظفين
والعواطلية وسائقى التاكسى والمقاطيع وبعض طلبة المدارس المزوغين ومن المدرسة الانجليزية
بالزات لان المدرسة قريبه من القهوة فسامحونى على لغتى السوقية بعض الشىء او كثير الشىء
زى ما تشوفوا بقى.
ابراهيم ترك
المدرسة فى اولى ثانوى وابوه كان موظف فى شركة النصر لصناعة السيارات وكان حازم وحاسم
فى حياته وطبعا كان مصدوم فى وحيده اللى امه افسدته بالدلع وراحت سيبه فى الدنيا ومشيت
. ماتت وهو فى اجازة نصف العام الدراسى وهو فى اولى ثانوى فترك الدراسة والمدرسة وصاع.
ولانه كان امور
و طويل و شعره فاتح شويه فكانت البنات بتحبه و هو سارح بنص بنات الحته و عايش ما
تعرفش بيصرف منين بس اغلب الوقت كان معاه فلوس . وهو اول واحد ورانى بنت من بنات الهوى
و كانت تجربه غريبة لا لا غريبة فعلا بس ده مش المجال نتكلم عنها .. يمكن اكتب
عن هذه التجربة فى روإيه تانية بس دى لازم أطبعتها فى السويد او هولندا .
المهم ابراهيم جابلى شاى بحليب لانه يعرف انى لا
احب الشاى السادة و خبط معى السندوتشات الساخنة وهو بيحكى لى عن حياته وعدد الزيجات
الرسمى و العرفى و ال سيكو سيكو المهم رن
فى راسى كلمه اتقالتلى ايام انخراطى فى القهوة .
يا جلال انت
مش زى الناس دى انت ابن ناس بكرة لما تكبر انت حتبقى فى حتة وهم فى حته تانية خالص.
واهى الحياة
بتثبت لى صحة الكلام .
لا الله الا الله محمد رسول الله . هو ده ابراهيم
فعلا . قمت وانا جوايا مشاعر كتيرة .. مبسوط انى لم انزلق و نجانى ربنا من المصير
ده .
و حسيت انى
عملت خير فى بنى ادم . فكرته بذكريات سعيدة ... هيييه .. الحمد لله .
انت مش من البلد
دى ...
الساعة اتنين
الضهر وفاضل تلت ساعه والاولاد يخرجوا من المدرسة فكسلت اطلع عند ماما وقلت استناهم
امام المدرسة ورحت امام باب المدرسة . لاقيت اولياء امور التلاميذ واقفين مستنيين ولادهم
امام الباب منهم اللى فى عربيته ومنهم الواقف امام الباب بيحاول يدردش مع اى حد.
اول مرة اشوف كل الناس بتتكلم مع كل الناس اكيد
مش كلهم يعرفوا بعض انا الحقيقة مش فضولى خالص بس حبيت اعرف إيه الحكاية لايكونوا
حيزودوا المصاريف تانى وهى مش ناقصة انا لسة ما دفعتش الاديمة!
نزلت من
عربيتى ورحت وقفت مع الناس لاقيتهم بيتكلموا عن اللى بيحصل فى التحرير فحمدت ربنا انة
مش المصاريف وراجع على عربيتى استوقفتنى جملة ست محجبة بتتكلم عن الست اللى كانت
محجبة و الامن فى شارع محمد محمود قطعولها هدومها بتقول إيه الست بقى؟!!!
الست المحجبه: البت دى لا هي محجبة ولا نيلة دى لو
محترمة إيه اللى نزلها من بيتها وسط الرجالة والبلطجية والارف ده؟
يعنى هى اللى
حتصلح البلد؟ فرجعت اسمع الردود.
واحد واقف: الست مالهاش غير بيتها . واحدة التانية: لا ازاى بقى .مصر فيها المجلس الاعلى
للمراة.
الست المحجبة:
اه مش ده بتاع ماما سوزان . لا شكرا . خليها تجاهد فى بيتها الاول و بعدين
تنزل التحرير . وساد
الصمت و
لحظة و شعرت بغيظ لان الجميع جنح للسلم و عدم الدخول فى نقاش مع الوليه المفترية
دى ام صوت عالى على مافيش.
فقلت: لو سمحتولى ممكن ادخل فى الحديث ؟ فبصتلى
الوليه اياهه بتحاول تعرف انا فى اى جبها قبل ما ترحب او ترفض.
بتاعت مجلس المراة: اتفضل! : فيه حد فيكم بيدخل على النت و بيشوف
ال you tube او ال face book؟
انطلقت الوليه
اياهه . : الله يخرب بيت النت و سنينه هو احنا
ملاحقين على طلبات الولاد علشان نشترك فى النت؟ ولا نقعد عليه؟
: اااه علشان
كدة ... لو حضرتك دخلت اتفرجتى كنت حتشوفى ان الست دى محجبة فعلا وكل اللى كانت
بتعمله انها كانت فى الميدان بتحاول تجيب حقنا وحقك وحق الشعب فى حياة سوية واضربت
ببيادات الامن ولما سابوها راحت ست زيك محجبه تسترها فرجعوا العساكر يضربوا الاتنين
منظر يخلى الواحد يعيط الست دى كانت نازله بدهلك والهجوم اللى حضرتك عاملاه عليها ده
لانها اشجع منك وادرت تنزل وانت خوفتى فلما بتشوفى حاجات كدة بتهجميها لانها
بتفكرك بخوفك يا مدام انت مش من البلد دى اظاهر الله يكون فى عون
الناس دول وفى عون جوزك.
مشيت بخطوات
سريعة ومتزنه وانا مبسوط من نفسى وسط زهولها وضحك الواقفين وبعد ما مشيت مسافة
سمعت صوتها جاى من ضهرى : انت فاكر نفسك مين علشان تكلمنى كدة ؟؟ انت اصلا إيه اللى
دخلك فى الكلام ؟ راجل غريب جدا والله!
عديت الناحية
التانية ودخلت قهوة يقال انها كوفى شوب لاقيت انى لازم ارطب شويه على قلبى بعد ما
ظبط الولية دى.
اضربتلى واحده
حاجة ساقعة واستنى الولاد كمان والحقيقة انى رطبت من كل ناحية لانى لاقيت الكوفى شوب
مشغل قناة نجوووم بتاعت الاغانى والبنات فيها حاجة مش معقولة وال إيه كنا زعلانين
من روبى !!
دى روبى
منقبة بالنسبة للى بنشوفه الايام دى يلا اهه فن برضه.
شربت الساقع
واتفرجت على شويه فيديو كليب وقمت اخدت العيال من المدرسة وكانت الوليه الياهه
مشيت.
طلعوا الولاد
من المدرسة عليهم غبار حوش المدرسة كله وهدومهم وسخه و متبهدلة كالعادة زى مايكونوا
بيسيقوا المدرسه بهدومهم.
على باب
العماره قاعد انا ...
مشينا بالعربية
انا والعيال شوية وهوب العجلة الشمال امامى عملتها ونامت وقالت لى حاصحى على خمسه
خمسة ونص.
نزلت وانا بسب وبلعن للكاوتش اللى عايز يتغير بقاله
كتير طب ما فيش فلوس يا عم الحاج .. العربية بقى ما تادرش الظروف؟
حاجه تجنن
والله!
طلعت الكوريك
وهويت المسامير شويه وبطلع العجلة الاستبن لاقيتها نايمة هى التانية!! وهى كمان بتقول لى صحينى لما تيجى تصحى اختى.
يعنى ما فيش
استبن يا حلاوووه!
OK قلت لولادى استنونى فى العربية حصلح الكاوتش و اجى
على طول ما حدش ينزل من العربية وتلاتة حاضر يا بابا سبت الراديو شغال ونزلت شاورت لتاكسى ابيض! اااه ما التكسيات
بقت فى مصر اللوان و اشكال و منها المكيف كمان.
زمان كان التاكسى
بتاع القاهرة ابيض واسود بس ولما السيدة
جيهان السادات عملت الليموزين المرسيدس كان جامد جدا وبعدين الحقيقة فى الفترة الماضيه
حصل طفرة فى التاكسى و لانى كنت زبون تاكسى فعندى تاريخه.
نزل فى مصر
تاكسى اسمه التاكسى الابيض ده بالعدهد و البنديرة تبده ب 2.5 جنيه و الكيلو بجنيه
بعد كدة.
بصراحة المشروع
ده عجبنى جده لاسباب كتيرة .
اولا انت
بتنزل تدفع العداد بدون خناقات .وبعدين العدد فى اللمون بتشاور وتركب على طول لان
عليهم اقساط وبيرضوا يروحوا اى حته .
ومكيفه العربية
والعربيات كلها حديثة هو فيه حد يصدق ان مصر فيها تاكسيات بقالها اكتر من اربعين
سنة شغالة؟
بس برضه تركب
مع سواق من بتوع التكسيات البيضة وتسأله إيه رايك فى العربية دى؟ على عربيته يعنى يسب
و يلعن لان الحكومة بالاتفاق مع شركات السيارات لموا اسوء مكونات وعملوا منها التكسيات
دى واشتكوا يا سواقين وطبعا مافيش فايده .
اما الجديد
بقى يا ردالة اول مرة شفته من بعيد كان فى المطار جلبى انخطف وجلت إيه ده؟ العربية
دى انا شيفها جبل أكده.
جريت وراها ولما جربت منها لاجيت مكتوب على
الباب رقم تليفون مختصر وعلى السقف علامة التاكسى المضيئة؟
جلت لا لا
معجولة يا ردالة؟ التاكسى الانجليزى؟ تاكسى لندن؟ احبك يا لندن .. ده احنا بجينا
خوجات يا ولاد !
بجى الواد جهراوى
ولد الفرطوس رح يركب التاكسى الالاجة ده ويدلى بيه على الكفر؟ معجولة دى؟
لاممكن ابدا
دا اكيد تاكسى تبع الرياسة.
يعنى مشروع
صغنن بيتسلى بيه حد من البشاوات الصغيريين ده احنا بندفع اجرة الابيض والاسود
بالتيلة.
والابيض ده
بنركبوا لما يكون فيه فرح بس ... ربنا يديم المعروف يا بلدنا يا عالمية.تكاسى انجليزية
على طرق مصرية.
لا ولسه ياما
حنشوف.
المهم نرجع
للكاوتش النايم ..
شاورت
لتاكسى ابيض وركبت انا والكوتشه واتجهت لمحطه بنزين قريبة وكنت عايز انكش السواق
فى حكإيه الثورة يعنى اعملى حلقة من بتوع الفضائيات واسميها دردشه فى صالون تاكسى.
انا جنت
السيرة ولاقيته بيسب و بيلعن : بقالنا سنة طالع روح امنا وما فيش حاجة اتعملت بس الاسعار
غليت والبنزين بنقف عليه بالطوابير ولو عايز اقلب العربية غاز حادفع مبلغ اد كده ومش
معايا اصلا.
ده غير البلطجية
بيطلعوا علينا و بيسرقوا العربيات و يقلبونا ده انا واحد زميلى سبتوه و اخدوا العربية
منه وكمان مضوه على مبايعة انه باعلهم العربية كمان وهى مش بتاعته وقالوا له كفإيه
اننا حنسيبك حتروح يا ابن ال ..... طب والنبى
قول لى فاضل إيه؟ قبل ما ارد عليه كنا وصلنا بس انا عايز ارد فقلتله : استنانى ارجع معاك ماشى؟ قال: ماشى بس العداد شغال ! : ماشى.
نزل من
عربيته ونزلى العجلة من الشنطه . وصلها لى لبتاع الكوتش وكملنا حديثنا : إيه راى سعادتك بقى فى الثورة؟
اخدت نفس طويل
من السيجارة لترتيب افكارى و قلت: هو انت عندك وجهت نظر فقاطعنى: مش كدة و النبى؟
: والنبى ما
تقاطعنيش: طيب حاضر اتفضل سعادتك . اخد نفس من
السجارة تانى و كملت عادى : يا سيدى . هو اسم الكريم إيه ؟ : ابو هشام : يا عم ابو هشام الثورة دى انا احترت
و احتار دليلى فيها . اول لما بدهت قلت دول شوية من الشعب حتلاقيهم واقفين ماسكين
مكرفون و بيهتفوا بالعدهلة الاجتماعية و التكافؤ وحوليهم كردون امن مركزى زى ما كان
الواحد بيشوف .
وبعدين لاقيت
انه لا! دى الناس كتيرة اوى بس ما كناش عايزين نصدق انهم مليون .
: كانوا كتير
يا باشا . ااه اسف مش حأتكلم تانى اتفضل ... قلت: اشتباكات . ضحايا . شهداء . خطاب . انفلات
امنى.
الوقت ده خفت
على بيتى وولادى والحقيقة ان الانفلات الامنى زى ما كان له سلبيات مهولة الا انه
عمل توحيد لكل الشعب . ابن بلد و فرفور . مؤدب و صايع . مسلم و مسيحى . اهلى و زمالك
. غنى و فقير . رفيع و تخين.
الشعب اتضفر
مع بعض ونسيوا اى خلافات او اختلافات.
الناس نسيت
كل حاجة فى الدنيا واما نزلوا ميدان التحرير او قعدوا يحرسوا بيوتهم و عائلتهم الرجاله
سهروا امام العماير فى الشارع يحرسوا المنطقة والستات قعدت امام قنوات الاخبار ويبلغوا
الرجالة اخر الاخبار باموبايل.
: ولامؤخذة .
حضرتك كنت فين ؟؟
انا كنت امام
عمارتى مع الجيران .
كانت مشاعرى
متلخبطه عبارة عن خليط من الخوف والفرحة والتوتر والسعادة.
كنت خايف
مصر تخرب خالص ويحصل حريق القاهرة تانى او يحصل اللى نقعد سنين نصلح فية علشان
نرجع زى دلوقتى!
كنت خايف اول
يوم بس الحقيقه لان الاخبار كانت بتيجى من كل حته وحشه.
بلطجيه فى الهرم
نزلوا السكان من العماير وطلعوا نهبوا الشقق ومشيوا ما حدش اتعرض لهم لانهم كتير ومعاهم
سلاح.
: احنا كانت
والعه عندنا فالبساتين علشان وقعوا فى بعض بعد ما سرقوا كارفورتصدق يا باشا اللاكتوب
كان بيتباع على الدائرى بمتين جنيه و النوكيا الى هو اخر حاجه ده بمتين وتلتميه؟
: احنا سمعنا
كمان ان اقسام الشرطة زى قسم عين شمس و المطرية و القطامية دخلوا عليهم البلطجية
نهبوهم وطاردوا الظباط وسرقوا السلاح وهربوا المحبوسين هاجموا اغلب سجون مصر وهربوا
اللى فيها وده معناه ان المساجين خرجوا ومافيش حد يحمينا .
كان كل واحد
منا ماسك له حديدة او خشبة وانا كنت ماسك ماسورة وغيرى سكينة قال يعنى لو دخل علينا
بلطجية برشاشات حنحوشهم . كنا حنشربهم شاى و نقولهم خدوا اللى انتم عايزينه بس سبونا.
ضحك سواق التاكسى
قائلا:لا يباشا معقوله؟ يضحك ثانيا.
فقلت: احنا كلنا ناس مسالمة واصغر واحد
فينا فوق التلاتين ويمكن اكون انا اصيع واحد فيهم انما فيه شباب اصحابنا من مكرم
عبيد عملوا فيهم حركه بصراحة ملعوبة.
احنا كنا
بنقعد امام العمارة ولان الدنيا برد جده كان البواب بيولع لنا نار علشان نتدفا وكل
العماير اللى حوالينا كانت كدة برضه وده علشان هجمات البلطجية كان دايما بيسبقهم موتوسيكل
علشان يشوف الجو عامل إيه هم عايزين يفاجؤ الناس وياخدوا الغلة و يهربوا مش عايزين
يدخلوا فى معارك.
: ااه ولاد الكلب
نفضوا الناس الغلابه : كان فى الاول موتوسيكل استطلاع وبعدين تدخل عربية ملاكى
وميكروباص للبلطجية و نقل علشان تشيل المسروقات وطبعا احنا كلنا فى الشوارع فماجلناش
حد وكاننا عرفنا الحكاية دى فقعدنا كل يوم علشان ما حدش ييجى.
:الله ينور
عليكم .. ما هو العقل زينه برضه والمتعلم برضك راسه بتبقى متنورة .. هم دول الرجالة
اللى الثورة اظهرت اللى جواهم.
: ده اللى كان
مفرحنى ان لسه فى مصر شباب بيحبوها و بيضحوا علشانها : يا باشا مصر ولاده لولا ولاد الكلب اللى
كانوا طالقينهم علينا يخوفونا ويكتموا على نفسنا الله يرحم السادات الراجل ده لو كان
موجود مكانش كل ده حصل ..كمل يا باشا كمل .
: انا كنت متوتر
من إيه اللى ممكن يحصل بعد كدة؟ وشهادة لله انا كنت فرحان ان الشعب قام والوزارة اتغيرت
والريس السابق عين نائب وكنت بقول للجيران واحنا متجمعين امام العمارة ان الريس مش
حيسيب البلد بأى ثمن هو عملهم كل المطلوب منه و لو حيسبها حيولع البلد قبل ما يسبها.
: كلنا يا باشا
كنا بنقول كده : اصل بقاله
تلاتين سنة ماسك البلد عارف كل حاجة عنها ولا يمكن الناس المتجمعين فى التحرير
حيخلوه يسبها مهما حصل ولو اضطر حيولع فيها زى حريق القاهرة كده ايام الملك فاروق.
:انا برضه شفت انه الصراحة كان ممكن يعمل كده ويشكر انه
ما عملش فينا زى اليمن او سوريا ولا ليبيا.
: الظاهر انه
كان فاكر ان الحكإيه بسيطة و ممكن يطلع يكلمنا انه حيتنحى نقوم احنا نتمسك بيه زى
ما حصل مع الزعيم عبد الناصر.
: هو مش عبد الناصر
و عبد الناصر لما انضرب عليه نار فى المنشيه فى اسكندريه ما نزلش الحكومه تضرب فى الناس
زى ده ما عمل ونزلوا ضرب فى الناس فالتحرير بس التحرير اثبت ان بالصبر و التضحية و
الاصرار ممكن التغيير : صدق اللى قال ما ضاع حق ورائه مطالب.
: بصراحة انا
اعتزرت عن رأيى السابق لجرانى واصحابى وقلتلهم انا اسف على اللى قلته قبل كدة .
ودلوقتى بعد
ما عدت سنه على الثورة وانا عاطل وعيالى عايشين بالعافية ومرت علينا ازمات عرفنا انها
مفتعلة زى ازمة البوتاجاز و البنزين والعيش
ووو .. مابقتش
عارف!! انا كل يوم اسمع حاجة جديدة! واغير رأيى تانى بس اللى ثابت فى دماغى ان الثورة
صح ...
ولا إيه يا ابو
هشام؟ ابو هشام!! انت بتسقط؟ هى سيرة الثورة بتنيمك ولا إيه؟
: لا لا يا باشا
انا اصلى مطبق من امبارح علشان اجيب القسط بتاع المحروقه دى.
: طب يلا بينا
ناخد العجلة و نرجع لحسن عيالى لوحدهم فى العربية.
رجعنا واصر
يركب لى ابو هشام العجلة وخد اجرتة وزيادة شويه واتكل على الله .
ركبت
العربية لاقيت الولاد نايمين زى الملايكة وانا فى طريقى للبيت مريت على المدرسة
اللى انتخبت فيها مجلس الشعب.
انا رحت انا
وفريدة مراتى تانى يوم لانى كنت عارف ان اول يوم ده حيبقى زحمة طحن.
ده يوم الاستفتاء
رحت انا ومراتى الساعة سبعه الصبح كان طابور الرجال فيه بتاع ميه وخمسين واحد مثلا
و الستات يعملوا بتاع مائةين.
احنا كنا
مطبقين ما نمناش علشان نروح الاستفتاء لانها اول مرة فى حياتنا ننتخب او نستفتى...
وكانوا كل الناس فرحانين ومبسوطين بس الملاحظ كان ان 50% من الناس على الاقل ما
كانوش عارفين يقولوا اه ولا لا! مش عارفين الفرق إيه؟ ولانهم الظاهر متعودين على
مدار اكثر من خمسين سنة يقولوا اه فقالوا اه!!
بس بصراحة كان منظم جدا والجيش والشرطة مبتسمين
ومتعاونين.
دخلت شافوا
الرقم القومى على الباب الخارجى ودخلت خيمة لاقيت قاضى اخد الرقم القومى واخدت
ورقة و علمت على لا وصبغت صباعى و اخدت الرقم القومى وخرجت رافع اصبعى وسعيد جدا.
علشان كده قلت نروح تانى يوم فى انتخابات مجلس
الشعب وفعلا لما رحنا لاقيت ان انا فى مدرسة ومراتى فى مدرسة تانية والاتنين كانوا
رايقين جدا والجيش والشرطة متعاونين بس اللى بيكلمك الجيش والشرطة موجود وكانه
مراقب فقط .
ليست هناك تعليقات:
إرسال تعليق