المزه ظهرت ...
: الو .. استاذ جلال ؟ : ايوه!!! : انا واحدة ما تعرفنيش .: اهلا وسهلا يا ما تعرفنيش .
انبسط طبعا وحسيت بدماء الشباب بتدب فى عروقى .
قالت برقه : انا بس بتصل علشان اعتزرلك .
دماغى عماله تودى و تجيب و كل الموزز اللى اعرفها
صورها و اصواتها عماله تيجى فى دماغى بشكل كرتونى . الصورة تيجى و تقف :امام عينى واركبها مع الصوت و بعدين ..
ااااااء غلط . مش هى و لاقيت صوتها الناعم بيقولى .
: الو .. الو
انت قفلت ولا إيه ؟ : ااالا . لا طبعا . انا بس مستنى اشوف الاعتزار إيه سببه
؟
: حصل موقف بايخ
كده و انت ما كانش ليك فيه زنب ولا انا بس صحبتى اتصرفت من خوفها..
: انت التيوتا
اللاند كروزر ام سقف ابيض . صح ؟
ضحكت و قالت
: صح
بس والله انا ماليش زنب دى سوزى هى اللى خافت واتسرعت لما لاقيتك بتقرب منى .
مناورا: طب دى سوزى و انت تبقى مين ؟
ضحكت بنعومه
جامده و قالت : انا واحدة
ما تعرفهاش .
: طيب و لو عايز
اعرفها : ما ينفعش .
تيت تيت تيت
الخط اتقطع ... ندوس ريدايل يا معلم ! إيه نمرة بريفت؟ يا ينت ال.. موزه ! طب والعمل
؟؟
انا عايزه
من ده يا حزمبل انا عايزه من ده ولسه اليوم ما خلصش .
كلمت شريف صاحبى اللى جاب لى بيانات العربية .. الزفت
الموبايل بتاعه مقفول! اعمل إيه؟ اعمل إيه؟
فكر يا عم جلال
!!!!! رن الموبايل فتحت بسرعة لاقيته سالم
رديت : إيه يا
سولوم : الله يخرب بيتك يا بعيد.
ضاحكا : إيه الدعوة البلدى دى يا سولم؟ مالك
قلبت كده على خالتى فرنسا؟ : مش عارف انام وعندى شغل بكره.
: انت لحقت تروح و تحاول تنام كمان؟ : ايوه .. ومش عارف انام يا سى زفت !!
: هو انا المسؤل عن برغيت بيتك؟ ده
انت غريب فعلاً! اقوك اشرب لبن جاموسى دهفى و اغسل سنانك وحوافرك وتبوس مراتك بين
عنيها كالعادة وتروح تنام جنب عيالك .. مالك يا واد فيه إيه ؟؟ : فيه إيه؟؟؟؟ فيه ان دماغى عماله
تضرب تقلب و ما بفكرش الا فى الموضوع اياه .. انا اشتريت نص مصر لغايت دلوقتى : يا سلام هو ده اللى مش مخليك تنام
؟؟ طب نام و انا بكرة الصبح اخلصلك النص التانى على سعر كويس ويبقى عندك مصر كلها
ونحفر براحتنا بقى يا كبير . امش ياد نام بلا دلع ظباط : طيب يا جزمه تصبح على البلاط : تصبح فى طره يا بعيد . سلام : سلام .
: استنى استنى
. ولا يا سالم ؟؟؟ : هااه !!! :انا حكيتلك على البت بتاعت التيوتا اللاند كروزر مش كده
؟ : اه ! : لسه قافله معايا دلوقتى.
: ياسلام ؟ : والله : وجابت نمرة تليفونك منين ؟ : هو ده اللى مجننى و عايز اعرفه : طب ما النمرة عندك اللى طلبتك منها !
: ازكى اخواتك . ما انا جربت ولاقيتها برايفت : نمرة خاصة يعنى ؟ : متهيالى برايفت يعنى خاصة ولا إيه يا
خريج مدهرس اللغات؟
يا فاشل .
: طيب طيب . كلمنى الصبح و انا اعرفلك الحكإيه : الساعة كام يعنى؟ : على تسعة : ليه هو انا موظف زيك . انا عاطل يا
بيه .
: خلاص اصحى
و كلمنى . غوربقى سلام ... : ياسلام جالك النوم دلوقتى . يلا سلام.
وصلت البيت
طلعت لاقيت الكل نايم.
شربت لبن جاموسى
دافى وغسلت رجليه وغسلت اسنانى وبوست مراتى من ايدها ونمت نوم العافيه يا لودة .
من النجمة ...
طول الليل
مؤرق ومش عارف انام ... اصحى اولع سيجارة من علبتى الثمينه ام تلاته جنيه ونص والف
فى الرسيبشن و ارجع السرير وفريدة قلقت وقالت لى وهى مغمضه عينيها : فيه حاجه؟ :لا .. : امال مالك؟ : ما فيش بحب جديد.
فتحت عينيها
و بصت لى بتشوف الموضوع بجد ولا إيه؟ فيه
حد فعلا بيهدد عرشها ولا كلام ازواج والظاهر لاقته كلام ازواج.
فقالت : بس المهم تكون احلى منى و غنيه زى ما
قلتلك قبل كده علشان تصرف علينا : تمام .نامى . انا حقوم ابص على العيال .
دخلت لاقيت
الولاد كالعادة عملين تشكيلات واشكال غريبة فى السراير وهمه نايمين ومن غير غطاء فغطيتهم
واتفرجت عليهم وهم نايمين .. ملائكة نايمة فى اشكال عندسية على السراير.
انجازاتى فى
الحياه وهم نايمين بيبقوا زى الملايكه بس و هم صاحيين بيبقوا ... ملايكه مش زى وعلى
رأى المثل الخنفسه شافت ولادها على الحيط قالت ده لولى ملضم فى خيط لا لا الموضوع قلب بخالتى بمبه كده ليه؟ الظاهر
أنى انا لازم انام شويه وشويه ونمت.
قمت الساعه
سبعه زى اى موظف مع احترامى الكامل الشامل لكل الموظفين .. عقارب الساعة بتلف
مشلوله إيه ده؟ دى بتسحف ناحيه الساعة سبعة ونص .. طبعا انتم بتسألوا هو سايب مراته
تودى العيال و هو داير يتصرمح ولا إيه؟ لا والله بس اصل العيال اخدوا اجازة نص السنه
وبيسهروا بالليل فبيصحوا متاخرين و انا مش فاهم بصراحة يعنى إيه اجازة شهر؟ زى ما تكون
المناهج سهلة و بتخلص بسرعه او تحس ان المدرسه مش عايزة العيال يروحوا اجازات كتير اوى . على ايامى ... لا الكلمه دى
حسستنى انى عجوز .. خليها زمان كانت اجازة نص السنة اسبوع و كنا بنحقد على الجامعات
لانهم بياخدوا اسبوعين .. بس الشهادة لله انا مبسوط من وزارة التعليم علشان كتر الاجازات
بيوفر معايا فى البنزين و اهو كله فى المصلحه يا فشله .
رن الموبايل
و لاقيته شريف بيه : الو إيه يا عم شريف كنت نايم ولا إيه؟: نمت بدرى . كنت تعبان من دور البرد اللى
ماشى ده . سارة اخدته و ادتهولى : يا عم شريف ريحوا نفسكوا شويه . خفوا لحسن الناس اللى
تحتيكوا بيشتكوا . و بلاس البوسه تبقى مشبك . فرنشإيه بسيطه و خلص
: طب يا خويا
.. اهو الار ده هو اللى مضيعنا .. انا
كلمتك علشان حصل لى حاجة غريبة جدا امبارح وحكيت له فضحك : هى كلمتك ؟
: نعم ؟؟ هو انت
كنت عارف ؟؟ : يا ابنى
قلتلك انت بتتعامل مع اقوى ادهرة فى مصر احنا النيابة العليا : طب احكيلى بقى يا عم الجامد؟ ولخص.
: يا سيدى وما
سيدك الا انا طبعا انت لما كلمتنى علشان بيانات العربية التويوتا كان عندى فى
البيت بنت خالت نهى مراتى ومعاها موزه كدة صحبتها كانوا عايزين نهى فى حاجه وانا بقول
اوصاف العربية ونمرتها لصاحبى فى الادارة دينا بنت خالت نهى كانت بتلمع اوكر وبعد
ما قفلت لاقيت وشهم الاتنين اصفر: مالكوا؟ : اصل العربية دى بتاعت ندا صحبتى وشاورت على الموزه صحبتها
: هو مين اللى بيسال عليها ؟: لا انتوا قلولوا لى إيه الحكاية؟ فقالت
ندا: اصل واحنا راجعين من السخنه (العين السخنه) اتنين صحابنا كانوا
ورانا و تاهوا منا : كلمونا و قلنالهم اننا حنركن نستناهم فى الNA : ونزلت اجيب موبايلى من الشنطه لان
موبايل دينا كان بيموت شحن : لاقينا واحد ركن قدامنا ونزل وبيتكلم مع ندا انا لاقيته
ضخم و قرب من ندا قمت مطلعه ال Electric Shockو اديته شحنة
وجرينا ركبنا و جينا على هنا نستنى صحابنا : طيب دلوقتى الراجل ده عضو برلمان و
حيقلب الدنيا على العربية واللى كانوا فى العربية.
دخلت نهى مراتى
بصينيت عصير فغمزت لها فقامت مشعللاها زياده : انت بتتكلم على جمال بيه الطالوطى نائب
الدلنجات؟
: اه يا سيتى
.. الراجل كلمنى اجيبله بيانات العربية اللى عملت معه المصيبه دى ولو انا توهته
عنده اللى يجيبها له غيرى
: طب هو جاب نمرت العربية منين؟
: شافها ماشيه
فى شارع تسعه هنا فى المقطم من ساعه : لازم شاف السواق وهو جاى ياخدنى طب هو عايز العربية فى إيه ؟ انا ما عملتلوش اى
حاجه بالعكس ده صعب على جدا لانه كان لطيف خالص وطيب.
دينا بغضب : يا سلام يا طيبة يا رومانسية على
الاخر .. ده انت ندله نداله!! انا يا بت
انتى مش كنت بدافع عنك؟
: ايوه يا
دينا بس منظر الراجل و هو بيقع على الارض كان وحش اوى فكرنى بانهيار الوول تريد سنتر .
: انتوا واخدين
الموضوع هزار ده راجل تحت ايده جيش من الناخبين فى الدلنجات لو نزلوا على ابوكى يا
دينا فى فالسخنه حيشيلوا قريتكم ويجروا بيها على الطريق السريع.
: انت مش صاحبه
يا ابيه؟ : ايوه انا اعرفه بس ... :طيب ما تكلمه يا شريف علشان خاطر
البنات.
: حأحاول واشوف
حاعرف أعمل إيه؟
: حاول والنبى
لو سمحت حضرتك لحسن Dad مش حيخلينى اسوق تانى خالص!
: اصلها لسه الشهر
اللى فات مخيشه عربيتها مبوظاها خالص.
: لما لاقينا
البنتين اترعشوا وحيعملوا بيبى خلاص ضحكنا وقلتلهم : ده واحد صحبى بس لازم تعتزروا له وانا
حطيب خاطره برضه بكلمتين فقلت له: لا والله فيك الخير : وكنت حكلمك بس نهى سحبتنى بقى
فموضوع كده ونمت : وحياه امك؟
: ما ادينى
بكلمك اهه بس انا ما عرفتش انهم اخدوا
نمرتك امبارح يمكن نهى اخدتها من موبايلى و انا فى الدش.
: اااه وانت بقى حتطيب خاطرى ازاى؟ : إيه عايز إيه يعنى؟ اخرك حله محشى
ورق عنب وشويه بانيه : يسلاااام وحياة ماما؟
: جلال انا
موظف ومهيتى على ادها واسمع بقول لك إيه ده
اخرى!
: لا يا
حيلتها انا ما قولتش لنهى على شرم الشهر اللى فات وشوف انت نهى لمابتقلب وسيادتك تلاقى نفسك بايت لك كام ليله عند الست الحاجة وامك
ما بتعرفش تطبخ يا ابوكرش وبعدين تروح تصااالح بهدية و تعزم على عشااا و .....
: بس بس بس .إيه
يا عم فيه إيه ؟ عايز إيه طيب ؟ :عرفنى على ندا؟؟ : وحياة امك ؟: احزر الاباحة تليفون نهى على الموبايل
معإيه هه ومش خسارة فيك دقسقة ب14 قرش يا
معلم!!
: اه يا ابن
..... ابوك ماشى : لا و عايز
نمرة الموبايل البرايفت يا حلو : موافق بس انا برضه حقول لفريدة مراتك.
: تبقى برضه حمار!
ما انت
حتعزمنى انا وفريدة على العشا وتعرفنا ببعض : اااه يا ابن الحويطة ... مسيرى اقفشك
مرة و.....
: انسى ... يا
ابنى عمرك ما حتعرف تعمل ده لانى ببساطة ما بعملش اى حاجة خارجى ابداً : يلا يلا بطل الحركات دى!!
: والله ... ولو
عندك اثبات قدمه للنيابه.
: طب ما ان
حجبلك نمرتها لزمتة إيه العشا بقى والمصاريف؟
: لا يا معلم
التليفون ده علشان تعرف الحلوة انى اعرف اجبها برضه .. برايفت مش برايفت تتجاب!
انما العشا
ده علشان نبقى فى النور امام فريدة وما مافيش واحد كحول زى حضرتك يمسك على حاجة.
فجأة طبق
نور طلع فوق راسى و جناحين على ضهرى. طول عمرى ملاك والله اعمل إيه بس؟
اتفقنا على
يوم الجمعه الجاية حيظبت معاهم و قام جاب لى نمرة ندا من تليفون نهى من غير ما
تعرف زى ما طلبت منه.
قفلت الموبايل
و رميته على الفوتيه اللى جنبى فى الرسبشن و سرحت مع دخان السيجارة الصينى.
الاتـــــــفـاق
...
التليفون
بيرن بره وانا باخد دوش .. اصل انا عندى ماستر بدرووم ابن ناس بقى .. سكت الموبايل ورجع يرن بالحاح فخرجت بالبرنس على الرسيبشن : الو : إيه ما بتردش ليه يا بارد .
جلال: سولوم هه هه هه .. انت لسه ما نمتش من امبارح ؟ : لا يا بارد انا فى الشغل.
: انا فعلا بارد
لسه طالع من تحت دوش بارد وجميل يا موظف.
: إيه الاخبار؟
: انا اتفقتلك على الاهرام و ابو الهول
بسعر كويس اوى هه هه : يا عم البارد انا فعلا ما نمتش ولازم تجيلى دلوقتى عالادارة.
: ليه حرضعك علشان
تنام؟ : عسل عسل . يا عم السمج ساعة و تكون عندى
يلا سلام : سلام !!
لبست هدومى
ورحت على الادارة لاقيت سالم وشه منفخ ومحمر زى الطماطم لانه ابيض بزياده ومش
نايم.
: صباح
فرعونى ملكى مفروش على ورق بردى يا كبير .
: اهلا سى ..
دخل البوفيه جايب له سطل قهوة فطلبت قهوة انا كمان
وخرج العسكرى قلت : ها إيه
بقى؟ : من شويه كلمنى حمدى و قالى ان فيه
معلومات ان فيه ناس اتدربك على راسهم مكان .. كانوا بيحفروا بلدى والارض هيلت
عليهم فقلت باهتمام الخبير: كانوا نزلين قد إيه؟ : حوالى 18متر : طب ما طبعا تهيل دى عيال هابله كانوا لازم يعملوا خنزيرة : إيه يا حبيبى؟ خنزيرة؟ : اه خنزيرة حاجة كده زى الماسورة بتاعت البلاعات .. اللى
بيحفر بيبقى جواها علشان لو هيلت الارض ما يحصلش للى بيحفر حاجة و بيتبطن الحفر
بخشب علشان يمنع التهييل بس البلدى بيوفر فبيشتغلوا
بيه فبيموتوا فى الاغلب : مهو فيه 3 ماتوا فعلا : البقاء لله مش قولت لك .. طيب وانت عايزنى فى إيه
؟ ارفع البصمات؟ ولا اعزى ولا إيه؟
: يا عم العسل ركذ بقى معى حمدى كلمنى على الموبايل
مش على الجهاز وعايزنى اقابله نتكلم لان الموضوع ده لسه الداخلية ما خدتش بيه خبر.
: اااه كده
فهمت انت عايزنى اروح اوصلك صح : يييييه ده انت مخك مزنخ : لا مش مزنخ بس انا مقلق من حمدى ده يكون عاملك مهموز وانت
خلاص قربت تترقى زى ما قولتلى فى النشرة الجإيه : ما يقدرش يعملى حاجة : ليه ماضيلك ايصال امانه ولا واخدين
بعض على حب .
: لا يا لذيذ
.. انا لسه قافش له حتت ارض فى التجمع تعملها خمسه اخضر فهو مش حيخصرنى لاى سبب : ااااه تمام .. مش بقوللك مصر كلها
بتحفر .. اثار يا مصر .. طب والمطلوب إيه؟ : نروح ننزل المكان نشوف الدنيا فيها إيه؟
وانا فهمته انك ليك فى الحواديت دى : يا ابن الجزمة !!! يعنى انت اصلا شغال
فى المشاوير دى و كنت بتشتغلنى صح؟ : هه هه هه لا والله؟ على خفيف خالص : ماشى .. يلا بينا .
نزلنا قابلنا
حمدى و ركب معانا فى عربية سالم و رحنا كافي هادى فى المهندسين . دخلنا قعدنا على
جنب . وواضح من معامله الجرسونات ان حمدى زبون المكان : إيه يا عم حمدى الحكإيه؟ : تشربوا إيه الاول؟ : قهوة زياده وشيشه سالوم : شيشه كريز و بندق (سحلب) : وانا زى جلال بيه .
بعد الجرسون
عننا و بدا حمدى الكلام : انا تعبت من الشغل يا سالم و من ارف الشغل وقلت لنفسى انا
بكبر والولاد بيكبروا و المرتب بالمكافات .
: ولا بيعمل
حاجه : على قولك . ففكرت انى لازم استغل اول
فرصة تجيلى و اعمل منها قرشين : القرشين دى كلمه اديمه اوى دلوقتى اعملى مليونين .
: بالظبط حتى مليونين دول حيروحوا فى شقق العيال امال انا و الوليه حنعيش بإيه؟ المهم جالى خبر
من كام شهر من مخبر عندى ان فيه عيال بتحفر فقلتله تابعهم و ما تديش خبر لاى حد وهو
بالمناسبه معانا فى الحكإيه دى : طبعا : المهم .. امبارح كلمنى المخبر و قالى ان العيال تلاتى
منهم الارض هيلت عليهم و ماتوا وانه قعد
مع واحد من اللى فى البيت و قاله انهم كانوا شغالين بلدى لانهم مش لاقيين اللضى وبيستجدوا
الله حق النشوء وهم بيدوروا على حد يصرف وياخد النص نص اللى حيطلع يعنى
قلبت وشى و
بصيت الناحية التانية سالم ساكت و بيلعب بالجهاز وهو مقفول(الاسلكى) بس متشوق جدا
فحس حمدى بالحكإيه فقال : يا رجاله ماهو مافيش حاجة بتيجى من غير تضحيه : لا يا حمدى بيه الحكإيه دى شكلها
نصبإيه وبعدين الوسيط ما بيصرفش ارش ابيض فى الحوارات دى.
: ده لو الحكإيه
سمعتها من على القهوة انما ده الراجل بتاعى من عشر اتناشر سنه : يا حمدى كلنا تعبانين و مش حمل مصاريف
والمواضيع دى بتصرف جامد و انت عارف ولا إيه؟ قالها سالم بخبث على اساس ان حمدى
مظبط قبل كدة وحمدى عمل عبيط وكمل كلامه عادى : يا عم انا عندى اللى حيصرف بس حياخد
نسبه : لامؤخذه يا حمدى بيه . انت عندك المكان
وعندك اللى حيصرف عايزنا انا وسالم بيه فى إيه بقى؟
: لان الحوار
ده فدهيرت الباشا : عندى؟ فين؟: كل حاجة فى وقتها حلوة .. حتعرف كل
حاجه بعد ما نتفق : إيه المطلوب؟: التامين دى منطقتك
انا حظبط مع
الممول و حاوصل معه لنسبته وحبلغك .. حبلغكوا يعنى انت والباشا : هو انت اخترتنى انا ليه يا حمدى كان
ممكن تكلم سامح بيه المدير ونفوزه جامد فى الوزاره دلوقتى .
: سالم انا مش عاملك كامين وعايز اصطادك المساله ببساطه انت غاطيتنى فى ارض التجمع وانا
عايزك تكسب من ورايا .. ده طبعا غير انى حدخل معاك فى بيت ابونبيل!
ضحكت وبصيت
لسالم وقلت : مش قلتلك يا سالم حمدى بيه عارف هو عايز إيه بالظبط.
: طب مانكشف الورق انت كنت فى موضوع حامد؟: ايوه بس اخدت فتافيت لانى كنت كارت
حشر بس مش لعيب اساسى ولو تقصد ان انا اللى حمول احب اوضح انه لا واحد لعيب من اللى
كانوا لعيبه اساسيين فى بيت الحاج حامد بيشغل فلوسه.
: طيب يا
حمدى انا حقلب الموضوع فى دماغى وانت شوف النسبه بتاعت الراجل حتبقى كام ونتقابل
بكره بالليل ماشى؟
: ماشى يا باشا
ولو لاقيت انك مش عايز تلعب اعتبر كلمنا ده كله ما حصلش اصلا.
: اكيد .. سلام.
: سلام.
: سلام.
الخـط الاحـمر
...
إيه اللى
ممكن يحصل؟
سؤال سالته
لنفسى وانا قاعد فى بلكونه بيتى لما افتكرت انه بكره بالليل حاقابل ندا ودينا عند
شريف ونهى على العشاء.
الله ده انا
مافتكرتش اكلم ندا علشان ابين لها انى اقدر برضه اجيب نمرتها حتى لو هى برايفت.
هو مين بره
فى الرسبشن .. اه الولاد وفريدة نزلت مع مامتها علشان يروحوا للدكتور .. تمام.
ناديت على
يوسف : يا يوسف! : نعم يا بابا؟ : خد اخواتك و اتفرجوا على الكرتون فى
اللفنج واقفلوا عليكم الباب علشان مش عاوز دوشه حوليه ممكن يا جو؟
: حاضر يا بابا
.. بابا ممكن اخد موبايلك العب جيمز؟: لا يا بابا علشان انا مستنى تليفون.
يمشى جو وياخذ اخوته على اللفنج ويقفل عليهم الباب
..قمت مطلع نمرة ندا ومتصل .. اهه جرس ..
: الو؟ : مودموزيل ندا؟: ايوه !!! : انا واحد ماتعرافيهوش!
ضحكة رقيقة
ثم قالت : ازى حضرتك؟ انا كنت مستنيه التليفون ده من بدرى ولو حضرتك
ما كلمتنيش النهارده انا كنت حكلم حضرتك بكرة الصبح.
اتخطفت و اتبرجلت
ثم تمالكت نفسى ..
: انت عارفه
مين بيكلمك؟ : صوت حضرتك
مميز جده بالنسبه ليه حتى بالامارة انا حشوفك بكره .. اقصد حضرتك و المدام .
: لا ده انتى
مش حلوه وبس ده انت حلوة وزكيه ولماحه ..
ندا بخجل : لا زكيه ولا حاجه انا بس حفظت صوتك
.. صوت حضرتك مميز فعلا .
جلال مد
رجليه على الترابيزه اللى امامه و ريح فى الكرسى واستكنيص (مصطلح يدل على الراحه
بزياده) وقال
: طب انت كنت
مستنيه تليفونى ليه؟ محنا كنا حنتقابل عند شريف؟ : الحقيقه انا كنت عايزه اعتزرلك على التليفون
قبل ما اشوفك .. يعنى قبل ما نتقابل لحسن تحرجنى وجها لوجه واتصدم من المقابلة ..
يعنى : تتصدمى من إيه ؟: لا اقصد يعنى اتحرج . مش عارفه!!!
: انت شايفه انى
وحش اوى كده ؟ يعنى مودموازيل شيك وحلوه زيك ينفع تعتزر لحد ويحرجها؟
ندا بمرح : انت بتعاكسنى ولا بتوصفنى؟ : طبعا بعاكسك ..
صمت . سكوت ..
سكون ..
: إيه يا
بنتى انت رحت فين ؟
ندا مرتبكه
...
: انا اهوه .
انا موجوده . اهوه . اهوه : امال سكتى خالص افتكرت شحنك خلص وكنت حضطر ابعتلك رصيد ..
يعنى : لا انا اهوه
: لا ده انت
فالطراوه . شحن إيه؟مش انا اللى متصل بيكى؟ : اه اه صحيح : طيب اسيبك بقى علشان شكلك مشغوله .
ندا بسرعه: لا لا انا ماعنديش حاجة اعملها ... اقصد
يعنى مافيش حاجة ورإيه : ولا قدامك؟ : لا خالص هو حضرتك ممكن اسالك سؤال؟
:محرج ولا مش
محرج؟ : مش عارفه ! : طب قولى يا ستى : هو انت عندك كام سنه؟ : قد بباكى ويمكن اكبر : لا بجد؟ : تدينى كام سنه؟
: يعنى نص التلاتينات؟
: الله يكرمك .. انا خمسه واربعين وماشى
فى السته واربعين : لا يمكن ده
انا قلت نص التلاتينات علشان انت عضو برلمان ... ضاحكا: انا مش عضو برلمان .. شريف كان
بيضحك عليك انا مصور فى السيما : بتتكلم بجد؟ :إيه؟
: زعلتى انى
مش فى البرلمان؟ : لا خالص بالعكس
بس اصل شكلك سينتور خالص.
ضحكت وسكت
شويه وقلت لها : إيه؟ سكتى
ليه؟ :اصلى فجاة حسيت انى اعرفك من سنين وعايزة
اتكلم معاك عن حياتى و....
واتحاش صوتها
و اتخنقت بالعياط :انا مفتقده الاب
يا جلال .. ممكن اقولك يا جلال؟ : طبعا بس انت مش باباك موجود؟
: لا .. ده جوز ماما:انا اسف هو والدك متوفى؟:يعنى .. انا مخنوقه شويه .. انا ممكن
اقابلك دلوقتى ؟ ممكن؟:ندا احنا كده صح ؟ انا برضه عايز اشوفك بس خايف انجرف فى
سكه انا مش ادها :جلال انا كل
الحكإيه انى لاول مرة ارتاح لحد بالسرعة دى وعندى كلام كتير نفسى اخرجه بقى :انا خايف عليك قبل ما اخاف على نفسى :جلال انت حنين جدا:انت فين ؟:انا عند نهى ونازله.
:يعنى نهى سامعه
كل ده؟:لا لا هى بتحضر الاكل لشريف:OK
:اشوفك فين؟:معاك السواق؟:لا:قابلينى فى الخط الاحمر بعد نص ساعة: دى الكوفى شوب اللى فى اخر المقطم؟ : ايوه!
: ماشى باى
مؤقت : باى.
رن الموبايل
تانى : الو؟ : عايزك دلوقتى حالا عدى على فى البيت
: ليه يا عم سالم؟ : حتعرف لما تيجى : بس انا عندى مشوار
مهم : اجل اى حاجه و تعالى : طب حيبقى معايا واحدة : مين انت مصاحب ولا إيه؟ : لا لا دى الNA : يا راجل !! : والله : اه بس احنا يمكن نتاخر و بعدين البت دى امان؟ : ايوه ماتخافش : انت لسه عارفها من كام
ساعه وادتك بالصاعق : لا دى مش هيه دى صحبتها : عموما مش مشكله بس انت المسؤل :OK سلام : سلام .
ندا ازيك؟ انا
جلال : هاى جلال ماتقوليش اننا مش حنقدر نتقابل ... اصل انا نزلت خلاص! : لا انا فالسكه
بس فيه تعديله : مكان تانى؟
: لا مضطر
اننا نمر على واحد صحبى ضرورى الاول! ..... صمت.
: لا انتى
فهمتينى غلط انت حتفضلى فى العربية وانا حطلع له لانه عايزنى ضرورى و بعدين نروح
نقعد فى اى مكان.
ارتياح فى
صوت ندا وزفير طويل : اه طبعا مافيش مشكله : OK حقابلك فى الكوربه
تركنى عربيتك وتركبى معى : OK : باى : باى.
رحت علشان اخد
ندا والمرة دى كان شكلها احلى بكتير موزه موزه يعنى و كان شكلها اكبر شويه مش عارف
ده من المكياج ولا انا اللى ما شوفتهاش كويس.
حاسس قلبى
بيدق جامد مش عارف ليه بس مبسوط و حابب جدا الحاله دى .. بس حب بخوف حاسس انى بعمل
حاجه غلط او داخل على انى اعمل حاجه غلط .. نصيبه لا يكون هى دى ازمة منتصف العمر اللى
كنت بتكلم عليها دائما مع اصحابى .... لا بس انا عاقل مش معقوله اقع فى المطب ده .
اصل الراجل
لما بيعدى الاربعين بيبتدى يحس انه كبر وان
خلاص ما فيش واحده ممكن تبص له وخصوصا لو مراته هملاه فيبتدى يحاول يسترجع شبابه لان
فى التلاتينات الراجل بيبقى همه كله انه يأمن مستقبل كويس وبينسى نفسه خالص ويرجع يفتكرها
بعد الاربعين ويبتدى يهتم بنفسه يعنى شويت جيم (جمنيزيوم) وسونا و اللبس يتغير و الشعر
وطريقة حلاقه الذقن يعنى يربى سكسوكه او
يحلق شنبه المهم يعمل نيو لوك و يقعد يتلمس اى نظرة انثويه او حركه حتى لو هو متاكد
انها عفويه وغير مقصوده بس هو بقى يعيش معاها ولو واحد صاحبه قاله دى فلانه شكلها
معجبة يا كبير يقول بسرعا : معقولة؟ لا يا شيخ بلاش حركات : والله يا ابنى بص بتعمل
ازاى كل ما تشوفك؟
الغريبه انك
بتصدق رغم انك شبه متاكد انه بيشتغلك اصلا.
اما بالنسبة
لى انا لا مراتى هملانى ولا هى وحشة لا من برة ولا من جوه ولله الحمد وده بيخلينى
ماليش حجة.
كل ده جرى
فى راسى فى الثوانى اللى نزلت فيها ندا من عربيتها و قفلتها وركبت عربيتى لابسه
حتت دين فستان شيك ومحتشم احمر مقلم باقلام سوداء عريضه على حزاء اسود بكعب عالى.
لا لا يا
معلم ده معاد مش مقابله عاديه ... البنت دى حتاخدنى فى الحته الضلمه اللى فى عقل
كل راجل ...
الحته اللى
دائما بيخبيها من كل الناس اللى فيها المصاحبة و الرفق و الجواز العرفى والذى منه.
: لا يا اخى انت
دائما سودوى كده؟ الحكإيه كلها ان البنت دى مفتقدة الاب وانت اب مودرن!
: لا يا شيخ انت
حر بس خلى فريدة فى دماغك وبين عنيك وما تنسهاش.
: يا عم فريدة دى حياتى اللى لو خرجت منى ابقى انا مت : انا عارفك بتتسحب خد بالك.
: انا خفت
فعلا لا انا مش حشوفها تانى احسن وانا احط نفسى فالاختبار ده ليه؟
احسن حاجة الغى
دلوقتى اقولها مثلا ان البيت كلمونى و ان اخى عيان جدا (بعد الشر عليه الف مرة) و اسبها
و امشى.
: صح كده.
اقتربت ندا
من العربية وفتحت الباب وجلست بجوارى وعبق عطرها النفاذ فى العربية وفى صدرى وقالت
برقة ...
: مساء الخير يا جلال : مساء .... احم مساء الخير : اتاخرت عليك؟
: لا خالص انا
لسه واصله و لقيت ركنه على طول : بس إيه الجمال ده انت كنت حتسهرى مع صحابك؟
: لا انا
غيرت عند نهى هى نفس مقاسى .. اصل القهوة وقعت على الجينز فغيرت.
: بس حلو الفستان
عليك : فعلاً؟ خلاص حاخده من نهى يلا بينا؟
: اه يلا .
ودورت الموتور
زى المسحور .. لا اتحججت ولا لغيت ولا حاجه!
والله الرجاله
دول غلابه بشويه رقه و جمال عادى حتى ممكن يهدوا روما و يسهدموا قصر عبدين و
يستصلحوا الصحراء الغربيه .
تصدقوا فكره
..
نجيب الفين
شاب و الفين بنت و برميلين حنيه مع الفين شقه منخفضة التكاليف حتى ونرميهم فى الواحات.
تستلموا يا
معلمين الصحراء مزروعه قمح بعد سنه.
وتستلموا كمان
الفين رضيع.
واى خدمه يا
حكومة .. خلينا احنا نرمى الافكار كده.
: ندا انا
نسيت اسالك هو انت عندك كام سنه؟ : ده سؤال يتسال لمدمزيل شيك كه زيى؟ ماهو لانك مدموزيل
وشيك بسالك لان الست بتخبى عمرها بعد التلاتين و انت لسه .. ولا إيه؟
وضحكت فضحكت
ندا وقالت: انت تدينى كام سنه ؟ : انا عن نفسى اديك براءه!
فضحكت و قالت
: لا صحيح؟ : يعنى ممكن تلاته و عشرين مثلا : الله
يخليك : إيه؟
: انا حتم تمانيه
و عشرين سنه يوم خمستاشر الشهر اللى جاى.
: لا؟ : والله.
: والرجاله سيبينك كده من غير جواز ازاى؟
: لا مهو انا
لسه متطلقه من شهرين يعنى .. ما كنتش مناسب له.
يا نهار اسود
دى مُطلقه كمان : شفت يا عم الحاج
انا مش قلتلك حتتسحب البس بقى! : انا فعلا شكلى حلبس البيجامه .. الموضوع متسهل للرزيله بس
لا انت فعلا همجى وحمار هى كل واحده مطلقه خرجت مع واحد تبقى سهله؟ : طبعا يا بنى
هو مش لو اجتمع راجل و ست الشطان بيجلهم على طول؟ : يعنى الشطان فاضى لى بقى مستنى انى اجتمع
يا عم بقى!
: انت شكلك
حتخبط انا ماشى اولع بقى
: يا عم روح
بلا تخلف .... : تخلف؟؟ هو إيه اللى تخلف؟ انى اتطلقت؟
انا اتخطفت
طبعا اظاهر انى قلت تخلف بصوت عالى!
فقلت: لا لا انا اقصد ان طليقك ده متخلف فيه
حد يسيب بنت امورة كده؟ وقبل عيد ميلادك بشهرين؟ ندا صامته وشارده .
: اسف اذا
كنت فكرتك : لا خالص ده انا مبسوطة انا دفعتله علشان
اخلص منه : كمان ! : كمان : عموما طالما انت مبسوطة خلاص .
وصلنا عند
بيت سالم ركنت العربية وقلت لها : ندا انا طالع مش حغيب : هو انا ممكن اطلع معاك؟ انا مش عارفه
انا بثق فيك كده ليه؟ بس انا بثق فيك جدا حقيقى وخلاص : انت فعلا عايزة تيجى معى؟ : لو ده مافيهوش احراج لك! : لا خالص بس حقوله : OK !
طلعت
الموبايل وكلمت سالم.
: الو سالم بقول
لك إيه؟ انا وصلت وندا حتطلع معى ... عادى؟ OK سلام لا انا
تحت العمارة سلام.
: فيه حاجه؟ : لا
اصل مراته فوق فقلت له عادى يعنى نطلع؟ : خايف يعنى لا مراته تقول لمراتك : لا انا عادى و قريب حعرفك على مراتى
اصلاً : يا ريت! اكيد حتطلع لطيفة طالما حبيتها وعايش معاها كل السنين
دى.
(هو فيه إيه
بقى؟)
قلت لها: اكيد طبعاً ... يلا اتفضلى نطلع.
رنيت الجرس
صوت سالم: ايوه ... فتح الباب و اولاده حوله : اهلا اهلا : ازيك يا سالم؟ ندا صديقتى الصغيرة .
ضحك سالم وقال: اهلا ندا اتفضلوا انا جى حالاً ودخل على جوه واحنا دخلنا على الانتريه.
صوت سالم: يلا ادخلوا يا ولاد سلموا على عمكم جلال
وطنط ندا وادخلوا اتفرجوا على الكرتون جوه.
فضحكت فشاورت لى ندا بمعنى ليه بضحك؟ فقلت لها:
الظاهر كل الاباء
بيقولوا نفس الكلام (روحوا اتفرجوا على الكرتون).
فضحكت وقالت: انا ما خلفتش اولاد فماعرفش : يا سيتى انت لسه صغيرة بكرة تتجوزى
وتخلفى و تندمى.
فضحكت و قالت
: ليه انت ندمان؟ : لا طبعا انا عندى
خمس اولاد ولو رجع بي الزمن برضه حأخلف خمسه : بسم الله ما شاء الله.
: اه انا راجل
منتج .. منتج سينمائى : ولا عضو برلمان؟ وضحكت فضحكت.
دخل سالم معاه
الكيك والشاى فقلت: ياسيدى على
الرجاله الشديده هو ده التعاون المنزلى امال المدام فين؟ : بتلعب بوكر مع صحابها : إيه يا كبير ضحك وقال: جيه يا سيدى بتصلى وجيه : اه اظبط كده : ازيك يا ندا؟ : الحمد لله : شايك إيه؟ : لا عنك انت بقى : انت يا ابنى مش مابتشربش شاى : ايوه بس حضايفكم : ناديه حتعملك القهوة لانى ما بعرفش اعملها
: ok : كام سكر يا ندا؟ : تلاته : وانت يا سالم تسعة طبعا !! : لا خمسه بس : اتفضلوا كيك دى ناديه اللى عملاه فى
البيت : يبقى اكيد حلو : مرسى شايف الزوق يا زوق.
: خلص يا عم
سالم إيه الموضوع : خد بالك ان
ناديه ما تعرفش اى حاجة. ندا مش فاهمة و انا قلت: ok.
دخلت ناديه مراته
سلمت وحطت القهوة واستاذنت ان مامتها عندها وسيباها فى الحمام ولازم تروح لها
لاتبرد فقلنا لها اتفضلى!
بصيت انا و
ندا لبعض و ابتسم سالم ابتسامه ساذجه وقال: اصل انا قلتلها اننا حنتكلم فى مواضيع
خاصة وما ينفعش تقعد .
: إيه يا عم الحكإيه؟
بص سالم على ندا فقلت: ما انا قلتلك بقى على التليفون يا عم سالم ندا يعنى انا
.. خلاص؟
: ابتسمت ندا و ريحت فى الكرسى قال سالم: دلوقتى احنا لازم نتحرك بسرعه : نعمل إيه يعنى؟ : عندك الجهه جاهزة ؟ : اى وقت .. حطت ندا ساق على ساق و قالت: اثار؟ انا وسالم بصينا لبعض و سكتنا
: مالكوا مخضوضين ومستغربين؟ يا جماعة
مصر كلها بتجرى فى المواضيع دى!
دى فاضل تنزل فالبرصة .. انا عندى جهة و جامدة
توريك فلوس على الcd لو اصلى طبعا.
: اى خدمه يا
عم سالم جايب لك معايا معلم كبير اهه .
ضحكنا كلنا ماهو
كلنا نفس الكار بقى واحلوت القاعدة مع الكيك ودخل سالم بحماس جاب بلوك نوت علشان
يكتب كل الكلام يعنى بيعمل محضر للجلسه وحسيت اننا تمازجنا واختلطت مشاعرنا معا وهدفنا
الان واحد.
: طيب جلال احنا حنروح نقابل واحد
دلوقتى عنده مكان واقفين على قشرة و يبقوا على الباب و عايز شيخ يفتح وجهة تشيل الشغل.
: بعد اذنكم انا
عندى جهة وهى الوحيدة اللى بتشترى بعد الثورة لانهم كلهم اختفوا بعد الكبار ما اتمسك
منهم كتير.
: وانا عندى الشيخ
الجامد اللى يخلص فى الحكإيه : على كلامكم ده يعنى احنا ممكن نفتح ونبيع بكره بعده!
: كده تفضحنا
قدام المعلم ندا .. ضحكت ندا جدا وقالت: ليه؟ طالما عندنا الجهه والشيخ و المكان
يبقى إيه المشكل؟سالم بيه عنده حق! : اه ده انا قاعد مع تلامذة بقى .. طب اسمعوا الدنيا
بتمشى ازاى .... الاول المكان ده فين ؟ : سوهاج المكان فى سوهاج!
: سوهاج ..
تمام .. بصوا بقى الحكإيه تبدا بالشيخ
بيروح يطهر المكان : يعنى إيه؟ : اقولك يا سيتى كل مكان او مقبرة ليه
حرس اسمهم الرصد : ايوه انا عارف
الحكإيه دى!
: كويس .. الرصد
ده بيتحط علشان يحرس المقبرة وكل شيخ جه على المقبرة وما فتحهاش لاى سبب من
الاسباب بيسيب الخدمه اللى معاه فى المكان علشان يقدر يعرف اللى بيحصل فى المكان.
منهم العلوى
ومنهم السفلى فلازم الشيخ اللى حيفتح يطهر المكان الاول يعنى يصرف كل الجان
الموجود بما فيهم الرصد اللى هم الحرس بتاع المكان .. و بعدين بيحدد مكان فى باب
المقبرة بيكون فوق علشان يعمل اول ثُقب صغير سمك قلم رصاص علشان ينفس المقبرة.
: يعنى إيه
ينفس المكان؟ : لو جبنا كوب من الذبادى وتركناه مبرشم لمدة شهر مثلا .. لما نيجى
نفتحه حنسمع صوت زى ما نفتح قزازة بيبسى لان البكتريا بداخله نمت وكترت جداً .. المكان
ده مقفول بقاله الف سنه مثلا تخيلى البكتيريا اللى جوه بقى حجمها قد إيه؟
الف سنه
بتتكاثر وبتنتج غاز مع الكتمه اكنك بتفتحى اتنين لتر بيبسى بعد ما راجيت الزجاجة و
اللى بيعمل الخورم ده بيبقى ارفع واسرع عامل علشان يجرى بره بسرع جدا والا..... : تمام المهم ... : استنى يا عم سالم ... بيسيبوا المكان يومين و ينزل يعمل ثُقب
تانى وهاكذا دواليك لغايت ما المقبرة تتهوى فيفتحوا الباب و يدخلوا.
: حلو الكلام
.. قول لى بقى الجهة بتدخل امتى؟ بعد ما احنا نصور المكان من برة لغاية جوه والتصوير
لا ينقطع حتى نطلع من المكان علشان يبقى التصوير
(one shot) علشان الجهه تتاكد ان المكان ده من بره هو من جوه : بس كده؟ : لا طبعا!
: امال يا جلال
كمل!
: بنطلع فى التصوير
حاجة تكون خاصة بنا زى ساعتك او خاتمك ويكون معاك الحاجة دى لما تعرض الcd على الجهه وبنحط كمان جرنال اليوم لاثبات التاريخ علشان يعرفوا ان التصوير
ده حديث.
: كده خلاص
يا معلم ولا لسه؟ : لسه طبعاً
... الاول بيشوفوا التصوير و الخبير بيحكم عليه 70% او 80% انه اصلى بعد كده
بيطلبوا مننا صاحب المكان لانهم ما بيتعملوش مع الوسطاء : هما مين دول؟ : ندا؟ انا بتكلم على الجهه طبعا : انا كل علاقتى بالجهة ان جوز ماما
بيعرفهم بشكل مباشر وكل اللى اعرفه انهم بيورونا فلوس على التصوير لو التصوير سليم
... عمو مخلص معاهم قبل كده.
: هممم ok يعنى انت الوسيط
قبل المباشر! : لا انا
عرفت الحكإيه بالصدفه من عمو سمير مدير مكتب جوز ماما ايام ما كان مدير مكتبه. : هو مات؟ لا يا سالم بيه هو بنى قرية
سياحية جنب قرية عمو .
: المهم بنجيب صاحب المكان ويتفقوا معاه
على السعر ويروح الخبير يطابق التصوير على الواقع : احنا بنكون معه؟ لا مش شرط اننا
نروح احنا سماسرة او وسطاء بينتهى دورنا لما بنوصل الجهة بصاحب المكان .. احنا
بنقبض من الجهة يا حبيبتى ....
احمرت ندا علشان قلتلها حبيبتى
فقلت:
حبيبتى دى
كلمه ورثتها من ابويه (الله يرحمه) وبقولها لكل الناس وانت زى بنتى ممكن اقولهالك : شكرا للتوضيح خلص احنا حنمسك الفلوس
امتى؟ : اهداء يا سالم وقول هديت : يا سيدى هديت ها الفلوس امتى؟ : الفلوس بتسألنا الجهة عيزينها بانهى
عملة وفين برة مصر ولا جوه : كل واحد بمزاجه؟ : لا يا حبيبتى طبعا كل الوسطاء مع
بعض : طب هما بياخدوا حاجاتهم ازاى؟ : بياخدوا مبايعه من صاحب المكان سواء
كان بيت ولا ارض وبعد ما بيخدوا الشغل بيقطعوا المبايعة او يرجعوها لصاحب المكان.
:طيب انت متخيل نصيب كل واحد يبقى كام؟
: يا سالم ده قليله كتير يعنى لو طلع
لك واحد اخضر وحش؟ : ارنب يعنى؟ اه ارنب مليون دولار يعنى وحش؟ : ده يبقى فضل وعادل وتبقى عادت .. ده
انا اخرب الدنيا سته مليون مصرى الله الله الله : انت ممكن يطلعلك اكتر حسب نوع المقبرة
ملكى ولا إيه او لملك مهم او لم يكتشف له شىء من قبل وكمان مع التقسيم على عدد الوسطاء!
: لا انا احبس
كل الوسطاء او اديهم شوية فكه : لا يا امور احنا عايزين ربنا يبارك وتم : ماشى يا كبير المهم دلوقتى الراجل
بتاعنا عنده فرح فى امبابه و ما أعتقدش ندا ممكن تيجى! : ليه بقى ان شاء الله مش انا شريكة
ولا إيه؟ : طبعاً بس ندا ده فرح بلدى فى حته
شعبية.
: ممكن جلال
ياخودنى اغير واروح معاكم!
ميل على سالم
ووشوشنى : دى قاطعة يا معلم يلا الله يبركلك : يلا !! : يا عم مش حنبصلك فالموزه خلاص بس
شوفلى البت اللى كانت معاها ... : إيه بتتفقوا على ولا إيه؟ : لا انا كنت بقوله اشوفلك حاجة من
عند مراتى لو تحبى يعنى؟ : آه افتكرتك مش عايزنى احضر . :بقولك قاطعة : هاه؟ :لا يا حبيبتى بيقول لى ان الشوز مش
حيلاقى عنده مقاسك لان مراته رجلها كبيرة : بس انا شايف ان الشوز تمام. : لا ممكن فالسكه اشترى واحده ولا إيه
يا جلال؟ اه ممكن طبعاً.
بصوت واطى
زى صاحبه سالم قال لى : البس يا حلو اشترى بقى وانبسط.
: بس يا واطى
هات معاك فلوس علشان لو اتزنقت ويلا روح هات
الجينز وشوف لى سكة علشان نسيب ندا تغير : حالا .. دقيقه واحدة.
سرحت فى حياة
سالم ظابط كبير ووارث وبرضه مزنوق .. اراهن ان الحلوة مراته بتلعب بوكر وخاربه بيت
الواد .. ماهو مش معقول انه يبقى ملهوف على الفلوس كده الا اذا كان فيه إنه فى الموضوع
.. يلا دع الخلق للخالق .
وقفنا فى السكه
جبنا لندا شوز والحمد لله انها اصرت انها تدفع والا كنت حستلف من سالم .. ركبنا
عربية سالم مع انها كانت قالتلى فالاسنسير وحنا نزلين من عند سالم اننا نروح
بعربيتى بس سالم اقترح نروح بعربيته على اساس شرطة وكده يعنى الامر مايسلمش احنا
ريحين امبابه.
الفرح فرحنا
...
وصلنا الفرح
بعد مشوار كبير وكانت المفاجأة.
مسرح قد
مسرح الجمهورية معمول فى ساحة كبيرة وامة لا اله الا الله كلها موجوده والدنيا خربانة.
دى حقيقة المشهد
.. وبرضه الاغنيه اللى شغاله على المسرح (الدنيا خربانه يا عم خربانه) الحشيش يا
شباب هنا فى الفرح اكتر بكتير من اللى شوفتوه فى فيلم الفرح و الفرح نفسه قد اللى
فى الفيلم خمس مرات.
على الموبايل
سالم جاب عم نسيم الحاج صاحب الليله دى كلها .. فرح بنته على ابن عمها .. دخل الحج
نسيم علينا والمطرب بيقول (غلطان و مائة مليون غلطان .. اللى يعامل الناس بأمان ..
ويقول ده طيب وده غلبان .. ويسيب حقه لحد).
عم نسيم راجل
عنده بتاع خمسين خمسه وخمسين سنه بس عفى لابس جلبية صعيدى فاخرة والعمة واللاسة
الجوخ.
:اهلا اهلا اهلا
بالبشوات .. سلام عليكوا .. ازي حضرتك يا ست : اهلا يا عم نسيم : اهلا يا حاج إيه الجمال ده؟
: اهو بنحاول
نفرح الناس ونفرحوا معاهم .. سالم ضاحكا : إيه يا عم نسيم انت داخل الانتخابات
ولا إيه؟
: والله يا باشا
اتحيلوا على ردالة الحته بس انا مش عايز بلا خوته وقلبة راس ولو ادخل يبجى ادخل عندنا
فى البلد .
:طب تعالى نقعد على جنب شويه علشان
نخلص فالسريع عشان عندى شغل بكره : لا يا باشا بكرة ادازة (اجازة) !: اجازة إيه يا عم الحاج مين قال؟ : انا اللى بجول يا باشا .. فرح بتى وابن
اخوى لازمن يبقى ادازة .. تعالى بس نجعد نشرب حاده لغايت مايدهزوا لنا الجعدة
بتعتنا : ماشى يا حاج : اتفضلوا اتفضلوا ده انتم نورتونا النهارده
والله.
قعدنا فى
مدخل الفرح على جنب وشربنا قهوة و ببسى وشاى و شيشه انا وسالم كل شويه يسبنا عم
نسيم ويروح يسلم على المعازيم اللى جايين من كل حته فى مصر معلمين و افنديه وبشوات
من كل شكل ولون ومله من كل حته فى مصر.
جه الحاج
نسيم واحنا كلنا فطسانين من الضحك لان المطرب ساب (انا شارب سجارة بنى وقاعد دماغى
بتكولنى) اللى كانت فى فيلم الفرح وقال إيه بقى ....
(انا شارب
تلته ستلا ويجى كمان تمانيه ID .. وانا راجل اوى
مش قله .. انا عامل دماغ ارايش علشان ما بقاش فى حشيش).
زى الفل باين
الارايش حتغلا اليومين دول.
قمنا مع الحاج
نسيم لاقيت ندا بتتشعبط فى ايدى وقالت لى: انا اول مرة اشوف الحاجات دى خلينى امسك
فيك : امسك يا حبيبتى ولا يهمك انا زى بابى
برضه فضحكت واتشعبطت اكتر فى دراعى.
دخلنا على صوان صغير قاعد فيه حوالى خمسين واحد
وواحده معلمين من كل لون .. حشيش .. بيرة .. خمرة كل من له مزاج مزاجه موجود من التوسيفان
بتاع الكحه للبودره كل الدنيا موجوده انت بس اطلب وأتكيف.
دى القعدة
بتاعت الكبار يعنى!
حسيت اننا داخلين
على كفار قريش ومطرب شغال على الناعم للسلطنة للمعلمين اللى قاعدين وبيقول موال .. (الحكإيه
مش حكاية قلب خاين سابنى فى وسط الطريق .. الاصعب من الخيانة لما تيجى من الصديق ..
شكلك إيه إيه إيه لما الدنيا تقول انك غشاش ولا تبيع صحبك علشان واحده ما تسواش) .
رمينا السلام لقفه كل واحد على راحته وبالتالى كل واحد رد السلام
فى وقت مختلف .. صطل بقى .
قعدنا على
تربيزة عليها وسكى وبيرة مشبره ومزات والتلج حضر وهوب ... دخلوا علينا بالجوز طبعا
انا و ندا اعتزرنا وسالم دخل خد نفسين وكفى (يعنى استكفى).
بص سالم
للحاج نسيم وقال : تمام يا حاج كده .. نتكلم فى الجد بقى : لا يا باشا الكلام بعد الوكل: لا اكل إيه لا ده احنا اصلنا ....
: علي الطلاج
ما يحصل ... : يا سيدى احنا بس حنقول كلمتين و نتوكل على الله علشان انا .... : والله ما يحصل .. خبر إيه يا باشا احنا
ناس صعايده .. انت مستجل بينا ولا إيه؟ : يا حجوج انت ابو الكرم بس .... :يا باشا حتى علشان الضيوف اللى معاك
على الاجل!
: دول اصحابى
وشركائى والمساله فى بيتها يعنى : يا باشا انت وصُحبتك فوج رسنا من فوج تاخدوا واجبكم كامل
و بعدين نتحدت ماشى؟ كلنا فى صوت واحد: ماشى يا حاج : يكون كمان الحاج ركابى وصل .. هو فى
الطريق ولازم يحاضر الكلام : ماشى يا حاج.
بص لى سالم
فقلبت شفتى بمعنى الامر لله وقام الحاج يسلم على ناس ..
ميلت على ندا
وقلت لها هامسا: اخبار التاخير
عنك فى البيت إيه؟ فقالت لى بهمس : لا اصل ماما وعمو فى العين السخنه ودادا انا قلت لها تنام
على اساس انى حبات عند دينا النهارده يعنى مافيش مشكله : همم قاطعة يعنى؟ : وبعدين وانا معاك انا مش قلقانه مش
عارفه ليه مع ان النهارده اول يوم اخرج معاك بس متطمنه وحاسة انك راجل بجد.
ابتسمت
وركبنى الخوف لان الحنيه دى تخلى الحجر ينطق وانا راجل حنين ودمعتى قريبه وقلبى
قلب خصإيه.
ربنا يستر ويعدى
الحكاية دى على بخير.
وجائت مرحله
المدح وهو نوع من انواع الغناء واشهر انواع المدح هو المدح النبوى ... وانا بحب المدح جداً.
طبعا كلنا عارفين
ان الصعيده ملوك المدح فتخيلوا ان عم نسيم باعت يجيب المداحين من قنا وسوهاج ... والكلام
إيه بقى؟
(يا رب .. والله
ما طلعت شمس ولا غروبة .. الا وحبك مقرون بانفاسى .. ولا تنفست مسروراً ومكتأباً الا
وانت صهيلى بين انفاسى .. ولا شربت شراب الماء من عطشً الا رأيت خيال منك فى الكاسِ
.. اكاد من فرط الجمال فرط الجمال اذوبوا .. هل يا حبيب فى رضاك .. فى رضاك نصيبُ
.. جعلت قلبى يهفوا دوما للقاء واذا ذكرتُ يا حبيبى ... يا حبيبى اطيبوا بمجرد الاذكار
قلبى هائم).
من حلاوتها كان
نفسى اكتبها وأحفظها .
دمعت عيناى ولاحظت ندا فطبطبت على كتفى وسألتنى : مالك يا جلال؟
: مافيش .. انا
اصلى بحب المدح و حاسس انى فرحان جدا فدمعت من الطرب ... فرفعت يدى و قبلتها بنعومة
وتلقائية وانهارت دموعى على خدى من الشجن والوجد .. كان نفسى تكون فريدة موجوده علشان
احضنها واعيط فى حضنها .. عايز اكلمها واقولها انى اسف انها مش هى اللى جنبى فى اللحظة
دى والمداح بيقول : اكُل ما هتف الاحبه باسمه .. رف الفؤاد وشاقنى المحبوب .. اهيم
فى لقيه كيف وصاله.
وفجأة استاذنت من ندا وسالم وقمت : رايح فين؟ : جى حالا.
: الو .. فريدة
ازيك : الحمد لله انت فين؟ إيه الدوشه دى؟ : انا فى فرح فى امبابه مع سالم : مالك يا جلال؟ مافيش بس حبيت اسمع
صوتك : جلال مالك؟ ماتخضنيش : مافيش يا حبيبتى بس حبيت اسمع صوتك
واقولك انى بحبك جدا : لا جلال انت مش كويس انت فيه حاجه! : لا والله يا حبيبتى بس كنت بسمع مدح
وافتكرتك وحسيت انك وحشانى ومن الطرب اتمنيت تكونى موجوده بس .... بس للاسف انت
بعيده عنى دلوقتى و .... وقلبى واجعنى : جلال انت بتعيط؟ ........... : لا يا حبيبتى انت بس وحشانى علشان
بقالنا كتير فى مشاكل وما بنتكلمش غير فيها بس ... بس ان شاء الله لابد من فرج الله
لابد من فرج الله .. وحترجع ايامنا تحلو تانى ..... انت بتعيطى ليه دلوقتى انت
بتعيطى على عياطى؟ : اصلى عايزه اخدك فى حضنى دلوقتى وافضل ابوس فيك – خدى اى
جلال من اللى عندك فى البيت ما انا سايبلك خمسه جلال فى البيت.
: لا يا
حبيبى انا ما عنديش غير جلال واحد بس ... : طيب خلاص بقى كفإيه عياط الكارت
بيصفر والخط حيقطع ومش عايز اسيبك وانت كده : لا يا حبيبى انا كويسه ربنا يرجعك
لينا بالسلامه : لا كده
حعيط تانى .. يلا يا بت امشى بقى : خد بالك من نفسك!
: حاضر ... باى
: باى يا حبيبى لا اله الا الله : محمد رسول الله.
وقسوة التنهيد
والوحدة والتسهيد لسه ما همش بعيد ... الله يا سومه .. بس اللى بيغنيها طبعا
جرثومة مش سومه .. مطرب بتلاته شلن بيغنى فى الفرح بره احنا اصلنا قاعدين فى الصوان بتاعنا .. صوان الكبار
وعلية القوم.
رجعت لاقيت
ندا عينها على باب الصوان اول ما دخلت عنيها دمعت واول ما قعدت مسكت ايدى وعصرتها
و هى بتقول لى : كلمتها؟ : هى مين؟ : انت كويس؟ : انا تمام انت مدمعه كدى ليه؟ : مش عارفه؟ : هو الدخان هنا كتير :انا اتصطلت خالص: تيجى نتمشى شويه نبص على الفرح بره
؟ مالحقتش اقول لسالم اننا حنتمشى شويه ودخل الحاج نسيم ومعه راجل قده فى السن
تقريبا ده الحاج ركابى وصل.
:السلام
عليكم : سلام و حمه الله وبركاته. قمنا كلنا
بس ندا جت تقوم ماادرتش اتصطلت فعلا والحقيقه وهى واقفه زى وهى قاعده لانها قصيرة
ورفيعه مش عارف كانت متجوزة ازاى دى؟
سلمنا على الراجل طول بعرض وله
هيبه وشنب يقف عليه الصجر زى مابيقولوا بس بسيط لابس عبإيه صعيدى وشال .
: الحاج ركابى
اخوى الكبير وصاحبى وشريكى. كلنا: اهلا وسهلا : حمد الله بالسلامه يا حاج : الله يسلمكم يا بشاوات معلهش اتاخرت
عليكم اعزرونا الطريق كان وحش وانا كنت لازم اكون اول واحد موجود بس كنت برتب الليله
اللى حتبقى فى البلد : ماهو الحاج يبقى ابو العريس و احنا عاملين ليله هنا لناسنا
اللى هنا و واحده فى البلد للاهل والاحباب : ولا يهمك وحمد الله على السلامه.
: الله يسلمك
يا باشا : الباشا يبقى سالم باشا اللى كلمتك
عنه يا حاج والراجل الطيب ده جلال بيه والهانم يبقوا شركاته.
: يا الف اهلا
وسهلا : اهلا بيك يا حاج : نحط الوكل بجى يا حاج لحسن احنا
جوعنا البشوات خالص .. رديت انا وسالم فى وقت واحد ....
: لا خالص يا
حاج والله : تلاقيك ماكلتش حاجه انت كمانى من وانت
فى البلد يا حاج : لا والله ما
اكلت من فطار الحاجة الصبح بس شربت شاى كتير : اصل الحاج ركابى بيحب ينزل مصر
بعربيته ..عنده لادكروزر التيوتا كبيرة انما طيار : لا منا حديها لطايع ولدى النهارده
لجل ما يفسح بجى عروسته : وانت يا حاج؟ : الاستاذ مدنى ولد عمنا حيجيب لى الجديدة
: جبت إيه يا حاج؟ فورد اشبشن باينى منا عارف ولا إيه اهو حيجيبها الفجر من اسكندرية
وييجى ما انا حرجع بيها البلد بكره : مبروك يا حاج : الله يبارك فيكم : يديك خيرها ويحميك من شرها : الله يبارك لكم .
: اهه الوكل وصل اهه.
خلصنا الاكل
او الوليمه من غير وصف فيها كل اصناف و صنوف الاكل صعيدى وبحرى وبدوى واللحوم اساس
الموضوع مع المحاشى والمكرونات و الخضار من الاخر بطنى وجعتنى و سالم ريح حزام البنطلون
اما ندا فتقريبا نامت على كتفى بعد الشاى مباشرة هبو حشيش اتصطلت وضربت اكل و الشاى
شغل الحشيش خلاها فى الطراوه.
: سالم .. سالم
: إيه؟ : عايزين نتكلم بقى لحسن خلاص حنام خالص
: ندا نامت اصلا : لا انا صاحيه بس دايخه شويه وعينى
بتوجعنى بس تمام التمام. وغمضت وهى ناسيه ابتسامه على وشها
: بقول يا حاج
نسيم نخلى الكلام بقى يوم تانى : لا يوم تانى إيه؟ احنا مسافرين بكره كلنا وانتم معانا اهو
تشوفوا كل حاجه على الطبيعة.
:لا لا يا حاج سفر إيه انا عندى شغل
بكرة وجلال بيه كمان مش حينفع .. خليها لما
ترجع بالسلامه : يا باشا انت
كده كده كنت حتروح تشوف وجلال بيه المدام معاه اهه وحتنورنا ولا إيه يا مدام ما
تحضرينا.
: فتحت ندا عنيها وبصت لى وقالت : انا تمام .. ممكن نروح يا جلال ..
لو عايز .. الفرح فرحنا ولا إيه؟ : خلاص اهه .. اهه الست قالت ما فيش مشكله يا باشا .. والله
عايزنكم تشرفولنا الليله التانية بقى .. الليلة اللى فى البلد اهم واكبر!
: يا حاج انا
ما اادرش اسيب الادارة كده : لو عايز حتعمل ده انت مدير يا باشا : إيه يا عم جلال ما تقول حاجه؟
: طب خليها كمان
كام يوم يا حاج نكون مرتبينها بس : يا باشا المدام قالت ممكن تيجوا واهو تحضروا فرح صعيدى
برضك حاجه حلوة ان شاء الله وحاجه تشرف والله حتنبسطوا بجونا خالص.
: يا حاج انا
مش حينفع لو جلال بيه ممكن يبقى يروح هو وانا ابقى احصلكم بكره بعد الشغل : يعنى برضه كده؟
: والله يا حاج
عندى حاجات كتيرة .. ان شاء الله ححصلكم : طب ابعت لك عربية اى ساعة؟ : لا انا حسافر بعربيتى : تبقى مش حتيجى!
: لا والله
ححاول فعلا والمهم جلال بيه بس يشوف وهو حيقولك كل حاجه : جلال باشا على راسنا بس احنا برضك عايزين
حضرتك معنا : حاضر والله ححاول اكون فى الفرح ان
شاء الله.
اخدت جنب و
كتبت رساله لفريدة على الموبايل انى مسافر يوم صد رد حشوف مكان ولو هى صاحيه
تكلمنى . سالم دبسنى فالمشوار ده بس ذى ما يكون انا عايز اتدبس .. المهم دلوقتى عايز
اروح اغير و استحم و ... لكن الرد كان ....
: يا باشا احنا
بجينا الفجر والعربيات حتطلع كمان ساعتين خش يا باشا ريح السعتين دول ومافيش اريح
من الجلاليب الصعيدى والهانم برضك حنلاقى لحضرتها ان شاء الله حاده تناسب اذا كانت
ترضى يعنى؟ رفعت ندا راسها قالت: انا معى حاجات فى العربية.
اتقفلت عليك
يا عم جلال وكل حاجه محلوله .. حتى حاجات ندا بعتها سالم مع راجل من رجالة الحاج
نسيم وخلع .. حيروح يغير وحيبعت عسكرى المراسلة بتاعه يرجع لى العربية تحت البيت
يمكن فريدة تحتاجها ولا حاجة وياخد عربية ندا من الكوربة يسيبها تحت البيت عند سالم
فى الجراج ويروح . وسالم حيروح الادارة يخلص شوية شغل بس ما سبتوش الا لما حلف انه
حيحصلنا.
وجينا للحظه
الحرجه .. ازاى بقى يا عم جلال حتقعد مع الموزة الجامدة المسطوله دى فى مكان مقفول
لوحدكم؟
ده هو سؤال
حلقة اليوم .. ابعتولنا على 13999 استنتاجاتكم .. إيه اللى حيحصل ولو الجواب صح
حتكسبوا معانا فى المسابقة .. شقة فى جهنم اربع شياطين وصالة برعايت ابليس.
ليست هناك تعليقات:
إرسال تعليق